រាជធានីភ្នំពេញ ៖ ប្រធានគណៈកម្មាធិការថវិកា នៃគណៈកម្មាធិការអចិន្ត្រៃយ៍សភា តំណាងប្រជាជនចិនទូទាំងប្រទេស បានបញ្ជាក់ថា ចិននៅតែបន្តជួយដល់កម្ពុជា ក្នុងការសម្រេចបាននូវការអភិវឌ្ឍរបស់ខ្លួនតាមស្ថានភាពជាក់ស្តែង និងបន្តជួយដល់កម្ពុជាតាមកាលៈទេសៈ ។…
រាជធានីភ្នំពេញ ៖ ប្រធានគណៈកម្មាធិការថវិកា នៃគណៈកម្មាធិការអចិន្ត្រៃយ៍សភា តំណាងប្រជាជនចិនទូទាំងប្រទេស បានបញ្ជាក់ថា ចិននៅតែបន្តជួយដល់កម្ពុជា ក្នុងការសម្រេចបាននូវការអភិវឌ្ឍរបស់ខ្លួនតាមស្ថានភាពជាក់ស្តែង និងបន្តជួយដល់កម្ពុជាតាមកាលៈទេសៈ ។
ការបញ្ជាក់បែបនេះ នៅក្នុងជំនួបពិភាក្សាការងាររវាងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានអនុញ្ញាតឱ្យគណៈប្រតិភូសភាតំណាងប្រជាជនចិន ដឹកនាំដោយ លោក ស៊ី ហុងឆាយ ប្រធានគណៈកម្មាធិការថវិកា នៃគណៈកម្មាធិការអចិន្ត្រៃយ៍សភា តំណាងប្រជាជនចិនទូទាំងប្រទេស នាព្រឹកថ្ងៃទី១៩ ខែវិច្ឆិកា ឆ្នាំ២០២៤ នៅវិមានរដ្ឋសភា ។
នៅក្នុងជំនួបលោក ស៊ី ហុងឆាយ បានគូសបញ្ជាក់យ៉ាងដូច្នេះថា ៖ «ភាគីទាំងពីរបានជំរុញធ្វើយ៉ាងណាឲ្យប្រទេសទាំងពីរ បានសម្រេចសម្រេចគោលដៅ នៃការអភិវឌ្ឍរៀងៗខ្លួន។ ហើយសភាទាំងពីរ បន្តធ្វើការគ្នាក្នុងការជំរុញ និងសម្រេចបាននូវទំនាក់ទំនងទ្វេរភាគីកម្ពុជា-ចិន ឲ្យកាន់តែស៊ីជម្រៅថែមទៀត ហើយចិននៅតែបន្តជួយដល់កម្ពុជា ក្នុងការសម្រេចបាននូវការអភិវឌ្ឍរបស់ខ្លួនតាមស្ថានភាពជាក់ស្តែង និងបន្តជួយដល់កម្ពុជាតាមកាលៈទេសៈ» ។
ក្នុងឱកាសនោះដែរ សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា មានប្រសាសន៍ថា ក្នុងដំណើរទស្សនកិច្ចរបស់គណបក្សប្រតិភូនៅពេលនេះ ដើម្បីពង្រឹងពង្រីកបន្តពូនជ្រុំ នៃទំនាក់ទំនងមិត្តភាពជាប្រពៃណីរបស់ប្រទេសកម្ពុជា-ចិន ពិសេសនោះ រដ្ឋសភា ដែលមានទំនាក់ទំនងកើនបានកើនឡើងមួយកម្រិតថែមទៀត។ លើសពីនេះ ធ្វើការទំនាក់ទំនង រៀនសូត្រពីគ្នាទៅវិញទៅមករវាង គណៈកម្មការជំនាញថវិការ ចិន និងគណៈកម្ម ការហិរញ្ញវត្ថុ របស់រដ្ឋសភាកម្ពុជា ដើម្បីធ្វើការ ចែករំលែកបទពិសោធនពីគ្នាទៅវិញទៅមក ។
