ទីក្រុងប៉េកាំង៖ ថ្ងៃនេះ តុលាការសាលាដំបូងនៅទីក្រុងប៉េកាំង ប្រទេសចិន សម្រេចផ្ដន្ទាទោសអ្នកសារព័ត៌មានជើងចាស់ម្នាក់ដាក់ពន្ធនាគារ៧ឆ្នាំពីបទស៊ើបយកការណ៍សម្ងាត់របស់រដ្ឋ។ លោកតុងយូយូ (Dong Yuyu) ជានិពន្ធនាយកកាសែតក្វាងមីងដេលី (Guangming…
ទីក្រុងប៉េកាំង៖ ថ្ងៃនេះ តុលាការសាលាដំបូងនៅទីក្រុងប៉េកាំង ប្រទេសចិន សម្រេចផ្ដន្ទាទោសអ្នកសារព័ត៌មានជើងចាស់ម្នាក់ដាក់ពន្ធនាគារ៧ឆ្នាំពីបទស៊ើបយកការណ៍សម្ងាត់របស់រដ្ឋ។ លោកតុងយូយូ (Dong Yuyu) ជានិពន្ធនាយកកាសែតក្វាងមីងដេលី (Guangming Daily) វ័យ៦២ឆ្នាំ ត្រូវបានសមត្ថកិច្ចចាប់ខ្លួនកាលពីខែកុម្ភៈ ឆ្នាំ២០២២ នៅពេលគាត់អង្គុយញ៉ាំអាហារថ្ងៃត្រង់ជាមួយបុគ្គលិកស្ថានទូតជប៉ុនម្នាក់។ នេះបើយោងតាមក្លឹបអ្នកកាសែតអាមេរិកថ្លែងនៅក្នុងសេចក្ដីប្រកាស។
ក្រោយការចាប់ខ្លួននោះ សមត្ថកិច្ចចោទប្រកាន់គាត់ពីបទស៊ើបការណ៍សម្ងាត់។ នៅក្នុងសវនាការ ក្រុមគ្រួសារគាត់ប្រាប់ថារដ្ឋអាជ្ញាបានចោទប្រកាន់ថាបុគ្គលិកស្ថានទូតជប៉ុនដែលស្គាល់គ្នារាប់អានជាមួយលោកតុងយូយូនោះ តាមពិតជាភ្នាក់ងារស៊ើបការណ៍សម្ងាត់របស់ជប៉ុនដែលជ្រកក្រោមផ្លាកជាបុគ្គលិកទូតដើម្បីមានអភ័យឯកសិទ្ធិ និងគេចផុតពីការផ្ដន្ទាទោស។
រដ្ឋអាជ្ញាចោទប្រកាន់ថាជនជាតិជប៉ុនរូបនោះជាភ្នាក់ងារសម្ងាត់ដែលធ្វើការនៅក្នុងអង្គភាពស៊ើបការណ៍នៃស្ថានទូតជប៉ុននៅទីក្រុងប៉េកាំង។ ការកាត់ទោសលោកតុងយូយូជាការបង្ហាញថាប្រជាជនចិនគ្រប់រូបគួរតែយល់ឱ្យបានច្បាស់ថារដ្ឋាភិបាលចិនចាត់ទុកស្ថានទូតបរទេសជាអង្គភាពស៊ើបការណ៍សម្ងាត់ពីចិន។ សមត្ថកិច្ចចិនបានដាក់ពង្រាយកម្លាំងយ៉ាងក្រាស់ឃ្មឹកនៅបរិវេណតុលាការ។ បុគ្គលិកស្ថានទូតអាមេរិកដែលស្នើសុំចូលរួមសវនាការនោះមិនត្រូវបានផ្ដល់សិទ្ធិឱ្យចូលរួមទេ។
អ្នកដែលស្គាល់លោកតុងយូយូច្បាស់ប្រាប់ថាគាត់មិនមែនរាប់អានតែជាមួយបុគ្គលិកទូតជនជាតិជប៉ុនម្នាក់នេះទេ។ ក្នុងនាមជានិពន្ធនាយកម្នាក់ គាត់ប្រាស្រ័យទាក់ទងជាមួយបុគ្គលិកទូតទូទៅ និងអ្នករួមអាជីពសារព័ត៌មានជាមួយគ្នាជាច្រើនទៀត។ បុគ្គលិកទូតដែលគាត់ធ្លាប់ញ៉ាំអាហារជាមួយនោះក៏ត្រូវសមត្ថកិច្ចចាប់ខ្លួនយកទៅសួរនាំអស់ជាច្រើនម៉ោងផងដែរ។
អ្នកនាំពាក្យក្រសួងការបរទេសចិនថ្លែងថាបុគ្គលិកទូតជប៉ុនរូបនេះធ្វើសកម្មភាពផ្ទុយពីការងារដែលគាត់គួរធ្វើ។ មានន័យថាគាត់ជាបុគ្គលិកទូត ប៉ុន្តែជាក់ស្ដែង គាត់ធ្វើសកម្មភាពជាភ្នាក់ងារស៊ើបការណ៍សម្ងាត់ច្រើនជាង។ ទោះជាយ៉ាងណាក្ដី បុគ្គលិកទូតរូបនោះត្រូវបានដោះលែងវិញហើយ។ លោកតុងយូយូ បន្ទាប់ពីរៀនចប់បរិញ្ញាបត្រច្បាប់ពីសាកលវិទ្យាល័យប៉េកាំង គាត់ក៏ចូលបម្រើការងារជាបុគ្គលិករបស់កាសែតក្វាងមីងដេលីកាលពីឆ្នាំ១៩៨៧។
កាលពីពេលចូលធ្វើការដំបូង គាត់មានមុខតំណែងជានិពន្ធនាយករងរបស់កាសែតនេះ និងទទួលបន្ទុកជាអ្នកពិនិត្យមើលបទអត្ថាធិប្បាយ ឬវេទិកាស្មេរ។ គាត់ធ្លាប់សរសេរអត្ថបទបញ្ចេញមតិជាច្រើនចុះផ្សាយនៅលើទំព័រសារព័ត៌មានរបស់ចិន និងសរសេរអត្ថបទចុះផ្សាយនៅលើព្រឹត្តិបត្តិបែបសិក្សាស្រាវជ្រាវពាក់ព័ន្ធនឹងវិស័យច្បាប់ និងបញ្ហាសង្គម៕
ចែករំលែកព័តមាននេះ