រាជធានីភ្នំពេញ ៖ ព្រះនាង នរោត្តម ជេនណា បានបង្ហាញក្តីរំភើបរហូតហូរទឹកភ្នែក បន្ទាប់ពីព្រះនាងត្រូវបានផ្តល់ឱកាសឡើងច្រៀងនាំមុខនូវបទ នគររាជ នៅក្នុងពិធីបើកកីឡាជាតិ ដែលបានប្រារព្ធធ្វើឡើង…
រាជធានីភ្នំពេញ ៖ ព្រះនាង នរោត្តម ជេនណា បានបង្ហាញក្តីរំភើបរហូតហូរទឹកភ្នែក បន្ទាប់ពីព្រះនាងត្រូវបានផ្តល់ឱកាសឡើងច្រៀងនាំមុខនូវបទ នគររាជ នៅក្នុងពិធីបើកកីឡាជាតិ ដែលបានប្រារព្ធធ្វើឡើង កាលពីរាត្រីថ្ងៃទី៣០ ខែតុលា ឆ្នាំ២០២៤ នៅពហុកីឡដ្ឋានជាតិអូឡាំពិក ។
ពិធីបើកកីឡាជាតិបានប្រារព្ធឡើងយ៉ាងឱឡារឹក ក្រោមវត្តមានដ៏ខ្ពង់ខ្ពស់របស់សម្តេចធិបតី នាយករដ្ឋមន្ត្រី ហើយក៏មានការចូលរួមពីមហាជនយ៉ាងច្រើនកុះករ ជាពិសេស ក៏ការចូលរួមសម្តែងពីអ្នកសិល្បៈល្បីជាច្រើនរូប ដោយនៅក្នុងនោះក៏មានវត្តមានរបស់ព្រះនាង ជេនណា ផងដែរ ។
ក្រៅពីការសម្តែងច្រៀង ព្រះនាង ជេនណា ក៏ត្រូវបានអ្នករៀបចំកម្មវិធីផ្តល់ឱកាសដ៏ពិសេសនៅក្នុងការច្រៀងនាំមុខគេនូវបទ នគររាជ (គោរពទង់ជាតិបើកកម្មវិធី)ខណះពេលអ្នកចូលរួមស្រែងច្រៀងបន្ទរពីក្រោយ ។
ឱកាសដ៏ពិសេសនេះ បានធ្វើឲ្យ ព្រះនាង ជេនណា បានសម្តែងក្តីរំភើបរហូតស្រក់ទឹកភ្នែក ក្នុងពេលដែលព្រះនាងបានស្រែងច្រៀងបទជាតិខ្មែរនៅក្នុងកម្មវិធីដ៏ធំរបស់ជាតិ ជាពិសេសទៀតនោះគឺនៅចំពោះសម្តេចធិបតី នាយករដ្ឋមន្ត្រីនៃព្រះរាជាណាចក្រកម្ពុជា ។
តាមរយៈសំណេរដែលបានបង្ហោះលើបណ្តាញសង្គម ព្រះនាង ជេនណា បានលើកឡើងថា ថ្ងៃនេះ ជាថ្ងៃដែលខ្ញុំរំភើបរហូតស្រក់ទឹកភ្នែកនៅពេលខ្ញុំបានឈរច្រៀងបទនគររាជ នៅក្នុងកម្មវិធីដ៏ធំរបស់ជាតិ ហើយនៅចំពោះមុខសម្តេចធិបតី នាយករដ្ឋមន្ត្រីនៃព្រះរាជាណាចក្រកម្ពុជា នាពហុកីឡដ្ឋានជាតិអូឡាំពិក។
ព្រះនាងបញ្ជាក់ថា តាំងពីតូចរហូតមកដល់អាយុ១២ឆ្នាំនេះ ខ្ញុំតែងតែស្រមៃថានៅថ្ងៃណាមួយខ្ញុំបានឈរច្រៀងចម្រៀងជាតិនៅក្នុងពិធីរបស់ជាតិ។ ព្រះនាងបន្តថា ថ្ងៃនេះក្តីស្រមៃបានដូចបំណងហើយ ក្នុងនាមខ្ញុំជាសិល្បករមួយរូប និងជាទូតសុឆន្ទៈសហព័ន្ធកីឡារាំកម្ពុជា ខ្ញុំសូមគោរពថ្លែងអំណរគុណសម្តេចធិបតី នាយករដ្ឋមន្ត្រីជាទីគោរពដ៏ខ្ពង់ខ្ពស់ ព្រមទាំងថ្នាក់ដឹកនាំនៃគណៈកម្មាធិការរៀបចំមហាព្រឹត្តិការណ៍កីឡាជាតិដ៏ធំនេះឡើង ពិសេសឯកឧត្តម វ៉ាត់ ចំរើន និងក្រុមការងារមានការយកចិត្តទុកដាក់យ៉ាងខ្ពស់ក្នុងការរៀបចំ។
សូមគោរពជូនពរសម្តេចប្រមុខ និងថ្នាក់ដឹកនាំទាំងអស់មានសុខភាពល្អ អាយុយឺនយូរ និងប្រកបដោយសេចក្តីសុខចម្រើនគ្រប់ប្រការ ៕
ចែករំលែកព័តមាននេះ