ខេត្ត​បន្ទាយមានជ័យ ៖ ជនជាតិថៃ​ប្រុសស្រី២នាក់កំពុងជិះម៉ូតូឌុបគ្នា ត្រូវឃាតករបាញ់ប្រហាតាមផ្លូវ ​បណ្តាល​ឱ្យបុរសជាអ្នកបើកបរម៉ូតូរងរបួសធ្ងន់ ក្រោយបញ្ជូនដល់មន្ទីពេទ្យ ក៏បានស្លាប់ ​ចំណែកស្ត្រីជាអ្នករួមដំណើរបានរត់គេចខ្លួន រួចផុតពីគ្រោះថ្នាក់ ។​

ហេតុការណ៍ខាងលើនេះ បានបង្កការភ្ញាក់ផ្អើល​កើតឡើងកាលពីវេលា​យប់ថ្ងៃទី២៦ ខែធ្នូ ឆ្នាំ២០២៤ នៅតាមផ្លូវស្ថិតភូមិប៉ាលិលេយ្យពីរ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។

ប្រជាពលរដ្ឋ​​​​បាន​ឱ្យដឹងថា ​មុនពេលកើតហេតុ ពួកគាត់ឮស្នូរផ្ទុះអាវុធប្រាវ ​ស្មានតែ​គេដុតផាវ ក៏ស្ទុះចេញមកមើល ស្រាប់តែ​ឃើញជនរងគ្រោះម្នាក់ដេកសន្លប់ស្តូកស្តឹងក្នុងថ្លុកឈាម​រងរបួសធ្ងន់​​ធ្ងរ ​ចំណែកម្នាក់ទៀតរត់ស្រែកអោយគេជួយ ។ ​ជនរងគ្រោះទាំង២នាក់ជិះម៉ូតូ១គ្រឿងម៉ាក​ហ្ស៊ូមើអិច ។​

ប្រជាពលរដ្ឋបានបញ្ជាក់ថា ជនរងគ្រោះដែលរង​របួសធ្ងន់ ត្រូវបានអ្នករួមដំណើរជួយ​ដឹកបញ្ជូនទៅកាន់គ្លីនិកឯកជនមួយកន្លែង​នៅក្បែរកន្លែងកើតហេតុ តែដោយសារ​ស្ថានភាពជនរងគ្រោះធ្ងន់ធ្ងរត្រូវបានគ្រូពេទ្យនៅគ្លីនិកឯកជន អោយបញ្ជូនបន្ត​ទៅមន្ទីពេទ្យបង្អែកក្រុងប៉ោយប៉ែត(ដីថ្មី)ដើម្បីសង្គ្រោះបន្ទាន់ដែរ ប៉ុន្តែជា​អកុសលជនរងគ្រោះ​បានស្លាប់ទៅហើយ ។

ប្រជាពលរដ្ឋបានបញ្ចាក់ថា នៅពេលដែលឃាតករបាញ់ទៅលើជនរងគ្រោះ​កំពុង​ជិះម៉ូតូមួយគ្រឿង​ម៉ាកហ្ស៊ូមមើអ៊ិច ក្នុងចំណោម២នាក់ មានម្នាក់ជា​ស្ត្រីជនជាតិថៃ ពេលជិៈម៉ូតូតាមផ្លូវត្រូវបានឃាតករ២នាក់ជិៈម៉ូតូ១គ្រឿងតាមក្រោយ ហើយបាញ់ប្រហារទៅលើជនរងគ្រោះម្នាក់ជាបុរសជាអ្នកបើកបរម៉ូតូ បណ្តាលឱ្យរងរបួសធ្ងន់ ក្រោយបញ្ជូនដល់មន្ទីពេទ្យបានស្លាប់ និងម្នាក់ទៀតរត់គេចខ្លួនរួចផុតពីគ្រោះថ្នាក់ ។ បើតាម​ការសន្និដ្ឋានអាចជនជាតិថៃបាញ់ប្រហាគ្នារឿងគំនុំ ៕