ខេត្តពោធិ៍សាត់ ៖ មហោស្រពសិល្បៈចម្លាក់ ក្រោមប្រធានបទ (ព្រះពុទ្ធបដិមាខ្មែរ ក្នុងឥរិយាបថសមាធិ) ដែលបានដំណើរការអស់រយៈពេលពីរថ្ងៃកន្លងមកនេះ បានប្រារព្ធពិធីបិទ នាព្រឹកថ្ងៃទី១៧ ខែតុលា…
ខេត្តពោធិ៍សាត់ ៖ មហោស្រពសិល្បៈចម្លាក់ ក្រោមប្រធានបទ (ព្រះពុទ្ធបដិមាខ្មែរ ក្នុងឥរិយាបថសមាធិ) ដែលបានដំណើរការអស់រយៈពេលពីរថ្ងៃកន្លងមកនេះ បានប្រារព្ធពិធីបិទ នាព្រឹកថ្ងៃទី១៧ ខែតុលា ឆ្នាំ២០២៤ ក្រោមអធិបតីភាពលោកស្រី ប៉ុក ណាឌី អភិបាលរងខេត្ត តំណាងលោក ខូយ រីដា អភិបាល នៃគណៈអភិបាលខេត្តពោធិ៍សាត់ ។
ពិធីនេះ បានប្រារព្វធ្វើនៅសារៈមន្ទីរខេត្ត ដោយមានកម្មវិធីប្រគល់ប័ណ្ណសរសើរ និងជ័យលាភី ដល់បេក្ខជនជាងចម្លាក់ ដែលជាប់ចំណាត់ថ្នាក់ផងដែរ ។ បេក្ខជនចូលរួមប្រកួតប្រជែងមានចំនួន២០នាក់ មកពីក្រុងពោធិ៍សាត់ ស្រុកកណ្ដៀង និងស្រុកភ្នំក្រវាញ ដែលមានលោក រស់ សំណាង, លោក សោម សុភា, លោក ហៃ សុខលីម, លោក គង់ រិទ្ធ និងលោក យិន សុផុន ជាគណៈមេប្រយោគ ។
ក្នុងរយៈពេលពីរថ្ងៃនេះ គណៈមេប្រយោគទាំង០៥រូប បានបង្កើត និងសិក្សាយ៉ាងច្បាស់លាស់ អំពីរូបមន្តដាក់ពិន្ទុ ដើម្បីធានាសុក្រិតភាពទាំងលក្ខណៈ បច្ចេកទេស ក្បួន ខ្នាត និងលក្ខណៈសិល្បៈ។ ក្រោយពីបានពិនិត្យយ៉ាងយកចិត្តទុកដាក់ ផ្ចិតផ្ចង់ វាស់វែង ចាក់ខ្នាត សម្រង់ទឹកដៃ សោភ័ណភាព ការច្នៃប្រឌិត និងការបញ្ចូលព្រលឹង នៃរូបចម្លាក់ព្រះពុទ្ធបដិមារបស់បេក្ខជនទាំង២០នាក់ ម្ដងមួយៗ គណៈមេប្រយោគសម្រេចជ្រើសរើសបានរូបព្រះពុទ្ធបដិមា ដែលបានពិន្ទុខ្ពស់បំផុត ចំនួន០៣រូបគឺ ៖ បេក្ខជនឈ្មោះ ម៉ក់ ជាង ទទួលបានចំណាត់ថ្នាក់លេខ១, បេក្ខជនឈ្មោះ ចាន់ វ៉ូលីម ចំណាត់ថ្នាក់លេខ២ និងបេក្ខជនឈ្មោះ ម៉ក់ ចៀន ចំណាត់ថ្នាក់លេខ៣ ។
លោកស្រី ប៉ុក ណាឌី អភិបាលរងខេត្ត បានអបអរសាទរចំពោះបេក្ខជន ដែលទទួលជ័យលាភី ក្នុងមហោស្រពសិល្បះចម្លាក់ ព្រះពុទ្ធបដិមាខ្មែរក្នុងឥរិយាបថសមាធិ ឆ្នាំ២០២៤នេះ ហើយក៏សូមលើកទឹកចិត្តដល់បេក្ខជន ដែលមិនបានទទួលជ័យលាភី បន្តការខិតខំប្រឹងប្រែង ដើម្បីចូលរួមចំណែកលើកស្ទួយ ថែរក្សាកេរ្តិ៍ដំណែលវប្បធម៌ជាតិរបស់យើងឲ្យកាន់តែរីកចម្រើន និងប្រកបដោយនិរន្តរភាព ដូចដែលយើងទាំងអស់គ្នាបានដឹងហើយថា មហោស្រពសិល្បៈចម្លាក់ខ្មែរ មិនត្រឹមតែជាវេទិកាប្រកួតប្រជែងយករង្វាន់ជ័យលាភីនោះទេ គឺជាឱកាសជួបជុំសិក្សាឈ្វេងយល់ ចែករំលែកបទពិសោធន៍ និងចំណេះដឹងបន្ថែមទៀត ។
