ផលិតផលអំបិលម៉ាកសម្គាល់ភូមិសាស្ត្រ ឬGI ដែលផលិតដោយប្រជាកសិករនៅខេត្តកែប និងកំពត កំពុងតែទាក់ទាញចំណាប់អារម្មណ៍នៅលើទីផ្សារអន្តរជាតិ ជាពិសេស គឺសហគមន៍អឺរ៉ុប និងជប៉ុន ដោយសារវាមានសារធាតុរ៉ែ និង…
ផលិតផលអំបិលម៉ាកសម្គាល់ភូមិសាស្ត្រ ឬGI ដែលផលិតដោយប្រជាកសិករនៅខេត្តកែប និងកំពត កំពុងតែទាក់ទាញចំណាប់អារម្មណ៍នៅលើទីផ្សារអន្តរជាតិ ជាពិសេស គឺសហគមន៍អឺរ៉ុប និងជប៉ុន ដោយសារវាមានសារធាតុរ៉ែ និង សមាសធាតុមួយចំនួន មានគុណតម្លៃសម្រាប់ការរៀបចំចំណីអាហារ ។
លោក ហេង សុគង់ អ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអោយដឹងថា អំបិលនេះត្រូវបានទទួលស្គាល់ និងវា.យតម្លៃពីសហគមន៍អឺរ៉ុប និងបណ្ដាប្រទេសមួយចំនួនទៀតនៅលើពិភពលោក ខណៈអ្នកជំនាញពិសោធន៍រកឃើញមានផ្ទុកនូវសារធាតុរ៉ែមានប្រយោជន៍រហូតជាង៨០ប្រភេទដែលមានសារសំខាន់ក្នុងការផ្សំគ្រឿងចំណីអាហារ ។
លោក ហេង សុគង់ បានអោយកម្មវិធីលុយនៃសារព័ត៌មានកោះសន្តិភាពដឹងថា «តាមការវាយតម្លៃអំបិល GI របស់ខេត្តកំពត ខេត្តកែប មានលក្ខណៈមិនរឹងពេក ហើយមិនប្រៃពេក ហើយអាចមានរសជាតិផ្អែមបន្តិចនៅក្នុងនោះដែរ ។ បើនិយាយអំពីអំបិលផ្អែម ប្រហែលជាយើងពិបាកជឿ តែយ៉ាងណាក៏ដោយតាមការវិភាគ និងវា.យតម្លៃយើងឃើញថា នៅក្នុងអំបិលខេត្តកំពត កែប របស់យើងនេះមានផ្ទុកដោយសារធាតុរ៉ែ» ។
លោក ហេង សុគង់ បន្ថែមថា បច្ចុប្បន្នអំបិល GI ផលិតនៅក្នុងខេត្តកំពត និងខេត្តកែប មានទីផ្សារនៅក្នុងសហគមន៍អឺរ៉ុប និងប្រទេសជប៉ុន ខណៈសហរដ្ឋអាម៉េរិក ចិន កូរ៉េខាងត្បូង និងប្រទេសអូស្ត្រាលីក៏កំពុងចាប់អារម្មណ៍លើអំបិល GI របស់កម្ពុជាផងដែរ ។
លោក ហេង សុគង់ បន្តថា «តម្លៃអំបិល GI ទម្ងន់៥០គីឡូក្រាម ត្រូវបានលក់ចេញក្នុងតម្លៃប្រមាណ៣ម៉ឺនរៀល ខណៈអំបិលធម្មតា មានតម្លៃប្រមាណ២ម៉ឺនរៀលប៉ុណ្ណោះក្នុង១បេ ទម្ងន់៥០គីឡូក្រាម» ។
បើតាមលោក ហេង សុគង់ បានអោយដឹងថា គិតត្រឹមចុងខែកញ្ញា ឆ្នាំ២០២៤ អំបិលដែលផលិតចេញពីខេត្តកំពត និងខេត្តកែប មានចំនួនជាង១៦ម៉ឺន៧ពាន់តោន និងបានលក់ចេញជាង៦ម៉ឺន៦ពាន់តោន ហើយនៅសល់ក្នុងស្តុកជាង១០ម៉ឺន១ពាន់តោន ។
តាមរយៈកំណើនយ៉ាងច្រើននេះ មន្ត្រីជាន់ខ្ពស់នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍វាយតម្លៃថា ទិន្នផលអំបិលនៅឆ្នាំនេះនឹងអាចឆ្លើយតបតាមតម្រូវការប្រើប្រាស់ក្នុងស្រុក ហើយកម្ពុជាក៏គ្មានផែនការនាំចូលអំបិលពីខាងក្រៅនោះដែរ ។
អំបិលកំពត និងកែប ត្រូវបានក្រសួងពាណិជ្ជកម្ម សម្រេចចុះបញ្ជីម៉ាកសម្គាល់ភូមិសាស្ត្រទំនិញ រួមគ្នាជាមួយផលិតផលកម្ពុជាពីរប្រភេទទៀត គឺទឹកត្រីកំពតកែប និងបង្កងតាកែវ នៅថ្ងៃទី២៦ មេសា ឆ្នាំ២០២៣ ក្នុងទិវាកម្មសិទ្ធិបញ្ញាពិភពលោក ។
បន្ទាប់ពីផលិតផលអំបិល កំពត និងកែប បានចុះបញ្ជីម៉ាកសម្គាល់ភូមិសាស្ត្រ កាលពីខែមេសា លោកកត់សម្គាល់ថា មានតែកសិករប្រមាណ១០ក្រុមប៉ុណ្ណោះ ដែលមានលទ្ធភាពផលិតតាមស្តង់ដារអំបិល GI ដោយសារការផលិតអំបិល GI ត្រូវការបច្ចេកទេសនៃការផលិតខ្ពស់ជាងអំបិលធម្មតា ខណៈបច្ចុប្បន្ននេះមានអ្នកផលិត៥ក្រុមហើយ ដែលដាក់បានពាក្យចូលជាសមាជិក សមាគមអ្នកផលិតម៉ាកសម្គាល់ភូមិសាស្ត្រទំនិញអំបិល កំពត-កែប ។ ខេត្តកំពត និងកែប គឺជាទីតាំងផលិតអំបិលក្នុងប្រទេសកម្ពុជា ដោយមានផ្ទៃដីសរុបប្រហាក់ប្រហែលជិត៥ពាន់ហិកតា ៕
ចែករំលែកព័តមាននេះ