តែងតាំងលោក លីវ វណ្ណថេង ជាអភិបាលស្រុកល្វាឯម ជំនួសលោក កន សុខកាយ ដែលត្រូវបញ្ចប់តំណែង
ខេត្តកណ្តាល ៖ លោក លីវ វណ្ណថេង បច្ចុប្បន្នជាអភិបាលរង ស្រុកកៀនស្វាយ នៃខេត្តកណ្តាល អតីតជាចៅសង្កាត់ព្រែកថ្មី ខណ្ឌច្បារអំពៅ…
ខេត្តកណ្តាល ៖ លោក លីវ វណ្ណថេង បច្ចុប្បន្នជាអភិបាលរង ស្រុកកៀនស្វាយ នៃខេត្តកណ្តាល អតីតជាចៅសង្កាត់ព្រែកថ្មី ខណ្ឌច្បារអំពៅ ពេលនេះ ត្រូវបានរាជរដ្ឋាភិបាល តែងតាំងជាអភិបាលស្រុកល្វាឯម ខេត្តកណ្ដាល ជំនួសលោក កន សុខកាយ ដែលត្រូវបញ្ចប់តំណែង ក្រោយយកលុយ ចំនួន៣០ម៉ឺនដុល្លារ ទៅឲ្យគ្រូមា លី សាម៉េត ព្រោះតែចង់ធ្វើជាអភិបាលក្រុងអរិយក្សត្រ ។
សូមរម្លឹកថា សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី៨ ខែតុលា ឆ្នាំ២០២៤ បានចេញអនុក្រឹត្យ បញ្ចប់តំណែងលោក កន សុខកាយ ពីអភិបាលស្រុកល្វាឯម ខេត្តកណ្តាល ។
យោងតាមអនុក្រឹត្យ ឱ្យដឹងថា មូលហេតុ នៃការដកដំណែងនេះ គឺដោយសារតែលោក កន សុខកាយ បានប្រព្រឹត្តកំហុសក្រមសីលធម៌ និងវិជ្ជាជីវៈ ធ្ងន់ធ្ងរ ផ្ទុយនឹងច្បាប់ ស្តីពីសហលក្ខន្តិកៈ មន្ត្រីរាជការស៊ីវិល នៃព្រះរាជាណាចក្រកម្ពុជា ។
ហើយការដកតំណែងអភិបាលស្រុកល្វាឯមរូបនេះ បានកើតមានឡើង ក្រោយសម្តេចតេជោ ហ៊ុន សែន បានបង្ហោះសារលើបណ្តាញសង្គមទាក់ទងនឹងបុគ្គលឈ្មោះ លី សាម៉េត ហៅគ្រូមា ដែលបានធ្វើសកម្មភាពយកឈ្មោះសម្ដេច ទៅបោកប្រាស់ប្រាក់ពីប្រជាពលរដ្ឋជាច្រើននាក់។ ក្នុងចំណោមអ្នក ដែលចាញ់បោកទាំងនោះ ក៏មានលោក កន សុកាយ ផងដែរ ។
បើតាមសារសម្តេចតេជោ ហ៊ុន សែន បានឱ្យដឹងថា លោក កន សុខកាយ បានផ្ញើវីដេអូជូនសម្តេច ថា លោក លី សាម៉េត បានយកប្រាក់ពីគាត់ចំនួន ៣០ម៉ឺនដុល្លារ ដើម្បីរត់ការបានតំណែងជាអភិបាលក្រុងអរិយក្សត្រ ៕
ចែករំលែកព័តមាននេះ