គោលបំណង នៃការរៀបចំមហោស្រពសិល្បៈចម្លាក់ខេត្តពោធិ៍សាត់ ឆ្នាំ២០២៤នេះ គឺដើម្បីផ្ដល់ឱកាសសិក្សា លើផ្នែកធនធានមនុស្ស បច្ចេកទេស នៃការបង្ហាញស្នាដៃចម្លាក់ និងទេពកោសល្យសិល្បៈ សម្ដៅពង្រឹងសមត្ថភាព និងលើកកម្ពស់សិល្បៈស្នាដៃចម្លាក់ខ្មែរ ដើម្បីបន្តការពារ ថែរក្សា និងលើកស្ទួយមរតកវប្បធម៌អរូបី មួយនេះ ឲ្យគង់វង្ស ។
លោកស្រី ប៉ុក ណាឌី បានសម្ដែងការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់មន្ត្រីរាជការ មន្ទីរវប្បធម៌ និងវិចិត្រសិល្បៈខេត្តពោធិ៍សាត់ ដែលបានផ្ដួចផ្ដើម និងជម្រុញឲ្យមានការរៀបចំមហោស្រព សិល្បៈចម្លាក់ព្រះពុទ្ធបដិមាខ្មែរនេះ ឲ្យចេញជារូបរាង និងបានឈានដល់ថ្ងៃ បញ្ចប់ប្រកបដោយលទ្ធផលផ្លែផ្កាគួរជាទីមោទនៈ ។
ជាមួយគ្នានេះ លោកស្រីអភិបាលរងខេត្ត ក៏បានកោតសរសើរដល់លោកព្រឹទ្ធាចារ្យ មេប្រយោគ សិប្បករ អាជីវករ និងប្អូនៗ យុវជនខ្មែរជំនាន់ក្រោយ ដែលបានបំពេញតួនាទីយ៉ាងសកម្ម ក្នុងការហាត់រៀន ស្នាដៃចម្លាក់បន្តវេនពីដូនតា ក្នុងផ្នែកសិល្បៈសូនរូប និងសិប្បកម្ម ប្រកបដោយគំនិតច្នៃប្រឌិត និងទឹកចិត្តគោរពស្រលាញ់ ក្នុងកាលៈទេសៈប្រកួតប្រជែងនាសម័យសាកលភាវូបនីយកម្ម។ សូមថ្លែងអំណរគុណគណៈមេប្រយោគ ដែលបានបំពេញការងារប្រកបដោយស្មារតីទទួលខុសត្រូវខ្ពស់ មានភាពសុក្រិត យុត្តិធម៌ ក្នុងការពិនិត្យវិនិច្ឆ័យជ្រើសរើសស្នាដៃចម្លាក់យ៉ាងម៉ត់ចត់ សម្រាប់មហោស្រពយើងនេះ ។
លោកស្រីមានជំនឿយ៉ាងមុតមាំថា តាមរយៈការប្រារព្ធមហោស្រពចម្លាក់ ក្រោមប្រធានបទ (ព្រះពុទ្ធបដិមាខ្មែរក្នុងឥរិយាបថសមាធិ)ខេត្តពោធិ៍សាត់ ឆ្នាំ២០២៤នេះ ពិតជាអាចផ្ដល់នូវសារប្រយោជន៍កាន់តែច្រើនថែមទៀត សម្រាប់ជាបទពិសោធន៍ និងបានចូលរួមចំណែក ថែរក្សាការពារនូវអត្តសញ្ញាណ និងលើកកម្ពស់វប្បធម៌ជាតិ សំដៅប្រែក្លាយព្រះរាជាណាចក្រកម្ពុជា ជាព្រះរាជាណាចក្រនៃវប្បធម៌។ ការជ្រើសរើសប្រធានបទនេះ គឺពិតជាបានឆ្លើយតបយ៉ាងស៊ីជម្រៅចំពោះជាតិខ្មែរ ព្រោះថា ព្រះពុទ្ធបដិមាតំណាងឲ្យព្រះពុទ្ធសាសនា ដែលជាសាសនារបស់រដ្ឋ តំណាងឲ្យសេចក្ដីស្ងប់ ស្ថេរភាព និងសន្តិភាព ៕
ចែករំលែកព័តមាននេះ