ទីក្រុងតេអេរ៉ង់៖ ថ្នាក់ដឹកនាំអ៊ីរ៉ង់តាមដឹងមកថាកំពុងបន់ព្រះសំពះទេវតាដើម្បីកុំឱ្យលោកត្រាំមានជ័យជម្នះនៅក្នុងការបោះឆ្នោតនាថ្ងៃទី៥ ខែវិច្ឆិកាខាងមុខនេះឱ្យសោះ។ មិនត្រឹមតែអ៊ីរ៉ង់ទេ សូម្បីតែសម្ព័ន្ធមិត្តរបស់អ៊ីរ៉ង់ក៏ប្រាថ្នាឱ្យលោកត្រាំចាញ់ឆ្នោតដែរព្រោះពួកគេបារម្ភថាបើលោកត្រឡប់មកសេតវិមានសាជាថ្មី លោកនឹងកាន់ជើងអ៊ីស្រាអែលយ៉ាងពេញទំហឹង។
បើដូច្នេះមែន អ៊ីស្រាអែលនឹងវាយប្រហារតំបន់ហ្កាហ្សា, លីបង់ និងកន្លែងដទៃទៀតកាន់តែខ្លាំង។ លទ្ធផលស្ទង់មតិថ្មីៗនេះបង្ហាញថាលោកត្រាំ និងលោកស្រីហារីសទទួលបានសំឡេងប្រហាក់ប្រហែលគ្នា។ មានន័យថាពិបាកនឹងព្យាករដឹងថាតើនរណានឹងមានជ័យជម្នះនៅក្នុងការបោះឆ្នោតលើកនេះ។ ពេលខ្លះលោកត្រាំទទួលបានសំឡេងតិចជាងលោកស្រីហារីស។
ទោះជាយ៉ាងណាក្ដី ថ្នាក់ដឹកនាំអ៊ីរ៉ង់ រួមជាមួយថ្នាក់ដឹកនាំក្រុមប្រទេសនៅតំបន់មជ្ឈិមបូព៌ាដូចជាលីបង់, អ៊ីរ៉ាក់ និងយេម៉ែនជាដើមនៅតែមិនទាន់ស្ងប់ចិត្ត និងជឿជាក់ត្រឹមតែលទ្ធផលស្ទង់មតិទេ។ ពួកគេរង់ចាំអ៊ុតលទ្ធផលបោះឆ្នោតជាក់ស្ដែងតែម្ដងទើបដឹងច្បាស់ជាង។ ពួកគេនៅតែបារម្ភថាលោកត្រាំអាចនឹងឈ្នះឆ្នោត ហើយអាចនឹងធ្វើឱ្យពួកគេឈឺក្បាលសាជាថ្មី។
កង្វល់ដ៏ធំបំផុតរបស់អ៊ីរ៉ង់នៅត្រង់ថាបើលោកត្រាំឡើងមកកាន់អំណាចវិញ គាត់នឹងកាន់ជើងលោកណឺតាន់យ៉ាហ៊ូយ៉ាងប្ដូរផ្ដាច់។ ហេតុនេះ លោកណឺតាន់យ៉ាហ៊ូកាន់តែបានចិត្ត ហើយកាន់តែជិះសេះលែងដៃ។ គាត់អាចនឹងវាយប្រហារទីតាំងនុយក្លេអ៊ែររបស់អ៊ីរ៉ង់, អាចនឹងដាក់ផែនការធ្វើឃាតមេដឹកនាំចលនាប្រឆាំងនឹងអ៊ីស្រាអែល ហើយអាចនឹងដាក់សម្ពាធខ្លាំងបំផុតទៅលើផលិតកម្មប្រេងឆៅ។ នេះជាការអះអាងរបស់មន្ត្រីអ៊ីរ៉ង់ អារ៉ាប់ និងលោកខាងលិច។ ពួកគេសុទ្ធតែនិយាយដូចៗគ្នា។
