សិប្បកម្មដំដែករកចំណូលថយចុះ អត់សូវមានអតិថិជនដូចមុន
- កំពត
ខេត្តកំពត ៖ លោក លី សើយី ជាជាងដំដែក ធ្វើកាំបិត ពូថៅយ៉ាងស្ទាត់ជំនាញ នៅក្នុងភូមិទ្វីខាងជើង សង្កាត់អណ្តូងខ្មែរ…
ខេត្តកំពត ៖ លោក លី សើយី ជាជាងដំដែក ធ្វើកាំបិត ពូថៅយ៉ាងស្ទាត់ជំនាញ នៅក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត បានឲ្យកោះសន្តិភាពដឹងកាលពីថ្ងៃទី២៥ ខែតុលា ឆ្នាំ២០២៤ ថា ការប្រកបមុខរបរធ្វើជាងដែករបស់លោក បច្ចុប្បន្នមិនសូវកាក់កបដូចពីមុនសម័យ
កូវីដ១៩នោះទេ។
កាលពីមុនផ្ទុះកូវីដ១៩ ប្រជាពលរដ្ឋជិតឆ្ងាយតែងតែមករកទិញកាំបិតពូថៅ ជាពិសេស បងប្អូនប្រជាកសិករយើងនៅជុំវិញក្រុងកំពត គឺត្រូវការប្រើប្រាស់ ដូចជាកំបិតលៀម កាំបិតចែត កាំបិតបន្ទុះពូថៅ។ល។ ដោយអ្នកខ្លះក៏រកទិញកាំបិតដំហើយស្រាប់ អ្នកខ្លះទៀតក៏យកដែកជន្ទាសរថយន្តមកកុម្មង់ឲ្យដំជាពូថៅ និងកាំបិតគ្រប់ប្រភេទសម្រាប់ប្រើប្រាស់នៅក្នុងគ្រួសារ។
លោកបានឲ្យដឹងទៀតថា ដោយឡែក ដាវសាម៉ូរ៉ៃដែលក្រុមក្មេងទំនើងប្រើប្រាស់នោះនៅកន្លែងលោកមិនដែលមានអ្នកកុម្មង់ឲ្យដំនោះទេ។ រីឯតម្លៃឈ្នួលកាំបិតគ្រប់ប្រភេទនិងពូថៅមួយគ្រឿងតម្លៃពី៤ម៉ឺនទៅ៤៥០០០រៀលប៉ុណ្ណោះ។ លោកបានឲ្យដឹងទៀតថា កាលពី២ទៅបីឆ្នាំមុន មានពលរដ្ឋចូលដំច្រើនគួរសមគាត់អាចរកចំណូលក្នុង1ថ្ងៃបានពី៥ម៉ឺនទៅ១០ម៉ឺនរៀល តែមកដល់ពេលនេះមិនសូវមានអ្នកមកទិញឬកុម្មង់ឲ្យដំនោះទេ ដោយមានកាំបិតគ្រប់ប្រភេទ និងពូថៅមកពីតាមបណ្តាស្រុក និងខេត្តនានាដឹកដើរលក់ស្ទើរតែគ្រប់ទីកន្លែងទៅហើយ ហើយគេលក់ធូរថ្លៃជាងកាំបិតពូថៅដែលយើងផលិតដោយដែកជន្ទាស(ដែកថែប)។
លោកលី សើយី ក៏បានឲ្យដឹងដែរថា លោកមានវ័យអាយុ៣៨ឆ្នាំហើយ លោកមានកូន៣នាក់នៅក្នុងបន្ទុក សុទ្ធតែនៅរៀនទាំងអស់ នៅពេលការងាររបស់លោកធ្លាក់ចុះ គឺបានប្រពន្ធរបស់លោកជួយយោងគ្នាផងដែរ ដោយប្រពន្ធរបស់លោកបានបើកហាងលក់បាយ និងគុយទាវក្នុងផ្ទះជិតកន្លែងសិប្បកម្មដំដែករបស់លោក ហើយមានភ្ញៀវក្មេងចាស់ប្រុសស្រីចូលហូបជាហូហែរផងដែរ៕
ចែករំលែកព័តមាននេះ