សម្តេចប្រធានរដ្ឋសភា ក៏បានជឿជាក់ចំពោះការដឹកនាំរបស់ឯកឧត្តម ស៊ី ជិនពីង ប្រទេសចិន និងសម្រេចបានចក្ខុវិស័យរបស់ខ្លួននៅក្នុងឆ្នាំ២០៤៩ នៃក្លាយជាប្រទេសសង្គមនិយមទំនើប បែបចិនមានវប្បធម៌ចម្រុះ មានសុខដុមរនីយកម្ម ។
សម្តេចប្រធានរដ្ឋសភា បានបញ្ជាក់ពីទំនាក់ទំនងរបស់កម្ពុជា-ចិន ជាមិត្តដែកថែប ជាប្រពៃណី ដែលមានការរីកចម្រើនជាលំដាប់ ហើយនៅពេលថ្មីៗ នេះបានក្លាយជាមិត្តភាព គ្រប់ជ្រុងជ្រោយ ។
សម្តេចមហារដ្ឋសភាធិបតី ឃួន សុដារី បានគាំទ្រចំពោះគោលនយោបាយចិន តែមួយ ដូចជាបញ្ហានៅចិន បញ្ហានៅតៃវ៉ាន់ បញ្ហានៅទីបេ គឺជាបញ្ហាផ្ទៃក្នុងរបស់ចិន។ ដោយកម្ពុជា សូមប្រកាសប្រឆាំងដាច់ខាត ចំពោះការជ្រៀលជ្រែកក្នុងការបំបែបបំបាក់ផ្ទៃក្នុងប្រទេសចិន ។
សម្តេចប្រធានរដ្ឋសភា ក៏បានថ្លែងអំណរគុណដល់មិត្តចិន ដែលបានជួយក្នុងការអភិវឌ្ឍកម្ពុជាអស់ច្រើនឆ្នាំមកនេះ ហើយបន្តចូលរួមជាប្រចាំមកទៀត។ ការជួយរបស់ចិន ក៏បានជួយឲ្យកម្ពុជារក្សាឯកភាពខាងនយោបាយរបស់ខ្លួន និងបន្តអភិវឌ្ឍខ្លួន រក្សាសន្តិភាព បន្តទៀត។ នៅក្នុងន័យនេះ មិនមែនន័យថា កម្ពុជាមិនបានខិតខំដោយខ្លួនឯងនោះទេ គឺកម្ពុជា បានខិតខំក្នុងការអភិវឌ្ឍខ្លួនយ៉ាងខ្លាំងក្លា ហើយទទួលយកការជួយពីគ្រប់មិត្តទាំងអស់ ។
នៅក្នុងជំនួបនោះដែរ លោក ស៊ី ហុងឆាយ ប្រធានគណៈកម្មាធិការថវិកា នៃគណៈកម្មាធិការអចិន្ត្រៃយ៍សភា តំណាងប្រជាជនចិនទូទាំងប្រទេស បានប្រកាសគាំទ្រ ចំពោះប្រសាសន៍ សម្តេចប្រធានរដ្ឋសភា ពាក់ព័ន្ធនឹងទំនាក់ទំនងកម្ពុជា-ចិន ដែលមានក្នុងប្រវត្តិសាស្ត្រជា យូរណាស់មកហើយ និងបានកំពុងបន្តជួយជ្រុំជ្រែគ្នាទៅវិញទៅមក ក្នុងការអភិវឌ្ឍរៀងៗ ខ្លួន ។
លោកក៏បានថ្លែងអំណរគុណដល់កម្ពុជា ដែលតែងតែងគាំទ្រចំពោះបញ្ហាប្រទេសចិន មានបញ្ហាតៃវ៉ាន់ បញ្ហាឈូងសមុទ្រចិនខាងត្បូង និងបញ្ហាផ្សេងទៀត ។
នៅក្នុងជំនួបភាគីទាំងពីរ ក៏បានពិភាក្សាពីកិច្ចសហប្រតិបត្តិការជាច្រើនផ្សេងទៀត នៅក្នុងនោះក៏មានកិច្ចសហប្រតិបត្តិការត្បូងពេជ្រ គឺធ្វើយ៉ាងណាឲ្យចេញជាលទ្ធផល ដូចជា ជាក់ស្តែងការនាំចេញកសិផល ទៅកាន់ប្រទេសចិន ហើយការផ្លាស់ប្តូររវាងប្រជាជន និងប្រជាជនផងដែរ ៕
ចែករំលែកព័តមាននេះ