រាជធានីភ្នំពេញ ៖ បន្ទាប់ពីការដាក់បណ្ដឹងឧទ្ធរណ៍ និងកិច្ចប្រជុំជាមួយសហព័ន្ធ ព្រមទាំងគណៈកម្មការវិន័យរបស់សហព័ន្ធកីឡាបាល់ទាត់កម្ពុជាជាច្រើនលើកហើយនោះ ថ្នាក់ដឹកនាំសមាគមកីឡាបាល់ទាត់កងយោធពលខេមរភូមិន្ទ បានសម្រេចចិត្តបន្តការប្រកួតតាមកាលវិភាគរបស់ក្រុមហ៊ុនលីគកម្ពុជា និងយល់ព្រមតាមការពិន័យមកលើគ្រូបង្គោល កីឡាករ របស់សមាគកីឡាបាល់ទាត់កងយោធពលខេមរភូមិន្ទ(Tiffy Army FC) ដោយឈរលើស្មារតី រួមគ្នាអភិវឌ្ឍន៍វិស័យកីឡាបាល់នៅកម្ពុជាយើង ។
ទោះបីយ៉ាងណា សេចក្ដីសម្រេចក្នុងការពិន័យដែលធ្វើឡើងកាលពីថ្ងៃទី២៣ តុលា ឆ្នាំ២០២៤ ក៏មានការបន្ធូរបន្ថយផងដែរ ដូចជា ៖ ១-បន្ថយការពិន័យគ្រូបង្គោល ភា សុភ័ក្ត្រា របស់សមាគមក្លិបកីឡាបាល់ទាត់កងយោធពល ខេមរភូមិន្ទ ពី០៥ (ប្រាំ)ប្រកួត រួមទាំងការព្យួរដោយស្វ័យប្រវត្តិ មកត្រឹមចំនួន០៣(បី) ប្រកួត រួមទាំងការព្យួរដោយស្វ័យប្រវត្តិ និងតម្កល់ទឹកប្រាក់ទុកនៅដដែល ។
២-បន្ថយការពិន័យកីឡាករ ជឿន ណាចារបស់សមាគមក្លិបបាល់ទាត់កងយោធពលខេមរភូមិន្ទ ចំនួន០២ (ពីរ) ប្រកួតរួមទាំងការព្យួរដោយស្វ័យប្រវត្តិ មកត្រឹមចំនួន០១ (មួយ) ប្រកួតព្យួរដោយស្វ័យប្រវត្តិ និងលុបចោលការពិន័យជាប្រាក់ ។
៣-បន្ថយការពិន័យកីឡាករ BALANGA AGOSTINHO JOSEMAR របស់សមាគមក្លិបកីឡាបាល់ទាត់កងយោធពលខេមរភូមិន្ទ ចំនួន០២ (ពីរ)ប្រកួត រួមទាំងការព្យួរដោយស្វ័យប្រវត្តិមកត្រឹមចំនួន០១ (មួយ)ប្រកួតព្យួរដោយស្វ័យប្រវត្តិ និងលុបចោលការពិន័យជាប្រាក់។
៤-បន្ថយការពិន័យកីឡាករ អ៊ុព កាម៉ុល របស់សមាគមក្លិបកីឡាបាល់ទាត់កងយោធពល ខេមរភូមិន្ទ ចំនួន០៣(បី)ប្រកួត រួមទាំងការព្យួរដោយស្វ័យប្រវត្តិមកត្រឹមចំនួន០២(ពីរ)ប្រកួតរួមទាំងការព្យួរដោយស្វ័យប្រវត្តិ និងបន្ថយទឹកប្រាក់មកត្រឹម២៥០.០០០ (ពីរសែនប្រាំម៉ឺន)
រៀល។
សមាគមក្លិបកីឡាបាល់ទាត់កងយោធពលខេមរភូមិន្ទ អគ្គលេខាធិការដ្ឋានសហព័ន្ធកីឡា
បាល់ទាត់កម្ពុជា គណៈកម្មការជំនាញដែលពាក់ព័ន្ធ ត្រូវអនុវត្តតាមសេចក្តីសម្រេចនេះឱ្យមានប្រសិទ្ធភាពចាប់ពីថ្ងៃចុះហត្ថលេខានេះតទៅ។
សមាគមកីឡាបាល់ទាត់កងយោធពលខេមរភូមិន្ទ សំណូមពរដល់បងប្អូនអ្នកគាំទ្រ ទាំងអស់សូមបន្តការគាំទ្រវិស័យបាល់ទាត់កម្ពុជាយើងឲ្យកាន់តែខ្លាំងឡើងបន្ថែមទៀត។
គួររំលឹកផងដែរថា មុននេះ សមាគមកីឡាបាល់ទាត់កងយោធពលខេមរភូមិន្ទ (Tiffy Army FC) បានប្រកាសពិចារណាដកខ្លួនចេញពីលីគកំពូលម្ពុជា CPL រដូវកាល 2024/25 ប្រសិនបើសហព័ន្ធមិនលុបការពិន័យមកកាន់ក្រុមគ្រូបង្វឹកនៅក្នុងការប្រកួតដ៏អយុត្តិធម៌កាលពីសប្ដាហ៍ទី៧ជុំវិញរឿងចម្រូងចម្រាសក្នុងការប្រកួតទល់នឹងវិសាខា កាលពីថ្ងៃទី២៨ ខែកញ្ញា ឆ្នាំ២០២៤ ៕
ចែករំលែកព័តមាននេះ