ទីក្រុងប៉េកាំង៖ មានសារព័ត៌មានចុះផ្សាយថារដ្ឋមន្ត្រីការពារជាតិចិន លោកតុងជុន (Dong Jun) ត្រូវបក្សកុម្មុយនិស្តចិនដកតំណែងបាត់ទៅហើយ។ ដំណឹងនេះចុះផ្សាយមុនគេនៅលើទំព័រសារព័ត៌មានហ្វាយណាន់សលថាមស៍ (Financial Times) ។…
ទីក្រុងប៉េកាំង៖ មានសារព័ត៌មានចុះផ្សាយថារដ្ឋមន្ត្រីការពារជាតិចិន លោកតុងជុន (Dong Jun) ត្រូវបក្សកុម្មុយនិស្តចិនដកតំណែងបាត់ទៅហើយ។ ដំណឹងនេះចុះផ្សាយមុនគេនៅលើទំព័រសារព័ត៌មានហ្វាយណាន់សលថាមស៍ (Financial Times) ។ កាសែតដដែលនេះចុះផ្សាយថាលោកតុងជុនកំពុងស្ថិតនៅក្រោមការស៊ើបអង្កេតរបស់បក្សកុម្មុយនិស្តចិនពាក់ព័ន្ធនឹងអំពើពុករលួយ។ លោកត្រូវបានតែងតាំងជារដ្ឋមន្ត្រីកាលពីខែធ្នូ ឆ្នាំ២០២៣បន្ទាប់ពីលោកលីសាងហ្វ៊ូ (Li Shangfu) ដែលជាអ្នកជំនាន់មុនរបស់លោកក៏ត្រូវអស់តំណែងដោយសាររឿងពុករលួយដូចគ្នា។
នេះជាផ្នែកមួយនៃការបោសសម្អាតអំពើពុករលួយនៅប្រទេសចិន ជាពិសេសនៅក្នុងជួរកងទ័ព និងក្រសួងការពារជាតិ។ ចាប់តាំងពីឆ្នាំ២០២៣មក មន្ត្រីយោធាជាន់ខ្ពស់កម្រិតឧត្ដមសេនីយ៍៩នាក់ និងមន្ត្រីកំពូលៗយោធាដទៃទៀតត្រូវបានដកតំណែង។ កាលពីមុនមកកាន់តំណែងជារដ្ឋមន្ត្រី លោកតុងជុនធ្លាប់ជាមេបញ្ជាការកងទ័ពជើងទឹក។ ក្រោយមក លោកលីសានហ្វ៊ូកាន់តំណែងជារដ្ឋមន្ត្រីការពារជាតិបាន៧ខែក៏ត្រូវបណ្ដេញចេញវិញ ហើយលោកតុងជុនក៏ឡើងមកជំនួស។
សូមរំលឹកថាកាលពីសប្ដាហ៍មុន រដ្ឋមន្ត្រីការពារជាតិអាមេរិក លោកឡយអូស្ទីន បានស្នើសុំជួបលោកតុងជុនជាលក្ខណៈទ្វេភាគីនៅប្រទេសឡាវ។ ប៉ុន្តែគ្មានការឆ្លើយតបពីលោកតុងជុនទេ។ ប្រហែលជាលោកតុងជុនមានបញ្ហាតាំងពីពេលនោះមកក៏មិនដឹង។ ជាប្រមុខការពារជាតិចិន លោកតុងជុនត្រូវធ្វើទំនាក់ទំនងនយោបាយការពារជាតិជាមួយប្រទេសដទៃទៀត។
ភាពតានតឹងផ្នែកយោធារវាងអាមេរិក និងចិនបានកែសម្រួលខ្លះៗនៅក្នុងមុខតំណែងរបស់លោក។ ប្រទេសទាំង២ចាប់ផ្ដើមការសន្ទនាគ្នាឡើងវិញកម្រិតមេបបញ្ជាការកងទ័ពកាលពីខែកញ្ញា។ ទោះជាមានគុណសម្បត្តិបែបនេះក្ដី លោកតុងជុនមិនត្រូវបានដំឡើងតំណែងនៅក្នុងគណៈកម្មការយោធានៃបក្សកុម្មុយនិស្តចិនទេនៅពេលបើកមហាសន្និបាតបក្សកាលពីដើមឆ្នាំ២០២៤។
ជាទូទៅ រដ្ឋមន្ត្រីការពារជាតិចិនត្រូវមានតួនាទីនៅក្នុងគណៈកម្មការយោធានៃបក្សកុម្មុយនិស្ត និងក៏ជាសមាជិកក្រុមប្រឹក្សារដ្ឋផងដែរ។ ប៉ុន្តែជាក់ស្ដែង លោកតុងជុងគ្មានតួនាទីនៅក្នុងស្ថាប័នទាំង២នេះទេ។ កាលពីពេលបើកមហាសន្និបាតបក្សនៅដើមឆ្នាំ២០២៤ មានការប្រកាសតែងតាំងមុខតំណែងយ៉ាងព្រោងព្រាត។ ប៉ុន្តែលោកតុងជុនគ្មានឈ្មោះនៅក្នុងនោះទេ។ នៅក្នុងក្រុមប្រឹក្សារដ្ឋក៏ដូចគ្នាដែរ។ នៅក្នុងការតែងតាំងតួនាទីមន្ត្រីរដ្ឋាភិបាលកាលពីខែមីនា លោកក៏ទទួលបានការតែងតាំងអ្វីទាំងអស់។
អ្នកវិភាគនៅសាកលវិទ្យាល័យចចថោនថ្លែងថារឿងនេះគ្មានអ្វីគួរឱ្យភ្ញាក់ផ្អើលទេ។ កាលណាបក្សកុម្មុយនិស្តចាប់ផ្ដើមដុសក្អែលមន្ត្រីរបស់ខ្លួនពាក់ព័ន្ធនឹងអំពើពុករលួយ ពេលនោះនឹងមានការដកហូតតំណែងមន្ត្រីតូចធំជាមិនខានឡើយ។ រដ្ឋមន្ត្រីការពារជាតិ២រូបដែលកាន់តំណែងមុនលោកតុងជុន គឺលោកលីសាងហ្វ៊ូ (Li Shangfu) និងលោកវៃហ្វឹងហឺ (Wei Fenghe) ត្រូវបានបណ្ដេញចេញពីក្របខណ្ឌបក្សកាលពីខែមិថុនាពីបទធ្វើខុសវិន័យបក្ស។ មានន័យថាប្រព្រឹត្តអំពើពុករលួយ៕
ចែករំលែកព័តមាននេះ