រាជធានីភ្នំពេញ ៖ លោក ហ៊ុន សុរិទ្ធី អភិបាលរង រាជធានីភ្នំពេញ បានណែនាំដល់រដ្ឋបាលខណ្ឌឬស្សីកែវ ត្រូវបន្តរៀបចំសណ្តាប់ធ្នាប់ឱ្យបានល្អនៅតាមបណ្តោយផ្លូវជាតិលេខ៥ ពិសេសនៅតំបន់ប្រជុំជនមានរោងចក្រ…
រាជធានីភ្នំពេញ ៖ លោក ហ៊ុន សុរិទ្ធី អភិបាលរង រាជធានីភ្នំពេញ បានណែនាំដល់រដ្ឋបាលខណ្ឌឬស្សីកែវ ត្រូវបន្តរៀបចំសណ្តាប់ធ្នាប់ឱ្យបានល្អនៅតាមបណ្តោយផ្លូវជាតិលេខ៥ ពិសេសនៅតំបន់ប្រជុំជនមានរោងចក្រ និងផ្សារក្រមួន ដែលបង្កការកកស្ទះចរាចរណ៍រំខានដល់ការធ្វើដំណើររបស់ប្រជាពលរដ្ឋ ។
លោកអភិបាលរង បានថ្លែងដូច្នេះក្នុងឱកាសអញ្ជើញជាតំណាងលោក ឃួង ស្រេង អភិបាលរាជធានីភ្នំពេញ ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ អាណត្តិទី៤ នៅខណ្ឌឬស្សីកែវ នាព្រឹកថ្ងៃទី៥ ខែវិច្ឆិកានេះ ក្រោមអធិបតីភាពលោក ជួប ខុន សមាជិកក្រុមប្រឹក្សារាជធានីភ្នំពេញ តំណាងលោក ម៉ប់ សារិន ប្រធានក្រុមប្រក្សារាជធានីភ្នំពេញ ។
នៅក្នុងឱកាសនោះ លោក ហ៊ុន សុរិទ្ធី បានថ្លែងថា នៅមុខរោងចក្រចំនួន២ តាមបណ្តោយផ្លូវជាតិលេខ៥ ក្នុងតំបន់ខណ្ឌឬស្សីកែវ មានការលក់ ដូចមិនអចិន្ត្រៃយ៍ ដែលបង្កឱ្យមាការកកស្ទះចរាចរណ៍ខ្លាំង នៅវេលាម៉ោង១១ថ្ងៃត្រង់ និងម៉ោង១៧ល្ងាច ដែលរំខានដល់ការធ្វើដំណើររបស់ប្រជាពលរដ្ឋ ខណៈពេលវេលានោះមានចរាចរណ៍មមាញឹក ។
លោកបានណែនាំឱ្យបន្តការរៀបចំសណ្តាប់ធ្នាប់នៅលើទីតាំង នេះបានល្អប្រសើរថែមទៀត កុំឱ្យលក់ដូរហៀមកលើទ្រូងផ្លូវ ដែលធ្វើឱ្យស្ទះចរាចរណ៍ និងបង្កគ្រោះថ្នាក់ចរាចរណ៍ផងដែរ ។
នៅក្នុងពិធីនេះ លោកអភិបាលរង ក៏បានដោះស្រាយភ្លាមៗ ចំពោះបញ្ហា និងសុំណូមពរផ្ទាល់ចំនួន ៣ របស់ប្រជាពលរដ្ឋ ដែលបានលើកឡើងក្នុងវេទិកាសាធារណៈនេះ ដូចជាការត្រៀមសិក្សាស្ថាបនាផ្លូវថ្មីមួយខ្សែ នៅមុខវិទ្យាល័យជាស៊ីមចំរើនរដ្ឋ រួមទាំងការតម្លើងម៉ាស៊ីនបូមទឹកចំនួន២កន្លែង ដើម្បីបូមបញ្ជៀសការជនន់លេចដោយជំនន់ទឹកភ្លៀង។ ដោះស្រាយបញ្ហាបង្គោលភ្លើង នៅតំបន់ភូមិក្រោលគោ ក្នុងសង្កាត់គីឡូម៉ែត្រ៦ និងការរៀបចំសណ្តាប់ធ្នាប់ឱ្យបាល្អនៅជុំវិញផ្សារច្រាំងចំរេះ ។
