ទីក្រុងហាណូយ៖ សេដ្ឋីវៀតណាមអចលនទ្រព្យវៀតណាម លោកស្រីជឿងមីឡាន ដែលត្រូវតុលាការសាលាដំបូងកាត់ទោសប្រហារជីវិត បានស្នើសុំឱ្យតុលាការទុកជីវិតឱ្យលោកស្រីផង។ លោកស្រីនឹងខិតខំរកលុយមកសងបំណុលដែលបានបាត់បង់។ សេដ្ឋីអចលនទ្រព្យ លោកស្រីជឿងមីឡាន ត្រូវតុលាការកាត់ទោសប្រហារជីវិតពីបទឆបោកប្រាក់២៧ពាន់លានដុល្លារពីធានាពាណិជ្ជសៃហ្កន។ នេះជាអំពើឆបោកដែលល្បីផ្ដាច់គេប្រចាំទ្វីបអាស៊ី ហើយក៏ល្បីលំដាប់ពិភពលោកផងដែរ។
ឥឡូវនេះ លោកស្រីកំពុងដាក់ពាក្យប្ដឹងទាស់ទៅតុលាការឧទ្ធរណ៍ ហើយរំពឹងថាសេចក្ដីសម្រេចនឹងដឹងនៅក្នុងរយៈពេលប៉ុន្មានថ្ងៃខាងមុខនេះ។ នៅក្នុងសេចក្ដីអំពាវនាវចុងក្រោយទៅកាន់តុលាការ លោកស្រីឡានថ្លែងថា «បំណងប្រាថ្នាតែ១គត់របស់លោកស្រីគឺរកលុយសងបំណុលទៅធនាគារពាណិជ្ជសៃហ្កនវិញ និងសងម្ចាស់លុយដែលបានដាក់ប្រាក់វិនិយោគជាមួយនឹងក្រុមហ៊ុនរបស់លោកស្រី។ លោកស្រីលែងខ្វាយខ្វល់អំពីការខូចខាតទ្រព្យសម្បត្តិផ្ទាល់ខ្លួន និងក្រុមគ្រួសារតទៅទៀតហើយ»។
លោកស្រីថ្លែងបន្តទៀតថាលោកស្រីខូចចិត្តមិនតិចទេដោយសារការបាត់បង់យ៉ាងខ្ជះខ្ជាយនូវធនធានរបស់ជាតិ។ លោកស្រីអះអាងថាលោកស្រីមានក្ដីអាម៉ាស់យ៉ាងខ្លាំងដែលត្រូវជាប់ចោទនៅក្នុងសំណុំរឿងឧក្រិដ្ឋនេះ។ នៅទីបញ្ចប់លោកស្រីសូមស្នើសុំទៅតុលាការបន្ធូរបន្ថយទោសប្រហារជីវិតចំពោះលោកស្រី។
យោងតាមច្បាប់របស់វៀតណាម លោកស្រីជឿងមីឡានអាចនឹងរួចផុតពីទោសប្រហារជីវិតទៅបានលុះត្រាតែអនុវត្តទៅតាមលក្ខខណ្ឌ១ចំនួន។ លោកស្រីត្រូវបន្តបង់រំលស់ប្រាក់ឆបោកនោះឱ្យបាន៧៥% ឬ៣/៤ ហើយត្រូវតុលាការពិនិត្យឃើញថាលោកស្រីពិតជាសហការយ៉ាងពេញទំហឹងជាមួយអាជ្ញាធរនៅក្នុងការដោះស្រាយទឹកប្រាក់ដែលបានបាត់បង់។ ប៉ុន្តែរដ្ឋអាជ្ញាប្រកាសកាលពីថ្ងៃចន្ទថាលោកស្រីឡាងមិនអាចបំពេញទៅតាមលក្ខខណ្ឌទាំងនេះទេ។
ទោសកំហុសរបស់លោកស្រីមានសភាពធំធេងពេក ធ្វើឱ្យមានផលវិបាកធ្ងន់ធ្ងរចំពោះសង្គមជាតិ។ ឥឡូវនេះ គេកំពុងតែជជែកគ្នានៅក្នុងតុលាការពាក់ព័ន្ធនឹងទំហំទ្រព្យសម្បត្តិផ្ទាល់ខ្លួនរបស់លោកស្រីឡាន។ លោកស្រីប្រាប់តុលាការថាវិធីសងបំណុលលឿនបំផុតគឺតាមរយៈការប្រកាសក្ស័យធនធនាគារពាណិជ្ជសៃហ្កន និងប្រមូលទ្រព្យសម្បត្តិដែលនៅសេសសល់ទាំងប៉ុន្មានយកទៅលក់ឡៃឡុងដើម្បីដោះបំណុល និងសងប្រជាជនដែលខាតបង់លុយកាក់៕
ចែករំលែកព័តមាននេះ