ទីក្រុងយេរូសាឡឹម៖ បន្ទាប់ពីតុលាការព្រហ្មទណ្ឌអន្តរជាតិ (ICC) ចេញដីកាតាមចាប់ខ្លួនលោកណឺតាន់យ៉ាហ៊ូ និងអតីតរដ្ឋមន្ត្រីការពារជាតិរបស់គាត់ អ៊ីស្រាអែលធ្វើផ្គើនកាន់តែខ្លាំង។ នៅល្ងាចថ្ងៃសុក្រ យោធាអ៊ីស្រាអែលបង្កើនការវាយប្រហារទៅលើមូលដ្ឋានរបស់ហាម៉ាស់នៅតំបន់ហ្កាហ្សា សម្លាបបានមេបញ្ជាការរបស់ពួកគេ២នាក់។ ទាំង២នាក់នេះបានចូលរួមយ៉ាងសកម្មនៅក្នុងការវាយប្រហារអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣។
ទន្ទឹមនឹងនោះ យុទ្ធនាការវាយប្រហារក្រុមហេសបូឡានៅប្រទេសលីបង់ក៏នៅតែបន្ត។ តាំងពីព្រឹកព្រលឹមថ្ងៃសុក្រ អ៊ីស្រាអែលចាប់ផ្ដើមវាយប្រហារទីតាំងជាច្រើនកន្លែងនៅទីក្រុងបេរូតភាគខាងជើង។ កាលពីថ្ងៃព្រហស្បតិ៍ តុលាការព្រហ្មទណ្ឌអន្តរជាតិអះអាងថាលោកណឺតាន់យ៉ាហ៊ូ និងអតីតរដ្ឋមន្ត្រីការពារជាតិរបស់គាត់ត្រូវតែទទួលខុសត្រូវផ្នែកព្រហ្មទណ្ឌពីបទប្រព្រឹត្តឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិ។
ការចេញដីការបស់ ICC ដើម្បីចាប់ខ្លួនលោកណឺតាន់យ៉ាហ៊ូនោះទទួលបានមតិចម្រុះពីថ្នាក់ដឹកនាំពិភពលោក។ ប្រទេសខ្លះប្ដេជ្ញាថាពួកនឹងចាប់ខ្លួនលោកណឺតាន់យ៉ាហ៊ូឱ្យទាល់តែបានបើគាត់ហ៊ានធ្វើដំណើរចូលទឹកដីរបស់ពួកគេ។ ដោយឡែក ថ្នាក់ដឹកនាំប្រទេសខ្លះទៀតប្រកាសថ្កោលទោសការចេញដីការបស់តុលាការ។ ឧទាហរណ៍ដូចជាលោកបៃដិនជាដើម។
ប្រតិកម្មចំពោះ ICC លោកបៃដិនចាត់ទុកថាការចេញដីការនោះធ្វើឱ្យមានអារម្មណ៍ហ្មងសៅយ៉ាងខ្លាំង។ លោកសច្ចាថានឹងឈរនៅខាងអ៊ីស្រាអែលជានិច្ចនៅក្នុងបុព្វហេតុការពារសន្តិសុខរបស់ខ្លួនទប់ទល់នឹងការគំរាមកំហែងពីខាងក្រៅ។ ប្រទេសចិនដែលមិនមែនជាសមាជិក ICC ទេបានជំរុញឱ្យតុលាការប្រកាន់ជំហរបែបសត្យានុម័ត និងគោលការណ៍យុត្តិធម៌។
អ្នកនាំពាក្យការបរទេសចិន លោកលីនជាន (Lin Jian) ថ្លែងថាប្រទេសចិនគាំទ្រកិច្ចខិតខំប្រឹងប្រែងណាមួយដែលនាំឱ្យមានភាពស្មើគ្នា និងយុត្តិធម៌។ ប្រទេសអ៊ីរ៉ង់ក្នុងនាមជាសម្ព័ន្ធមិត្តរបស់ក្រុមហាម៉ាស់, ហេសបូឡា, ហ៊ូទី និងចលនាប្រឆាំងនឹងអ៊ីស្រាអែលដទៃទៀតបានប្រកាសគាំទ្រការចេញដីកាចាប់ខ្លួននោះ។ ចំណាត់ការរបស់ ICC ទោះបីចាប់លោកណឺតាន់យ៉ាហ៊ូបានឬមិនបានមិនសំខាន់ទេ។ ប៉ុន្តែយ៉ាងហោចណាស់ក៏ធ្វើឱ្យលោកណឺតាន់យ៉ាហ៊ូធ្វើដំណើរដោយប្រយ័ត្នប្រយែងផងដែរ។
ជាគោលការណ៍អន្តរជាតិ សមាជិក ICC ចំនួន១២៤ប្រទេសមានកាតព្វកិច្ចចូលរួមសហការដើម្បីចាប់ខ្លួនលោកណឺតាន់យ៉ាហ៊ូដើម្បីយកទៅកាត់ទោសនៅទីក្រុងឡាអេ។ ប៉ុន្តែនាយករដ្ឋមន្ត្រីហុងគ្រីចេញមុខកាន់ជើងលោកណឺតាន់យ៉ាហ៊ូជាចំហ និងធ្វើផ្គើនដាក់ ICC មុនគេ។ គាត់ប្រកាសជាចំហថាគាត់នឹងអញ្ជើញលោកណឺតាន់យ៉ាហ៊ូទៅបំពេញទស្សនកិច្ចជាផ្លូវការនៅប្រទេសរបស់លោក។ មេដឹកនាំហុងគ្រីរូបនេះថែមទាំងប្រកាសថ្កោលទោសការចេញដីកានេះជាទម្ងន់។ លោកចាត់ទុកថានេះជាទង្វើឆ្កួតលេលារកលេខដាក់គ្មាន ហើយជារឿងនយោបាយសុទ្ធសាធ៕
ចែករំលែកព័តមាននេះ