ទីក្រុងបាងកក៖ ចំនួនអ្នកស្លាប់ដោយសារគ្រោះទឹកជំនន់នៅប្រទេសថៃភាគខាងត្បូងបានកើនឡើងដល់២៥នាក់ គិតតែសាកសពជនរងគ្រោះដែលគេបានរកឃើញតែប៉ុណ្ណោះ។ នេះបើយោងតាមការបញ្ជាក់ពីមន្ត្រីរដ្ឋាភិបាលដែលទទួលបន្ទុកខាងជួយសង្គ្រោះ។ បញ្ហាមិនទាន់បញ្ចប់ត្រឹមនេះទេ។ អាជ្ញាធរព្យាករថានឹងមានភ្លៀងធ្លាក់ខ្លាំងជាច្រើនថ្ងៃទៅមុខទៀត។
ជំនន់ទឹកភ្លៀងដែលហក់ឡើងខ្ពស់យ៉ាងឆាប់រហ័សតាំងពីថ្ងៃទី២២ ខែវិច្ឆិកាកំពុងបង្កផលប៉ះពាល់ធ្ងន់ធ្ងរចំពោះផ្ទះរបស់អ្នកស្រុកជាង៦សែនខ្នងនៅបណ្ដាខេត្តភាគខាងត្បូង ជាពិសេស ខេត្តណារ៉ាធីវ៉ាត់រងគ្រោះខ្លាំងជាងគេ។ ម្ចាស់កសិដ្ឋានម្នាក់នៅខេត្តសុងខ្លា (Songkhla) ប្រាប់ថាគ្រោះទឹកជំនន់លើកនេះបំផ្លាញកសិដ្ឋានរបស់គាត់អស់រលីង។ មាន់របស់គាត់ជាងមួយម៉ឺនក្បាលត្រូវស្លាប់អស់គ្មានសល់មួយ។ គាត់ខាតអស់ប្រាក់៣លានបាត ឬប្រហាក់ប្រហែលនឹង៨៧០០០ដុល្លារអាមេរិក។
មនុស្សជាង២២០០០នាក់ត្រូវបង្ខំចិត្តចាកចោលផ្ទះសម្បែងរបស់ខ្លួនដើម្បីគេចចេញពីជំនន់ទឹកភ្លៀងនៅខេត្តប៉ាតានី, ណារ៉ាធីវ៉ាត់, សុងខ្លា និងយ៉ាឡា។ តាមរយៈវីឌីអូឃ្លីបដែលគេបង្ហោះតៗគ្នានៅលើបណ្ដាញសង្គម គេឃើញថាអ្នករស់នៅខេត្តសុងខ្លាខិតខំរៀបចំបាវខ្សាច់ដាក់តម្រៀបនៅមុខផ្ទះដើម្បីទប់ទឹកជំនន់។
ប្រធានភូមិនៅខេត្តយ៉ាឡា លោកអាប់ឌុលឡោះ អាប៊ូ (Abdullah Abu) ប្រាប់ថានៅក្នុងភូមិរបស់គាត់កន្លែងខ្លះទឹកលិចដល់កម្ពស់៧ម៉ែត្រ។ ប្រជាជនរកអ្វីទទួលទានឱ្យបានឆ្អែត និងគ្រប់គ្រាន់គ្មានទេ។ មួយថ្ងៃហូបបានតែម្ដងគត់។ ក្រុមអ្នកជួយសង្គ្រោះដឹកអាហារតាមទូកកៅស៊ូទៅចែកជូនពួកគេ។ អាជ្ញាធរព្យាករថានឹងមានភ្លៀងធ្លាក់ជាបន្តទៀតរហូតដល់ថ្ងៃទី៥ ខែធ្នូ។
កាលពីថ្ងៃអង្គារ គណៈរដ្ឋមន្ត្រីថៃបានអនុម័តថវិកាជួយសង្គ្រោះក្រុមគ្រួសារដែលរងផលប៉ះពាល់។ មួយគ្រួសារទទួលបានប្រាក់៩ពាន់បាត ឬស្មើនឹងជាង២៦០ដុល្លារ។ ប្រទេសថៃឆ្នាំនេះរងគ្រោះខ្លាំងដោយសារគ្រោះធម្មជាតិ ភ្លៀងធ្លាក់ខ្លាំង គ្រោះទឹកជំនន់ និងការបាក់ដី។ ខ្យល់ព្យុះយ៉ាជីទើបតែកន្លងផុតទៅកាលពីខែកញ្ញាដោយបានឆក់យកជីវិតមនុស្សជាច្រើននាក់។
ខ្យល់ព្យុះនេះវាយប្រហារប្រទេសខ្លះនៅអាស៊ីអាគ្នេយ៍ដូចជាថៃ ឡាវ ភូមា និងវៀតណាម។ ជាពិសេស វៀតណាមរងគ្រោះខ្លាំងជាងគេ។ វៀតណាម ខាតបង់ទ្រព្យសម្បត្តិគិតជាទឹកប្រាក់រាប់ពាន់លានដុល្លារ និងស្លាប់មនុស្សរាប់រយនាក់។ ចំណែកភូមារងគ្រោះខ្លាំងលំដាប់ទីពីរ និងមានទឹកជំនន់លិចនៅតំបន់ខ្សែក្រវាត់រដ្ឋធានីណៃពិដោរ។ ស្រុកមួយនៅប្រទេសថៃរងគ្រោះដោយជំនន់ទឹកភ្លៀងធ្ងន់ធ្ងរមិនធ្លាប់មាននៅក្នុងរយៈពេល៨០ឆ្នាំចុងក្រោយ៕
ចែករំលែកព័តមាននេះ