រាជធានីភ្នំពេញ ៖ ក្រសួងសាធារណការ និងដឹកជញ្ជូន បានបញ្ជាក់ថា អត្រា នៃការប្រើប្រាស់រថយន្តអគ្គិសនី មានកើនយ៉ាងខ្លាំង ដោយគិតមកដល់បច្ចុប្បន្នមានជាង២ពាន់គ្រឿង បានចុះបញ្ជីផ្លូវការ…
រាជធានីភ្នំពេញ ៖ ក្រសួងសាធារណការ និងដឹកជញ្ជូន បានបញ្ជាក់ថា អត្រា នៃការប្រើប្រាស់រថយន្តអគ្គិសនី មានកើនយ៉ាងខ្លាំង ដោយគិតមកដល់បច្ចុប្បន្នមានជាង២ពាន់គ្រឿង បានចុះបញ្ជីផ្លូវការ នេះបើតាមអ្នកនាំពាក្យក្រសួងសាធារណការ និងដឹកជញ្ជូន ។
លោក ផន រឹម អ្នកនាំពាក្យក្រសួងសាធារណការ បានឲ្យដឹងនៅថ្ងៃទី២២ ខែវិច្ឆិកា ឆ្នាំ២០២៤ថា មកទល់ពេលនេះ នៅកម្ពុជា មានរថយន្តអគ្គិសនី ចុះបញ្ជីនៅក្រសួងសាធារណការ និងដឹកជញ្ជូន ចំនួន២,៣២៧គ្រឿង ក្នុងនោះរថយន្តអគ្គិសនីរបស់ក្រុមហ៊ុន BYD ចំនួន ៧៩០គ្រឿង ឈរលើកំពូលតារាង និងបន្តបន្ទាប់ ដោយរថយន្តអគ្គិសនីរបស់ក្រុមហ៊ុនតូយ៉ូតា ចំនួន៤៤៣គ្រឿង, រថយន្តអគ្គិសនីរបស់ក្រុមហ៊ុន Tesla ចំនួន២៦៩គ្រឿង និងរថយន្តអគ្គិសនីរបស់ក្រុមហ៊ុនផ្សេងៗទៀត ។
អ្នកនាំពាក្យ បានបញ្ជាក់ឲ្យដឹងដែរថា នៅក្នុងរយៈពេល៩ខែ ឆ្នាំ២០២៣ មានរថយន្តអគ្គិសនី ចុះបញ្ជីចំនួន ២០៣គ្រឿង ខណៈដែលរយៈពេលដូចគ្នានៅឆ្នាំ២០២៤ មានរថយន្តអគ្គិសនីចុះបញ្ជីចំនួន ១,៦៤៤គ្រឿង ដែលមានន័យថា រថយន្តអគ្គិសនី មានសន្ទុះកើនឡើង៧១០% ខណៈដែលទោចក្រយានកើនឡើង ៣៦៨% ដោយឡែកត្រីចក្រយានថយចុះ-១៥% ។
អ្នកនាំពាក្យ បានគួរបញ្ជាក់ថា កាលពីពេលថ្មីៗនេះ រាជរដ្ឋាភិបាលបានដាក់ចេញគោលនយោបាយជាតិ ស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ ដែលជាត្រីវិស័យ និងជាឧបករណ៍គោលនយោបាយរបស់រាជរដ្ឋាភិបាល ក្នុងការតម្រង់ទិស និងជំរុញការអភិវឌ្ឍវិស័យយានយន្តអគ្គិសនី នៅកម្ពុជា ។
អ្នកនាំពាក្យបញ្ជាក់ថា ៖ «រាជរដ្ឋាភិបាលផ្តល់សេរីភាព និងជម្រើសកាន់តែសំបូរបែប សម្រាប់ការប្រើប្រាស់យានយន្ត ដើម្បីសម្រួលការធ្វើដំណើរ ដឹកជញ្ជូនទំនិញ និងសេវាកម្មផ្សេងៗ។ ជាក់ស្តែង អត្រា នៃការប្រើប្រាស់យានយន្តកើនយ៉ាងខ្លាំង ជាពិសេសរថយន្ត អគ្គិសនី» ៕
ចែករំលែកព័តមាននេះ