ទីក្រុងបាងកក៖ សមត្ថកិច្ចថៃចាប់ខ្លួនមនុស្ស១៨នាក់ពាក់ព័ន្ធនឹងអំពើឆបោកតាមបែបពីរ៉ាមីតស្គីម (Pyramid Scheme) ឬបោកជាលក្ខណៈមេកញ្ច្រែង និងកូនកញ្ច្រែង។ អ្នកណារកម៉ូយឱ្យចូលទៅក្នុងស៊ងរបស់គេបានច្រើននឹងទទួលបានភាគលាភកាន់តែច្រើន។ គម្រោងឆបោកលើកនេះគេយកទំនិញប្រភេទអាហារបំប៉នធ្វើជានុយបោក។ នេះបើយោងតាមមន្ត្រីនគរបាលថៃដែលបញ្ជាក់ថានៅក្នុងចំណោមមនុស្សដែលត្រូវចាប់ខ្លួននោះក៏មានតារាល្បីៗចំនួនបីនាក់ផងដែរ។
សមត្ថកិច្ចរឹបអូសបានរថយន្តទំនើបជាច្រើនគ្រឿង និងទឹកប្រាក់រាប់លានដុល្លារ។ ការចាប់ខ្លួននេះតបតាមការតវ៉ារបស់ពលរដ្ឋជាងមួយពាន់នាក់ដែលដាក់ពាក្យប្ដឹងទៅសមត្ថកិច្ចថាខ្លួនចាញ់បោកក្រុមហ៊ុនអាយខុនគ្រុប (The iCon Group)។ ក្រុមហ៊ុនបានអូសទាញពួកគេឱ្យទិញផលិតផល និងសន្យាថាផ្ដល់ប្រាក់ចំណេញយ៉ាងច្រើនសន្ធឹកសន្ធាប់ត្រឡប់មកវិញ។
លោកវរ៉ាថាផន ហៅបូសផូល (Boss Paul) ជាបិតាស្ថបនិក និងជានាយកប្រតិបត្តិក្រុមហ៊ុនអាយខុនគ្រុបត្រូវសមត្ថកិច្ចចាប់ខ្លួនតាំងពីម្សិលមិញ រួមជាមួយពិធីករទូរទស្សន៍ និងតារាភាពយន្តស្រីដ៏ល្បីរាប់សិបឆ្នាំមកហើយឈ្មោះនាងវឌ្ឍនៈមន្ត្រី (Pechaya Wattanamontree)។ អាជ្ញាធរថ្លែងថាពួកគេបានបង្កកគណនីធនាគាររបស់មេធំៗនៃក្រុមហ៊ុនអាយខុនគ្រុបដែលសរុបជាទឹកប្រាក់១២៥លានបាត ឬស្មើនឹង៣,៨លានដុល្លារ។
មិនតែប៉ុណ្ណោះបានរឹបអូសឡានទំនើបៗជាច្រើនគ្រឿងរួមទាំងឡានម៉ាកផចឆឺ (Porsches) និងហ្វតម៉ាស់ស្តាំងផងដែរ (Ford Mustang)។ សមត្ថកិច្ចបន្តតាមដានការចរាចរសាច់ប្រាក់របស់គណនីមួយចំនួនទៀតដែលទាក់ទងនឹងជនសង្ស័យទាំងនេះ។ រឿងនេះមិនទាន់ចប់ត្រឹមហ្នឹងទេ។ សមត្ថកិច្ចចង់ដឹងថាតើនរណាខ្លះពាក់ព័ន្ធនឹងសំណុំរឿងនេះ។ នេះបើយោងតាមការបញ្ជាក់របស់អគ្គស្នងការនគរបាលថៃ ឧត្ដមសេនីយ៍គីត្រាត ផាន់ផេត (Kitrat Phanphet)។
ក្រុមហ៊ុនអាយខុនគ្រុបរងការចោទប្រកាន់ថាបានអូសទាញមនុស្សឱ្យដាក់ប្រាក់ទៅក្នុងគម្រោងឆបោករបស់ខ្លួនដោយបើកបង្រៀនវគ្គថែទាំសុខភាពតាមអនឡាញ។ អ្នកដែលចុះឈ្មោះចូលរៀនវគ្គនេះត្រូវក្រុមហ៊ុននិយាយអូសទាញរបៀបជាលក្ខណៈបង្ខិតបង្ខំឱ្យទិញផលិតផលរបស់ខ្លួន និងដាក់ប្រាក់វិនិយោគចាប់ពី២៥០០-២៥០០០០បាត(ហែល៧៥០០ដុល្លារ)។
ជនរងគ្រោះដែលចាញ់បោកក្រុមហ៊ុនខាងលើនេះមានគ្រប់ស្រទាប់វណ្ណៈទាំងអស់ មានតាំងពីអ្នកក្រីក្ររហូតដល់តារាបាល់ទាត់កម្រិតអាជីពក៏ចាញ់បោកដែរ។ ពួកគេបង់ប្រាក់រហូតដល់ជាង៦សែនបាតទៅឱ្យក្រុមហ៊ុន។ រហូតមកដល់ពេលនេះ សមត្ថកិច្ចមិនទាន់ដឹងច្បាស់ថាតើទំហំទឹកប្រាក់ដែលចាញ់បោកនេះមានចំនួនប៉ុន្មានទេព្រោះកំពុងស្រាវជ្រាវជាបន្តទៀត។
ថៃក៏មិនខុសពីប្រទេសដទៃទៀតនោះទេតែងតែកើតមានអំពើឆបោកជាហូរហែមិនអាចបិទបញ្ចប់ទាំងស្រុងបានឡើយ។ កាលពីឆ្នាំ២០២៣ មានករណីឆបោកវិនិយោគតាមបែបហ្វ័ររិច (Forex) ដែលអូសទាញមនុស្សរាប់ពាន់នាក់ឱ្យដាក់ប្រាក់វិនិយោគដើម្បីទទួលបានប្រាក់ចំណេញខ្ពស់។ ម្ចាស់លុយគ្មានហត់នឿយអ្វីទាំងអស់ ចាំតែទទួលប្រាក់ចំណេញប្រចាំខែ។
គេមិនទាន់ដឹងថាតើជនសង្ស័យដែលចាប់ខ្លួនទាំងនោះបើតុលាការរកឃើញកំហុសដូចការចោទប្រកាន់មែនពួកគេនឹងជាប់ពន្ធនាគារកម្រិតណាទេ។ ប្រទេសថៃធ្លាប់មានជនឆបោកម្នាក់ត្រូវតុលាការផ្ដន្ទាទោសដាកពន្ធនាគាររហូតដល់ជាង១សែនឆ្នាំកាលពីឆ្នាំ១៩៨៩ព្រោះទំហំទឹកប្រាក់ឆបោកច្រើនពេក។ ក្រោយមកជាប់គុកបាន៨ឆ្នាំក៏ត្រូវតុលាការដោះលែងវិញ៕
ចែករំលែកព័តមាននេះ