ទីក្រុងញូយ៉ក៖ ករណីកូរ៉េខាងជើងបញ្ជូនកងទ័ពទៅជួយរុស្ស៊ីនៅក្នុងសង្គ្រាមអ៊ុយក្រែនជាគ្រោះថ្នាក់ និងជាការព្រួយបារម្ភយ៉ាងខ្លាំង។ ខាងលើនេះជាអ្វីដែលប្រទេសអាមេរិកថ្លែងកាលពីពេលថ្មីៗនេះ និងស្របពេលដែលកូរ៉េខាងត្បូង និងអង់គ្លេសព្រមានថាទីក្រុងម៉ូស្គូមុខជាតបស្នងនូវតម្លៃណាមួយសម្រាប់ទីក្រុងព្យុងយ៉ាងដែលខិតខំបញ្ជូនកងទ័ពទៅជួយរុស្ស៊ី។
ឯកអគ្គរដ្ឋទូតរងរបស់អាមេរិកប្រចាំអង្គការសហប្រជាជាតិ លោករ៉ូបឺត វូត (Robert Wood) ថ្លែងនៅប្រាប់ក្រុមប្រឹក្សាសន្តិសុខថាយើង (អាមេរិក) កំពុងពិគ្រោះគ្នាជាមួយក្រុមសម្ព័ន្ធមិត្ត និងប្រទេសជាដៃគូដើម្បីឆ្លើយតបទៅនឹងសភាពការណ៍វិវត្តថ្មីៗនេះ។ ប្រធានាធិបតីអ៊ុយក្រែន លោកហ្សេឡិនស្គី ចោទប្រកាន់ថាទីក្រុងព្យុងយ៉ាងត្រៀមបញ្ជូនទ័ព១ម៉ឺននាក់ទៅរុស្ស៊ី។
វីឌីអូបែកធ្លាយបង្ហាញរូបទាហានកូរ៉េខាងជើងកំពុងផ្លាស់ឯកសណ្ឋានកងទ័ពរុស្ស៊ីឯកអគ្គរដ្ឋទូតអ៊ុយក្រែនថ្លែងប្រាប់ក្រុមប្រឹក្សាសន្តិសុខថាកងទ័ពទាំងនេះទំនងជាត្រៀមខ្លួនរួចហើយដើម្បីប្រឡូកនៅក្នុងសង្គ្រាម។ យ៉ាងយូរត្រឹមថ្ងៃទី១ ខែវិច្ឆិកាខាងមុខនេះពួកគេអាចនឹងចេញច្បាំងបានហើយ។ ទីភ្នាក់ងារស៊ើបការណ៍សម្ងាត់កូរ៉េខាងត្បូងថ្លែងថាកូរ៉េខាងជើងបានដឹកជញ្ជូនទាហាន១៥០០នាក់តាមកប៉ាល់ចម្បាំងរបស់រុស្ស៊ីចេញពីកំពង់ផែកូរ៉េខាងជើងសំដៅទៅទីក្រុងវ៉្លាឌីវ៉ូស្តុក (Vladivostok) ដើម្បីហាត់សម១រយៈពេលខ្លី។ រួចហើយនឹងឡើងប្រយុទ្ធនៅសមរភូមិតែម្ដង។
លោកវូតថ្លែងថាបើរបាយការណ៍នេះជាការពិត មានន័យថាសភាពការណ៍ពោរពេញដោយគ្រោះថ្នាក់ និងគួរឱ្យព្រួយបារម្ភណាស់។ នេះជាភស្តុតាងបង្ហាញពីការពង្រឹងទំនាក់ទំនងរវាងទីក្រុងព្យុងយ៉ាង និងម៉ូស្គូ។ វិមានក្រឹមឡាំងមិនបានឆ្លើយតបដោយត្រង់ៗចំពោះសំណួរដែលថាតើកងទ័ពកូរ៉េខាងជើងនឹងចេញច្បាំងនៅលើទឹកដីអ៊ុយក្រែន ឬយ៉ាងណា។ អ្នកនាំពាក្យវិមានក្រឹមឡាំងថ្លែងដោយប្រយោលថាទំនាក់ទំនងរវាងប្រទេសទាំង២គ្មានគោលដៅប្រឆាំងនឹងប្រទេសដទៃទៀតនោះទេ។
ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោកវ៉ាស៊ីលី ណេបឹនហ្សៀ (Vassily Nebenzia) វាយបកវិញចំពោះការសង្ស័យទាំងនោះ។ លោកចោទប្រកាន់ថាក្រុមបស្ចិមប្រទេសកំពុងព្យាយាមបន្លប់ស្ថានការណ៍ពិតដោយធ្វើជាយកបញ្ហាអ៊ីរ៉ង់, ចិន និងកូរ៉េខាងជើងមកបន្លាចពិភពលោក។ ចំណែកឯកអគ្គរាជទូតអង់គ្លេសប្រចាំ UN លោកស្រីបាបារ៉ា វូតវើត (Barbara Woodward) ថ្លែងថាកូរ៉េខាងជើងទំនងជាបានបញ្ជូនកងទ័ពទៅរុស្ស៊ីពិតមែន។
លោកស្រីថ្លែងថាដោយសារលោកពូទីនពិបាកជ្រើសរើសកងទ័ពថ្មីៗចូលសមរភូមិ ដូច្នេះ គាត់ត្រូវតែពឹងផ្អែកទៅលើកងទ័ពរបស់កូរ៉េខាងជើងហ្នឹងឯងដើម្បីបន្តសង្គ្រាមខុសច្បាប់របស់គាត់នៅអ៊ុយក្រែន។ ប៉ុន្តែកូរ៉េខាងជើងក៏ត្រូវការការតបស្នងពីប្រទេសរុស្ស៊ីផងដែរ។ ឯកអគ្គរដ្ឋទូតកូរ៉េខាងត្បូងគាំទ្រការលើកឡើងនេះ។ លោកថ្លែងថាកូរ៉េខាងជើងអាចនឹងរំពឹងទទួលបានផលប្រយោជន៍ពីរុស្ស៊ីជាជំនួយយោធា ឬជំនួយហិរញ្ញវត្ថុ។ អាចជាបច្ចេកវិទ្យាផលិតអាវុធនុយក្លេអ៊ែរក៏អាចថាបាន៕
ចែករំលែកព័តមាននេះ