ខេត្តប៉ៃលិន ៖ យោងតាមរបាយការណ៍អភិបាលខេត្តប៉ៃលិន កាលពីយប់រំលងអធ្រាតចូលថ្ងៃទី១៩ ខែតុលា ឆ្នាំ២០២៤ បានអោយដឹងថា ជំនន់ទឹកភ្លៀងហូរធ្លាក់ពីលើភ្នំជន់លិចច្រកទ្វារព្រំដែនអន្តរជាតិព្រំបានស្រកអស់វិញហើយ វិលត្រឡប់មកសភាពធម្មតាវិញគិតត្រឹមម៉ោង១២ និង៤៧យប់ឈានចូលថ្ងៃទី១៩…
ខេត្តប៉ៃលិន ៖ យោងតាមរបាយការណ៍អភិបាលខេត្តប៉ៃលិន កាលពីយប់រំលងអធ្រាតចូលថ្ងៃទី១៩ ខែតុលា ឆ្នាំ២០២៤ បានអោយដឹងថា ជំនន់ទឹកភ្លៀងហូរធ្លាក់ពីលើភ្នំជន់លិចច្រកទ្វារព្រំដែនអន្តរជាតិព្រំបានស្រកអស់វិញហើយ វិលត្រឡប់មកសភាពធម្មតាវិញគិតត្រឹមម៉ោង១២ និង៤៧យប់ឈានចូលថ្ងៃទី១៩ ខែតុលា ឆ្នាំ២០២៤។
ប្រភពព័ត៌មានបានឱ្យដឹងថា ក្រុមការងារនឹងចុះរៀបចំសម្អាតបរិស្ថាន និងជួយសង្គ្រោះបន្ទាន់ដល់ប្រជាពលរដ្ឋដែលបានបាត់បង់សម្ភារៈប្រើប្រាស់ស្បោងអាហារ នៅព្រឹកថ្ងៃស្អែកត្រូវនឹងថ្ងៃ១៩ ខែតុលា ឆ្នាំ២០២៤ ។
ប្រភពព័ត៌មានបានឱ្យដឹងទៀតថា តាមរយៈការដឹកនាំចុះអន្តរាគមន៍ដោយផ្ទាល់ពីសំណាក់លោកជំទាវ អភិបាលខេត្ត ក្រុមការងារបានជួយសង្គ្រោះប្រជាពលរដ្ឋបានទាន់ពេលវេលា មិនមានប្រជាពលរដ្ឋរងគ្រោះដល់អាយុជីវិតឡើយ។
ជាមួយគ្នានោះដែរ លោកជំទាវក៏បានជូនដំណឹងដល់បងប្អូនជាម្ចាស់ម៉ូតូបានចតនៅច្រកទ្វារអន្តរជាតិ និងម៉ូតូបានហូរតាមទឹកសូមមកទទួលយកម៉ូតូវិញដោយភ្ជាប់មកជាមួយឯកសារបញ្ចាក់ជាម្ចាស់កម្មសិទ្ធ ក្រុមការងាររដ្ឋបាលខេត្ត នៅរង់ចាំពិនិត្យប្រគល់ជូនវិញ ចាប់ពីព្រឹកស្អែកម៉ោង៨និង០០នាទី។
សូមបញ្ចាក់ ម៉ូតូក្រុមការងារសង្គ្រោះរក្សាទុកជូនមានចំនួន៣៤គ្រឿង នៅបាត់ម៉ូតូមួយចំនួន និង ម៉ូតូកង់បី២គ្រឿង ក្រុមការងារកំពុងស្វែងរកបន្តទៀត ដោយសារទឹកជំនន់កួចយកទៅបាត់។
ដូច្នេះ សូមពុកម៉ែបងប្អូនទទួលបានសុខសុវត្តិភាពគ្រប់ៗគ្នា ក្រុមការងារកងកំលាំងប្រចាំការនៅជាមួយបងប្អូន២៤ម៉ោង រហូតដល់សភាពការណ៍ល្អប្រសើរធម្មតាវិញ ។
ច្រកទ្វារអន្តរជាតិព្រំ បានបើកដំណើរការជាធម្មតាបន្ទាប់ពីទទួលរងទឹកជំនន់ បិទអស់រយៈពេល៥ម៉ោង នៅរសៀលថ្ងៃទី ១៨ ខែតុលា ឆ្នាំ២០២៤ ។ លោកជំទាវសូមអរគុណដល់កងកំលាំងគណៈបញ្ចាការឯកភាពទាំងបី កំលាំងយុវជន កំលាំងមូលដ្ធាន ទាំងអស់ដែលបានចូលរួមយ៉ាងសកម្មដើម្បីជួយសង្គ្រោះប្រជាពលរដ្ឋយើង ។
លោកជំទាវក៏សូមអរគុណក្រុមការងារច្រកទ្វារភាគីថៃបានសហការសម្របសម្រួលបើកច្រកទ្វារព្រំដែន ដើម្បីជួយអោយអ្នកធ្វើដំណើរ និង រថយន្តដឹកទំនិញឆ្លងគ្មានកំណត់ពេលវេលា ដើម្បីជៀសវាងការកកស្ទះចរាចរណ៍៕
ចែករំលែកព័តមាននេះ