រាជធានីភ្នំពេញ ៖ បុរសម្នាក់ បានប្រើប្រាស់សារធាតុញៀន រហូតញៀនងប់ងល់ដល់កម្រិត(បែកថ្នាំ)ទៅហើយ និងត្រូវបានក្រុមគ្រួសារយកទៅដាក់នៅមណ្ឌលកែប្រែ បន្សាបគ្រឿងញៀន ចំនួន០៣ដងមកហើយដែរ។ ចំណែកចុងក្រោយ ទើបចេញពីមណ្ឌលកែប្រែមកវិញចូលដល់ផ្ទះ…
រាជធានីភ្នំពេញ ៖ បុរសម្នាក់ បានប្រើប្រាស់សារធាតុញៀន រហូតញៀនងប់ងល់ដល់កម្រិត(បែកថ្នាំ)ទៅហើយ និងត្រូវបានក្រុមគ្រួសារយកទៅដាក់នៅមណ្ឌលកែប្រែ បន្សាបគ្រឿងញៀន ចំនួន០៣ដងមកហើយដែរ។ ចំណែកចុងក្រោយ ទើបចេញពីមណ្ឌលកែប្រែមកវិញចូលដល់ផ្ទះ បាន១០ថ្ងៃប៉ុណ្ណោះ ក៏ស្រាប់តែថ្នាំញៀនរើឡើង ក៏បានដុតផ្ទះខ្លួនឯង បណ្ដាលឆាបឆេះហ៊ុយផ្សែងឃ្មួលខ្មាញ់ បង្កឲ្យអ្នកជិតខាងមានការភ្ញាក់ផ្អើល និងភ័យខ្លាចឆេះរាលដល់ផ្ទះរបស់គេ ចំណែកសមត្ថកិច្ចមូលដ្ឋាន ក៏បានចុះទៅទីនោះ និងហៅរថយន្តពន្លត់អគ្គិភ័យជាច្រើនគ្រឿង ចេញជួយបាញ់ពន្លត់រហូតរលត់ទៅវិញ ។
ហេតុការណ៍នោះបានបង្កឲ្យមានការភ្ញាក់ផ្អើលឡើង កាលពីវេលាម៉ោង១០និង១៥នាទីព្រឹកថ្ងៃទី១៧ ខែធ្នូ ឆ្នាំ២០២៤នេះ ស្ថិតនៅតាមផ្លូវបេតុង បុរីមួយកន្លែង ស្ថិតនៅក្នុងភូមិគោកបន្ទាយ សង្កាត់ព្រៃស ខណ្ឌដង្កោ រាជធានីភ្នំពេញ ។
ជនសង្ស័យឈ្មោះ ស៊ុន ថានុត អាយុ៣៧ឆ្នាំ ត្រូវនគរបាលប៉ុស្តិ៍ព្រៃស ធ្វើការឃាត់ខ្លួន ដែលលោកកូនរូបនេះ បានដុតផ្ទះខ្លួនឯង នាំទៅកាន់ប៉ុស្តិ៍ ភ្លាមៗផងដែរ ។
បើតាមបុរសជាឪពុក បាននិយាយថា កូនប្រុសរបស់គាត់រូបនេះ បានប្រើប្រាស់គ្រឿងញៀន រហូតញៀនដល់កម្រិតបែកថ្នាំទៅហើយ កន្លងមកធ្លាប់អុកឡុកបំផ្លាញទ្រព្យសម្បត្តិ នៅក្នុងផ្ទះជាបន្តបន្ទាប់ ហើយគាត់ក៏បានយកទៅដាក់នៅមណ្ឌលកែប្រែបន្សាបគ្រឿងញៀន ចំនួន៣ដងមកហើយ ប៉ុន្តែដាក់អត់បានយូរនោះទេ យ៉ាងច្រើនត្រឹមតែ ២ខែប៉ុណ្ណោះ ខាងមណ្ឌលបានហៅឲ្យគាត់ទៅយកមកវិញហើយ ពេលគាត់អត់ទៅយក ខាងមណ្ឌលដោះលែងឲ្យមកវិញ តែម្ដង ។ ដោយខាងមណ្ឌលថា កូនប្រុសគាត់មានផ្ទុកជំងឺអេដស៍មិនអាចនៅបាន លុះពេលត្រលប់ មកដល់ផ្ទះវិញ យ៉ាងយូរ១០ថ្ងៃប៉ុណ្ណោះ កូនប្រុសរូបនេះ ចាប់ផ្ដើមអុកឡុកគ្រួសារទៀតហើយ ។
ឪពុករូបនោះ បាននិយាយបន្តថា គាត់ចង់ឲ្យកូនប្រុសនេះ ជាប់ឲ្យយូរកាន់តែល្អ ទុកមួយជីវិតក៏ទុកទៅ ហើយបើស្លា.ប់នៅទីនោះ ក៏ស្លា.ប់ទៅចុះ ព្រោះសព្វថ្ងៃ គាត់រស់នៅតែ២នាក់ប្ដីប្រពន្ធប៉ុណ្ណោះ គាត់ក៏មានការភ័យខ្លាចចំពោះកូនប្រុសនេះដែរ ដោយសារតែលើកមុនកូនប្រុសនេះ បានដុតផ្ទះម្ដងដែរ ប៉ុន្តែមិនបានសម្រេច។ ដោយឡែក លើកចុងក្រោយនេះ បន្ទាប់ពីចេញពីមណ្ឌលកែប្រែ ក៏បានទៅនៅផ្ទះប្អូនគាត់នៅឯខេត្តពោធិ៍សាត់ ហើយប្រាប់ថា កែខ្លួនហើយ និងចង់មករកស៊ីនឹងគេ ទើបគាត់ឲ្យត្រលប់មកផ្ទះវិញ ប៉ុន្តែទើបតែបាន១០ថ្ងៃប៉ុណ្ណោះ ហើយប៉ុន្មានថ្ងៃមុន គាត់បានឲ្យម៉ូតូ ១គ្រឿងជិះ ស្រាប់តែយកទៅបញ្ចាំបាត់ លុះដល់ថ្ងៃនេះ ក៏បានដុតផ្ទះបង្កការឆាបឆេះតែម្ដង ។
នគរបាល បានប្រាប់ឲ្យដឹងថា ព្រោះតែឥទ្ធិពលគ្រឿងញៀន បានធ្វើឲ្យបុរសនោះលែងដឹងអី និងបានដុតផ្ទះខ្លួនឯង បណ្ដាលឲ្យឆាឆេះពូកនៅក្នុងបន្ទប់ដេក ហុយផ្សែងឃ្មួលខ្មាញ់ រួចហើយបានឈរនៅក្នុងផ្ទះនោះ អត់ព្រមរត់ចេញ អត់ខ្លាចស្លា.ប់នោះទេ។ ពេលនោះ បានបង្កឲ្យមានការភ្ញាក់ផ្អើលយ៉ាងខ្លាំង ហើយកម្លាំងសមត្ថកិច្ចបានចេញអន្តរាគមន៍ភ្លាមៗ និងបានហៅរថយន្តពន្លត់អគ្គិភ័យចំនួន៤គ្រឿង ទៅកាន់ទីនោះ ដោយបានប្រើប្រាស់អស់ទឹកចំនួន ៣រថយន្ត ទើបពន្លត់រលត់ទៅវិញទាំងស្រុង។ បន្ទាប់មក កម្លាំងនគរបាលប៉ុស្តិ៍ព្រៃស បានធ្វើការឃាត់ខ្លួនលោកកូនដុតផ្ទះខ្លួនឯងនោះ នាំទៅកាន់ប៉ុស្តិ៍ ដើម្បីកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