ពួកគេទស្សន៍ទាយថាលោកត្រាំនឹងគាបសង្កត់អគ្គមគ្គុទ្ទេសក៍អ៊ីរ៉ង់ លោកអាចារ្យអាយ៉ាតូឡា អាលី ខាមេនី (Ayatollah Ali Khamenei) ត្រូវតែទទួលយកកិច្ចព្រមព្រៀងនុយក្លេអ៊ែរតាមការចង់បានរបស់លោកត្រាំ និងអ៊ីស្រាអែល។ បើនយោបាយជាតិរបស់អាមេរិកប្រែប្រួល សភាពការណ៍នៅមជ្ឈិមបូព៌ាក៏ប្រែប្រួល ដូច្នេះធ្វើឱ្យបាត់បង់តុល្យភាពអំណាច ហើយអាចនឹងធ្វើឱ្យអ៊ីរ៉ង់កែសម្រួលនយោបាយការបរទេសរបស់ខ្លួនឡើងវិញ។ សូម្បីតែស្ថានភាពសេដ្ឋកិច្ចអ៊ីរ៉ង់ក៏ត្រូវប្រែប្រួលផងដែរ។
ក្រុមអ្នកវិភាគយល់ថាទោះបីលោកស្រីហារីស ឬលោកត្រាំឡើងមកកាន់អំណាចនៅអាណត្តិថ្មីមិនសំខាន់ទេ។ អ្វីដែលសំខាន់គឺថាអ៊ីរ៉ង់គ្មានគីឡូសម្រាប់ហក់នៅលើឆាកអន្តរជាតិតទៅទៀតទេព្រោះអ៊ីស្រាអែលបានវាយបំបាក់ធ្មុងក្រុមចលនាប្រដាប់អាវុធដែលជាកូនចៅរបស់អ៊ីរ៉ង់ឡើងទ្រមខ្លួនគ្រប់គ្នាទៅហើយនោះ។ ឧទាហរណ៍ ក្រុមហាម៉ាស់នៅតំបន់ហ្កាហ្សា និងក្រុមហេសបូឡានៅប្រទេសលីបង់។ នៅពេលខ្លះ អ៊ីស្រាអែលតាមវាយកូនចៅអ៊ីរ៉ង់ដល់ប្រទេសអ៊ីរ៉ាក់ ឬស៊ីរីថែមទៀត។
មេដឹកនាំអាមេរិករូបណាក៏មិនល្អដែរនៅក្នុងក្រសែភ្នែកអ៊ីរ៉ង់ ប៉ុន្តែហោចណាស់អ៊ីរ៉ង់ចង់ឃើញគណបក្សប្រជាធិបតេយ្យកាន់អំណាចនៅអាមេរិកព្រោះបក្សនេះមាននយោបាយស្រទន់ ហើយមិនចង់ប្រើដៃធ្ងន់ដាក់បច្ចាមិត្តរបស់ខ្លួនទេ។ អ្នកវិភាគយល់ថាចំណុចដែលអ៊ីរ៉ង់មិនចង់ឃើញលោកត្រាំឡើងកាន់អំណាចដោយសារលោកគាំទ្រអ៊ីស្រាអែលខ្លាំងពេក។
អ្នកវិភាគម្នាក់ឈ្មោះអាប់ដេឡាស៊ីស អាល់សាហ្គើ (Abdelaziz al-Sagher) ជាប្រធានមជ្ឈមណ្ឌលស្រាវជ្រាវនៅតំបន់ឈូងសមុទ្រយល់ថាលោកត្រាំនឹងប្រើកណ្ដាប់ដៃដែកគាបសង្កត់អ៊ីរ៉ង់ឱ្យធ្វើតាមលក្ខខណ្ឌរបស់គាត់។ បើមិនដូច្នោះទេ គាត់នឹងបើកដៃឱ្យអ៊ីស្រាអែលវាយប្រហារទីតាំងនុយក្លេអ៊ែររបស់អ៊ីរ៉ង់។ ចាំតែមើលចុះ គាត់ (លោកត្រាំ) នឹងបើកដៃឱ្យអ៊ីស្រាអែលវាយប្រហារអ៊ីរ៉ង់តាមអំពើចិត្តជាមិនខានឡើយ។ តាមពិត លោកណឺតាន់យ៉ាហ៊ូសព្វថ្ងៃនេះក៏ចង់ឃើញលោកត្រាំវិលទៅសេតវិមានផងដែរ។ ផ្ទុយទៅវិញ លោកហ្សេឡិនស្គី ប្រមុខដឹកនាំអ៊ុយក្រែន បែរជាដេកភ័យទៅវិញបើលោកត្រាំឈ្នះឆ្នោត៕
ចែករំលែកព័តមាននេះ