ប្រមុខរាជរដ្ឋាភិបាល ប្រកាសបញ្ឈប់ មិនឲ្យកែប្រែបង្គោលព្រំដី នៃបឹងទន្លេរសាបទៀតទេ
រាជធានីភ្នំពេញ ៖ ប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានប្រកាសបញ្ឈប់ មិនឲ្យមានការកែប្រែបង្គោលព្រំដី…
រាជធានីភ្នំពេញ ៖ ប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានប្រកាសបញ្ឈប់ មិនឲ្យមានការកែប្រែបង្គោលព្រំដី នៃបឹងទន្លេសាប បន្ទាប់ពីបានបញ្ចប់ការបោះបង្គោលព្រំ កំណត់តំបន់៣ នៃបឹងទន្លេសាប គឺមិនឱ្យមានការកែសម្រួល ឬការកែប្រែទៀតទេ ត្រូវថែរក្សាឱ្យបាន ។
ថ្លែងក្នុងឱកាសអញ្ជើញបិទសន្និបាត បូកសរុបលទ្ធផលការងារប្រចាំឆ្នាំ២០២៤ និងលើកទិសដៅការងារបន្ត របស់ក្រសួងរៀបចំដែនដី នគរូបនីយកម្ម និងសំណង់ នារសៀលថ្ងៃទី២៦ ខែវិច្ឆិកា ឆ្នាំ២០២៤ សម្តេចបវរធិបតី នាយករដ្ឋមន្ត្រីកម្ពុជា បានគូសបញ្ជាក់ថា “រដ្ឋាភិបាល មានភារកិច្ច២ ទី១. កាតព្វកិច្ច ចំពោះប្រជាពលរដ្ឋ ដែលនៅជាក់ស្តែង នៅកន្លែងនោះ ជាពិសេសអ្នក ដែលមានភូមិករនៅទីនោះយូរហើយ ដែលរាជរដ្ឋាភិបាល សម្តេចតេជោកាត់តំបន់១ ឲ្យកន្លែងខ្លះ កន្លែងប្រជាពលរដ្ឋអាស្រ័យផល ដែលមិនប៉ះពាល់ ធ្ងន់ធ្ងរ ទៅដល់ប្រព័ន្ធអេកូឡូស៊ី ប្រព័ន្ធជីវៈចំរុះ នៃបឹងទន្លេរសាប យើងអាចផ្តល់សិទ្ធិ ជូនប្រជាពលរដ្ឋ មានសិទ្ធិនៅក្នុងការអាស្រ័យផង ដើម្បីគាត់បានផលចំណូលមួយចំនួន តែមិនបំផ្លាញអេកូឡូស៊ី ប្រភពជីវៈចំរុះ ធនធានត្រី សម្រាប់ប្រជាពលរដ្ឋរាប់លាននាក់នោះទេ” ។
សម្តេចបវរធិបតី បានលើកឡើងថា ដោយឡែកតំបន់៣ ដែលជាតំបន់ ដែលអាចបង្កឱ្យប៉ះពាល់ ដល់ប្រព័ន្ធអេកូឡូស៊ី ជីវៈចំរុះ និងប្រភពត្រី ត្រូវបានសម្តេចធិបតី បញ្ជាក់មិនឱ្យមានការរំលោភលើតំបន់៣ឡើយ ព្រោះជាតំបន់ដាច់ខាត ត្រូវការពារ ។
សម្តេចបវរធិបតី មានបានបន្ថែមថា “រដ្ឋាភិបាល ដៃម្ខាងគិតផលប្រយោជន៍ប្រជាជន រាប់រយនាក់រាប់រយគ្រួសារ ដែលនៅក្នុងនោះ ដៃម្ខាង គឺ១៧លាននាក់ ហើយបឹងទន្លេរសាបនេះ គឺមិនមែនថែសម្រាប់ ១៧លាននាក់ទេ បឹងទន្លេរសាបនេះ ១៧លាននាក់ បច្ចុប្បន្ន តែ២០ឆ្នាំទៀត ប្រជាជនខ្មែរអាចកើនឡើង២០លាននាក់ ៣០លាននាក់ យើងការពារបឹងនេះ សម្រាប់ប្រជាជនខ្មែរទូទាំងប្រទេស មិនថាប៉ុន្មានលាននាក់នោះទេ” ។
បន្ទាប់ពីបានបញ្ចប់ការបោះបង្គោល សម្តេចនាយករដ្ឋមន្ត្រី បានបញ្ជាក់ថា “ខ្ញុំបានប្រាប់ហើយ គឺគ្មានការកំណត់ ឬកែសម្រួលព្រំដីទៀតទេ យើងធ្លាប់កែពីព្រំតំបន់ ៣ មកតំបន់២ ហើយថ្មីៗនេះ យើងកែរាប់ម៉ឺនហិចតាទៀត ដើម្បីឱ្យប្រជាជនមានសិទ្ធិពីតំបន់៣ មកតំបន់២ យើងកែ សឹងតែអស់ទៅហើយ ចឹងនៅមានការស្នើសុំចង់កែអាតំបន់៣ តំបន់២ ធ្វើអីទៀត អត់ទេ ត្រូវការពារសម្រាប់ ១៧លាននាក់ គឺមិនមានការកែប្រែតំបន់៣ មកតំបន់២ទៀតទេ គឺត្រូវថែរក្សាឱ្យបាន។ យើងគ្រាន់ តែកែមកចង់ ៨ម៉ឺនហិចតា កែពីតំបន់៣ មកតំបន់២ និងតំបន់១ មាន៨ម៉ឺនហិចតា ដើម្បីយកមកឱ្យប្រជាជន មានកម្មសិទ្ធិ ឬមួយមានសិទ្ធិប្រើប្រាស់ ឥឡូវបើសុំកាត់រាប់សែនហិចតាទៀត កាត់អត់ឈប់ទេ តំបន់៣ មកតំបន់២ ធ្វើតំបន់២ហើយ សុំពង្រីកតំបន់៣ មកទៀត ចឹងគឺអត់ចប់ ចឹងត្រូវតែហ៊ានអាកាត់មួយ ដើម្បីផលប្រយោជន៍រួម” ។
ក្នុងឱកាសនោះដែរ សម្តេចធិបតី ក៏បានអះអាងដែរថា ការការពារតំបន់៣ នៃបឹងទន្លេរសាប កឺមិនមែនសម្រាប់សម្តេចខ្លួនឯងផ្ទាល់ ហើយក៏មិនមែនសម្រាប់មន្ត្រីរាជរដ្ឋាភិបាល អាជ្ញាធរណាម្នាក់ដែរ គឺសម្រាប់ប្រជាជនខ្មែររាប់លាននាក់ សម្រាប់ប្រព័ន្ធអេកូឡូស៊ី សម្រាប់ប្រព័ន្ធជីវៈចំរុះ ប្រព័ន្ធត្រីនៅមានអនាគតវែងឆ្ងាយបន្តទៅទៀត ។
សម្តេចបវរធិបតី ក៏បានប្រកាសជាសារណៈ ថា សម្រាប់តំបន់២ ក៏គ្មានកម្មសិទ្ធិ និងគ្មានការលក់ដូរនោះដែរ មានត្រឹមសិទ្ធិប្រើប្រាស់ជួលពីរដ្ឋតែប៉ុណ្ណោះ៕
ចែករំលែកព័តមាននេះ