លោកបានបន្តថា ចំពោះបញ្ហា និងសំណូមពរជាលាយលក្ខអក្សរបស់បងបង្អូនប្រជាពលរដ្ឋចំនួន២៨ ច្បាប់ និងបញ្ហាផ្សេងៗទៀត ដែលពាក់ព័ន្ធនឹងជីវប្រចាំថ្ងៃរបស់ប្រជាពលរដ្ឋ រដ្ឋបាលរាជធានីភ្នំពេញ នឹងយកទៅពិភាក្សា និងធ្វើការកែលម្អ ដោះស្រាយជូនប្រជាពលរដ្ឋឱ្យចំទិសដៅ ដើម្បីលើកកម្ពស់គុណភាព និងជីវភាពរស់នៅរបស់ប្រជាពលរដ្ឋ នៅរាជធានីភ្នំពេញ ពិសេសប្រជាពលរដ្ឋក្រីក្រ ដែលជួបការលំបាកនៅតាមមូលដ្ឋានភូមិ សង្កាត់ និងខណ្ឌ ។
លោក ជិន ប៊ុនធឿន អភិបាលខណ្ឌឬស្សីកែវ បានថ្លែងថា ចំពោះសំណូមពរ និងបញ្ហា ដែលប្រជាពលរដ្ឋបានឡើកឡើង អាជ្ញាធរខណ្ឌនឹងខិតខំដោះស្រាយកែលម្អឱ្យកាន់តែល្អប្រសើរថែមទៀត ចំពោះបញ្ហាសណ្តាប់ធ្នាប់នៅជុំវិញផ្សារច្រាំងចំរេះ និងតាមបណ្តោយផ្លូវជាតិលេខ៥ នឹងត្រូវដាក់កម្លាំងសន្តិសុខផ្សារ និងកម្លាំងប្រជាការពារ ចាំសម្រួលចរាចរណ៍ ដើម្បីកុំឱ្យមានការកកស្ទះនៅលើផ្លូវនេះ ។
លោក ជួប ខុន សមាជិកក្រុមប្រឹក្សារាជធានីភ្នំពេញ បានថ្លែងថា ការរៀបចំឱ្យមានវេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនេះ គឺជាការអនុវត្តតាមច្បាប់ ស្តីពីការគ្រប់គ្រងរាជធានី ខេត្ត ក្រុង ស្រុក ខណ្ឌ ដើម្បីបានដឹង ពីសុខទុក្ខ និងតម្រូវការចងបាននានារបស់ប្រជាពលរដ្ឋនៅមូលដ្ឋាន ហើយបន្ទាប់ពីក្តាប់បាននូវរាល់បញ្ហាប្រឈម និងតម្រូវការពីប្រជាពលរដ្ឋហើយនោះ នឹងយកបញ្ហាទាំងនោះ មកដោះស្រាយជូនប្រជាពលរដ្ឋឱ្យបានទាន់ពេលវេលា ។
សូមបញ្ជាក់ថា វេទិកាផ្សព្វផ្សាយពិគ្រោះយោបល់របស់ក្រុមប្រឹក្សារាជធានីភ្នំពេញ បានផ្តល់ឱ្យប្រជាពលរដ្ឋចូលរួមនៅក្នុងដំណើរការអភិបាលកិច្ចល្អ និងការលើកកម្ពស់គណនេយ្យភាព តម្លាភាព ក្នុងដំណើរការផ្តល់សេវាជូនប្រជាពលរដ្ឋនៅថ្នាក់រាជធានី ខណ្ឌ សង្កាត់ ក្នុងគោលបំណងដើម្បីធានាថា រាល់ បញ្ហាអាទិភាពរបស់ប្រជាពលរដ្ឋត្រូវបានពិនិត្យដោះស្រាយ និងឆ្លើយតបយ៉ាងមានសិទ្ធិភាព ៕
ចែករំលែកព័តមាននេះ