រាជធានីភ្នំពេញ ៖ ស្ត្រីជនជាតិចិនម្នាក់ជិះតាក់ស៊ីសុខៗដកកូនកាំបិតភ្ជង់កអ្នកបើកតាក់ស៊ី ក្រោយពីឈ្លោះគ្នាជាមួយសង្សាររបស់ខ្លួនតាមទូរស័ព្ទ ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៤ទៀបភ្លឺថ្ងៃទី២៣ ខែតុលាឆ្នាំ២០២៤ នៅបណ្តោយមហាវិថីព្រះនរោត្តម សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីបុរសជាអ្នករត់តាក់ស៊ីបានឲ្យដឹងថា មុនពេលកើតហេតុ មិត្តភក្តិរបស់ស្ត្រីជនជាតិចិនខាងលើបានធ្វើការ BOOKING តាក់ស៊ីរបស់គាត់ ដើម្បីអោយនារីចិននោះជិះ គោលដៅពីបុរីចំការមនទៅកាន់ទឹកថ្លា លុះគាត់ឌុបនារីដែលជាជនចិនខាងលើនោះបានពាក់កណ្តាលផ្លូវនាងក៏បានឈ្លោះគ្នាតាមទូរស័ព្ទជាមួយសង្សារ ហើយក៏បានទាញកូនកាំបិតបត់១ចេញពីកាបូប រួចភ្ជង់ករបស់គាត់តែម្តង ។
បុរសរងគ្រោះបានបន្តទៀតថា ដោយសារគាត់ចេះស្តាប់ចិនបន្តិចបន្តួច គាត់បាន់ឮនាងនិយាយជាភាសាចិនថា បើកអោយលឿនជាងនេះ តែខ្លាចគ្រោះថ្នាក់ គាត់ក៏បានបន្តបើករថយន្តនោះក្នុងល្បឿនរហូតដល់ចំណុចស្តុបបេកាសេ គាត់ក៏បានឈប់ស្តុប រួចចុចអក្សរ P ដើម្បីអោយរថយន្តនៅមួយកន្លែង ។ ចំណែកនារីចិនខាងលើ នៅបន្តយកកូនកាំបិតនោះ ភ្ជង់កគាត់មិនឈប់ គាត់បារម្ភខ្លាចនាងខឹង ចុងកាំបិតនោះនឹងចាក់ចូលបំពង់ករបស់គាត់ ។ ដោយមិនចាំយូរ គាត់ក៏បានកាច់កៅអីទៅក្រោយ លូកដៃចាប់ប្រតាយប្រតប់គ្នាជាមួយនារីចិនខាងលើ បណ្តាលឲ្យជ្រុះកាំបិតតែម្តង ទើបគាត់បើកទ្វាររថយន្ត រត់ចេញក្រៅដើម្បីស្រែកអោយគេជួយ។
បន្ទាប់មក នារីជនជាតិចិនម្នាក់នោះបានរត់ដេញតាមគាត់រហូតដល់កន្លែងសន្តិសុខអង្គុយ រួចនាងបានទៅលើកកៅអីបត់របស់សន្តិសុខដែលយាមកាមក្បែរនោះ រត់ដេញតាមវាយគាត់ និងក្រុមអ្នកព័ត៌មានទើបតែចុះមកដល់ ហើយព្យាយាមរត់ទៅកាន់ធនាគារមួយកន្លែង តែត្រូវបានក្រុមសន្តិសុខនៅទីនោះឃាត់ និងសែងនាងចេញ ។ ដោយសារតែនាងធ្វើអីមិនបាន នាងក៏បានដើរគេចខ្លួនចេញពីទីតាំងកើតហេតុបាត់ទៅ ។
ក្រោយកើតហេតុ បុរសអ្នករត់តាក់ស៊ី ក៏បានបើករថយន្តត្រឡប់ទៅរកមិត្តភក្តិរបស់នារីចិនខាងលើ ដើម្បីទារលុយថ្លៃសេវាកម្មវិញ ព្រោះនារីចិននោះជិះមិនបានអោយលុយនោះទេ ចំណែកអ្នក BOOKING គឺជាមិត្តរបស់នាងទៅវិញទេ ៕
ចែករំលែកព័តមាននេះ