រាជធានីភ្នំពេញ ៖ អ្នកនាំពាក្យរងក្រសួងមហាផ្ទៃបានគូសបញ្ជាក់ថា សាររបស់ពួកក្រុមជ្រុលនិយមនេះ គឺជាសារស្រមើលស្រមៃដែលចេញពីរបៀបវារៈនយោបាយដ៏ពិសពុលបាត់បង់ភាពជាមនុស្សនោះទេ ។ លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ…
រាជធានីភ្នំពេញ ៖ អ្នកនាំពាក្យរងក្រសួងមហាផ្ទៃបានគូសបញ្ជាក់ថា សាររបស់ពួកក្រុមជ្រុលនិយមនេះ គឺជាសារស្រមើលស្រមៃដែលចេញពីរបៀបវារៈនយោបាយដ៏ពិសពុលបាត់បង់ភាពជាមនុស្សនោះទេ ។
លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានលើកឡើងថា អ្នកនៅក្រៅប្រទេស ដែលបានបញ្ចេញសារប្រមាថមាក់ងាយមកលើថ្នាក់ដឹកនាំកម្ពុជាជាហូរហែរនៅក្នុងរយៈពេលចុងក្រោយនេះ គឺគ្មានសីលធម៌នៅក្នុងខ្លួនទាល់តែសោះ ។
ការលើកឡើង ទៅកាន់ក្រុមប្រឆាំងជ្រុលនិយមនិរទេសខ្លួននៅបរទេសនេះដោយសារពួកគេបានបង្កើតសារ និងព័ត៌មានក្លែងក្លាយមួលបង្កាច់ដល់អាយុជីវិតថ្នាក់ដឹកនាំក្រសួង និងប្រមុខរាជរដ្ឋាភិបាលកម្ពុជា ។
អ្នកនាំពាក្យរងក្រសួងមហាផ្ទៃបានលើកឡើង កាលពីថ្ងៃ២៦ ធ្នូ ឆ្នាំ២០២៤ថា ពួកគេបង្កើតសារមួលបង្កាច់ដល់អាយុជីវិតដល់ថ្នាក់ដឹកនាំក្រសួងមហាផ្ទៃ និងរាជរដ្ឋាភិបាលនេះ គឺមានចរិកអមនុស្សធម៌ អគុណធម៌ គ្មានសីលធម៌ គឺសមជាមនុស្សនោះទេ ហើយក៏គ្មានក្រមសីលធម៌សមជាអ្នកនយោបាយទាល់តែសោះដែរ ។
លោកបញ្ជាក់ថា «សារនេះ គឺជាសារអសីលធម៌បំផុតមានលក្ខណៈប្រមាថមើលងាយអាយុជីវិតរបស់ថ្នាក់ដឹកនាំមួយរូប ហើយខ្ញុំ និងថ្នាក់ដឹកនាំដទៃទៀត កំពុងតែធ្វើការងារជាមួយលោក (លោក ស ថេត)ទាំងការងារផ្ទាល់ និងការងារជជែកតាមទូរស័ព្ទដៃជាមួយលោក ។ និយាយឲ្យខ្លីសារនេះ សូម្បីតែរូបចម្លាក់ក៏មិនជឿផងមិនចាំបាច់រហូតដល់ក្មេងថ្នាក់មតេយ្យមិនជឿ សូម្បីតែរូបចម្លាក់ក៏មិនជឿលើសារអសីលធម៌របស់បុគ្គលនេះដែរ» ។
ចំពោះសារដាក់ថា មន្ត្រីជាន់ខ្ពស់របស់ក្រសួងមហាផ្ទៃ១០រូបដែលពួកគេមិនគាំទ្រឯកឧត្តមឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃនឹងត្រូវដកហូតតំណែងដោយសារតែមិនទុកចិត្ត បណ្ឌិត ទូច សុឃៈ ច្រានចោលថា ជារឿងមិនពិតនោះទេ ព្រោះក្នុងក្រសួងគ្មានការបែកចែកបក្ខពួកនោះទេ គឺរួមគ្នាធ្វើការជាគ្រួសារក្រសួងមហាផ្ទៃតែមួយ និងជាកោសិការបស់រាជរដ្ឋាភិបាលក្រោមការដឹកនាំរបស់សម្តេចមហាធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដោយគ្មានមនុស្សរបស់បុគ្គលនេះ បុគ្គលនោះទេ ។ អ្នកនាំពាក្យបន្តថា សាររបស់ពួកក្រុមជ្រុលនិយមនេះ គឺជាសារស្រមើលស្រមៃដែលចេញពីរបៀបវារៈនយោបាយដ៏ពិសពុលបាត់បង់ភាពជាមនុស្ស ៕
ចែករំលែកព័តមាននេះ