រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឲ្យរដ្ឋមន្ត្រីក្រសួងអប់រំ យុវជន និងកីឡា រៀបចំបណ្តាល័យសម្រាប់ដាក់និក្ខេបបទរបស់និស្សិត…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឲ្យរដ្ឋមន្ត្រីក្រសួងអប់រំ យុវជន និងកីឡា រៀបចំបណ្តាល័យសម្រាប់ដាក់និក្ខេបបទរបស់និស្សិត ដើម្បីឲ្យនិស្សិតជំនាន់ក្រោយ ងាយស្រួលធ្វើការសិក្សាស្រាវជ្រាវ ។
ថ្លែងក្នុងពិធីប្រគល់វិញ្ញាបនបត្រ និងសញ្ញាបត្រ ជូនដល់សិក្ខាកាម និងនិស្សិត សាកលវិទ្យាល័យធនធានមនុស្ស នាព្រឹកថ្ងៃទី២៦ ខែធ្នូ ឆ្នាំ២០២៤ នៅវិទ្យាស្ថានជាតិអប់រំ សម្តេចបវរធិបតី នាយករដ្ឋមន្ត្រី បានបញ្ជាក់យ៉ាងដូច្នេះថា ៖ «ខ្ញុំសុំឲ្យឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ ពិនិត្យមើលពិនិត្យមើលលទ្ធភាព«…» និស្សិតដែលបញ្ចប់ការសិក្សាបានសរសេនិក្ខេបបទ ប៉ុន្តែឥឡូវនេះ បើសួរកន្លែងណាមួយ ដែលមានទុកនិក្ខេបបទដែលនិស្សិតរាប់ពាន់នាក់សរសេ គឺអត់មានទេ» ។
សម្តេចបវរធិបតី បានបន្តថា នៅបណ្តាប្រទេសមួយចំនួន គេបានបង្កើតបណ្ណាល័យ ដើម្បីទុកនិក្ខេបបទរបស់និស្សិត ដើម្បីឲ្យនិស្សិតជំនាន់ក្រោយធ្វើការសិក្សាស្រាវជ្រាវ ឬធ្វើការអាប់ដេតឲ្យល្អប្រសើរជាងមុន នៅពេលសរសេពេលក្រោយ ។
សម្តេចបវរធិបតី បានបញ្ជាក់ថា ៖ «អ៊ីចឹងនៅពេលបង្កើតបណ្តាល័យ ដើម្បីដាក់និក្ខេបបទនោះ នៅពេលនិស្សិតក្រោយ នៅពេលដែលគាត់ចូលបណ្ណាល័យ គាត់នឹងឃើញនិក្ខេបបទ ហើយគាត់អាចសិក្សាស្រាវជ្រាវបាន។ ឥឡូវ គួរតែរៀបជាយន្តការថ្នាក់ជាតិមួយ ហើយឲ្យមានការចូលរួមពីនិស្សិត ដោយដាក់កម្មសិទ្ធបញ្ញា។ ខ្ញុំថា និស្សិតមិនចិត្តអាក្រក់ទេ ក្នុងការចែករំលែង នូវដែលខ្លួនធ្វើ» ។
សម្តេចបវរធិបតី បានឲ្យក្រសួងអប់រំ ធ្វើការពិនិត្យមើល និងពិគ្រោះយោបល់ ជាមួយសកលវិទ្យាល័យផ្សេងៗ ដើម្បីបង្កើតជាបណ្ណាល័យ ឬមជ្ឈមណ្ឌលព័ត៌មានមួយ សម្រាប់ធ្វើការស្រាវជ្រាវ។ និក្ខេបបទរាប់ឆ្នាំមកនេះ ប្រហែលជាមានរាប់ម៉ឺននិក្ខេបទបទ ដូច្នេះយើងដាក់នៅកន្លែងណាមួយ សម្រាប់ដាក់និក្ខេបបទចាស់ៗ ព្រោះវាជាកិច្ចការសំខាន់សម្រាប់ចងក្រងធ្វើជាមូលដ្ឋាន និងនិន្នន័យ ។
សម្តេចបវរធិបតី នាយករដ្ឋមន្ត្រី បានបញ្ជាក់ថា ៖ «អ៊ីចឹង ខ្ញុំគិតថា កិច្ចការនេះ គួរតែពិនិត្យរៀបចំ ដើម្បីយើងបន្តទៀត ព្រោះនិស្សិតភាគច្រើនថ្នាក់បរិញ្ញាបត្រជាន់ខ្ពស់ សុទ្ធតែសរសេនិក្ខេបបទ ។ «…»ការធ្វើបែបនេះ មានភាពងាយស្រួល បើសិនចង់ស្រាវជ្រាវប្រធានបទ អ្វីមួយយើងចូល ក្នុងលីស ឬនៅពេលមានអ៊ីនធើណែត ចូលទៅឃើញរាប់លីសទាំងអស់។ និក្ខេបបទមានប្រហាក់ប្រហែលនឹងអាចមកស្រាវជ្រាវបាន» ។
ជាមួយគ្នានោះដែរ សម្តេចបវរធិបតី ហ៊ុន ម៉ាណែត បានលើកឡើងថា អ្វីដែលសំខាន់បំផុតនោះគឺ បណ្តុំ នៃស្នាដៃនិស្សិតខ្មែរយើង មិនថា នៅរាជធានីភ្នំពេញ ឬនៅខេត្តទៅរៀននៅក្រៅប្រទេស សរសេរនិក្ខេបបទនៅក្រៅប្រទេសក៏ដោយ គួរយកមួយច្បាប់ ដាក់ក្នុងបណ្ណាល័យ ។ ការធ្វើបែប នេះ ជាផល នៃការចែករំលែកគ្នា ដើម្បីធ្វើការកែសម្រួល ឬធ្វើឲ្យប្រសើរ ។
ការលើកឡើងរបស់សម្តេចបវរធិបតី ហ៊ុន ម៉ាណែត បន្ទាប់ពីសម្តេច បានជជែកជាមួយនិស្សិតមួយចំនួន ដែលចង់សរសេរនិក្ខេបបទ ហើយត្រូវយកឯកសារនៅកន្លែងណាបាន ៕
ចែករំលែកព័តមាននេះ