ខេត្តកំពង់ចាម ៖ ដោយសារតែព្រះវិហារសាងសង់ពីបេតុងប្រក់ក្បឿង មានសភាពចាស់ទ្រុឌទ្រោមនៅក្នុងបរិវេណវត្តជ្រោយថ្ម នៅប្របតាមដងទន្លេមេគង្គ ក្នុងសង្កាត់បឹងកុក ក្រុងកំពង់ចាម មានអាយុកាលជាង៨០ឆ្នាំមកហើយ ។ ក្រោមការផ្ដួចផ្ដើមពីសំណាក់ឯកឧត្តម…
ខេត្តកំពង់ចាម ៖ ដោយសារតែព្រះវិហារសាងសង់ពីបេតុងប្រក់ក្បឿង មានសភាពចាស់ទ្រុឌទ្រោមនៅក្នុងបរិវេណវត្តជ្រោយថ្ម នៅប្របតាមដងទន្លេមេគង្គ ក្នុងសង្កាត់បឹងកុក ក្រុងកំពង់ចាម មានអាយុកាលជាង៨០ឆ្នាំមកហើយ ។ ក្រោមការផ្ដួចផ្ដើមពីសំណាក់ឯកឧត្តម ខ្លូត ផន ប្រធានក្រុមប្រឹក្សាខេត្ត ឯកឧត្តមអ៊ុន ចាន់ដា អភិបាលខេត្តនិងលោកជំទាវ បានរៀបចំបុណ្យកឋិនទានសាមគ្គីមួយ ដើម្បីបានបច្ច័យសម្រាប់សាងសង់ព្រះវិហារថ្មី ។
ព្រះគ្រូលេខ ឧត្តមបញ្ញា ព្រះចៅអធិការវត្តជ្រោយថ្មមានថារៈដីកាឲ្យដឹង កាលពីល្ងាចថ្ងៃទី៣ វិច្ឆិកា ឆ្នាំ២០២៤ថា តាមរយៈការអំពាវនាវរបស់អាជ្ញាធរខេត្ត គឺមានបងប្អូនប្រជាពលរដ្ឋរស់នៅក្នុងក្រុងកំពង់ចាមមន្ត្រីរាជការនៅតាមអង្គភាពនានា ព្រមទាំងអ្នកនៅក្រៅខេត្តបានចូលរួមយ៉ាងផុលផុស ក្នុងពិធីបុណ្យអង្គកឋិនទានសាមគ្គីក្រោមការលួចផ្ដើមរបស់ថ្នាក់ដឹកនាំខេត្ត ។ ក្នុងនោះ មានពុទ្ធបរិស័ទនៅគ្រប់ទិសទីរួមទាំងក្រៅប្រទេសដែលមិនបានអញ្ជើញមក ក៏បានផ្ញើបច្ច័យចូលបុណ្យតាមសទ្ធាជ្រះថ្លារៀងៗខ្លួន បានដង្ហែចូលនាព្រឹកថ្ងៃទី២ វិច្ឆិកា ២០២៤ ។
ព្រះចៅអធិការវត្តជ្រោយថ្មមានថេរដីការំលឹកថា ទីអារាមនេះ ត្រូវបានកសាងឡើងក្នុងអំឡុងឆ្នាំ១៩៤១ ក្នុងសម័យអាណានិគមនិយមបារាំង ដោយឆ្លងកាត់ពីសម័យមួយទៅសម័យមួយ គឺមានការប្រែប្រួល ។ ជាក់ស្ដែង ក្នុងរបបប្រល័យពូជសាសន៍ប៣ឆ្នាំ៨ខែ និង២០ថ្ងៃ ព្រះវិហារកសាងអំពីបេតុងប្រក់ក្បឿងត្រូវបានគេយកធ្វើជាឃ្លាំងដាក់សម្ភារ និងអំបិល កត្តាបែបនេះហើយដែលធ្វើឲ្យគ្រឹះផ្នែកខាងក្រោមព្រះវិហារត្រូវបានពុកផុយ នឹងបង្កហានិភ័យខ្លាចគ្រោះថ្នាក់ដល់ពុទ្ធបរិស័ទ ទើបសម្រេចចិត្តបិទទ្វារចោល រង់ចាំតែថ្ងៃវាយចោលប៉ុណ្ណោះ ដើម្បីកសាងថ្មីជំនួស ។
ដោយបង្ការចៀសវាងកុំឲ្យគ្រោះថ្នាក់ណាមួយកើតឡើងនោះ គណៈកម្មការវត្តបានធ្វើការពិភាក្សាជាមួយស្ថាប័នជំនាញមន្ទីរវប្បធម៌ និងវិចិត្រសិល្បៈខេត្ត ធ្វើការវាយតម្លៃដោយទទួលស្គាល់ថា ព្រះវិហារចាស់នេះពិតជាមានសភាពទ្រុឌទ្រោមមែន ដែលតម្រូវឲ្យមានការកសាងព្រះវិហារថ្មីមានទទឹង១៨ម៉ែត្រ និងបណ្ដោយ៤៤ម៉ែត្រ កំពស់ពីរជាន់ប្រក់ក្បឿងគ្រោងចំណាយបច្ច័យអស់ចំនួន១លានដុល្លារ និង១៨ម៉ឺនដុល្លារ ។
ព្រះគ្រូឧត្តមបញ្ញា ចៅអធិការវត្តជ្រោយថ្មមានថារដីកាបញ្ជាក់ថា សម្រាប់អង្គកឋិនទានសាមគ្គីក្រោមការផ្ដួចផ្ដើមពីសំណាក់ឯកឧត្តមអភិបាលខេត្តគឺប្រមូលបច្ច័យបានសរុបចំនួនជាង៧ម៉ឺនដុល្លារអាមេរិក ។
ហើយនៅខែមីនាឆ្នាំ២០២៥ខាងមុខ និងរៀបចំបុណ្យផ្កាសាមគ្គីមួយទៀត ពេលនោះ ដែលមានបច្ច័យសមល្មមអាចលៃលក វាយព្រះវិហារចាស់ចោល ដើម្បីកសាងព្រះវិហារថ្មី ។ ហើយការកសាងនេះ នឹងធ្វើឡើងតាមដំណាក់កាល គឺបច្ច័យដែលមាននៅក្នុងដៃ ព្រោះថាសព្វថ្ងៃនេះវិបត្តិសេដ្ឋកិច្ចសកលបានកើតឡើង មិនអាចស្រូតការស្ថាបនាឲ្យរួចរាល់ឆាប់រហ័សបាននោះទេ គឺធ្វើឡើងតាមដំណាក់កាលនីមួយៗ។
ចែករំលែកព័តមាននេះ