រាជធានីភ្នំពេញ ៖ ប្រព័ន្ធសញ្ញាសិប្បនិម្មិត (AI) នៅក្នុងប្រទេសកម្ពុជា ស្ថិតនៅក្នុងដំណាក់កាលដំបូងនេះឡើយ ខណៈអ្នកចេះប្រើប្រាស់ទទួលបានផលប្រយោជន៍ច្រើន ហើយមានហានិភ័យផងដែរ នេះបើតាមមន្ត្រីជាន់ខ្ពស់ក្រសួងប្រៃសណីយ៍ និងទូរគមនាគមន៍…
រាជធានីភ្នំពេញ ៖ ប្រព័ន្ធសញ្ញាសិប្បនិម្មិត (AI) នៅក្នុងប្រទេសកម្ពុជា ស្ថិតនៅក្នុងដំណាក់កាលដំបូងនេះឡើយ ខណៈអ្នកចេះប្រើប្រាស់ទទួលបានផលប្រយោជន៍ច្រើន ហើយមានហានិភ័យផងដែរ នេះបើតាមមន្ត្រីជាន់ខ្ពស់ក្រសួងប្រៃសណីយ៍ និងទូរគមនាគមន៍ ។
ឯកឧត្តមបណ្ឌិត សំសិទ្ធ សេរី អគ្គនាយក នៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និង ទូរគមនាគមន៍ បានថ្លែងប្រាប់បណ្តាញសារព័ត៌មាន មុនពេលបើកសិក្ខាសាលាពិគ្រោះយោបល់លើសេចក្តីព្រាង «មគ្គុទេសក៍បន្ថែមរបស់អាស៊ានស្តីពីអភិបាលកិច្ច និងសីលធម៌បញ្ញាសិប្បនិម្មិតសម្រាប់បញ្ញាសិប្បនិម្មិតបង្កើតមាតិកា» នារសៀលថ្ងៃទី១៧ ខែតុលា ឆ្នាំ២០២៤
នាទីស្តីការក្រសួងថា បញ្ញាសិប្បនិម្មិត ឬអេអាយ-Artificial Intelligence (AI) វាអាចជំនួយផ្នែកបច្ចេកទេ ដោយផ្តល់ផលប្រយោជន៍ច្រើនដល់យើង និងវាក៏មានហានិភ័យផងដែរ ។
ឯកឧត្តមបញ្ជាក់ថា ៖ “សម្រាប់ក្របខណ្ឌនៅក្នុងប្រទេសកម្ពុជា AI បានទទួលផលប្រយោជន៍ច្រើន គឺនៅពេលដែលយើងអាចចេះប្រើប្រាស់វា ប៉ុន្តែនៅពេល ដែលយើងមិនអាចប្រើប្រាស់វា បានច្រើននោះទេ វានឹងជះផលអាក្រក់មកយើងវិញ” ។
ឯកឧត្តមបណ្ឌិត បានឱ្យដឹងថា ៖ មូលហេតុ ដែលក្រសួងបានគិតគូពីប្រព័ន្ធអេអាយ AI នោះព្រោះថា អេអាយ គឺជាប្រព័ន្ធបច្ចេកវិទ្យាមួយដែលបានជួយសម្រួលការងារមនុស្សបានច្រើន។ វាមានផលប្រយោជន៍ធំធេង ដូចជាកាត់បន្ថយតម្លៃកាត់បន្ថយការប្រើពេលវេលា ដូចជាយើងធ្វើការរហូត ១០ម៉ោង តែអេអាយធ្វើការតែ ១០នាទីប៉ុណ្ណោះ ។
បើតាមឯកឧត្តមអគ្គនាយក បានលើកឡើងថា វិធានពាក់ព័ន្ធនឹងបញ្ញាសិប្បនិម្មិតនេះ ក្រសួងប្រៃសណីយ៍ នឹងដាក់ចេញនៅក្នុងរយៈពេលនៅពាក់កណ្ដាលឆ្នាំ ២០២៥ខាងមុខ ។
ឯកឧត្តមអគ្គលេខាធិការ ក៏បានលើកឡើងដោយបញ្ជាក់ថា ៖ នៅក្នុងប្រទេសកម្ពុជា ប្រព័ន្ធអេអាយ គឺស្ថិតនៅក្នុងដំណាក់កាលដំបូងនៅឡើយ ហើយបើនិយាយពីបញ្ហាប្រឈមវិញ នៅកម្ពុជា ក៏មិនអាចទាន់និយាយបានឡើយ ហើយពេលនេះ ក្រសួងប្រៃសណីយ៍ ក៏បានធ្វើការជាមួយនិងអង្គការយូនីស្កូ ដើម្បីសិក្សាអំពីថា តើបច្ចុប្បន្ននេះ កម្ពុជាស្ថិតនៅទីណាក្នុងការប្រើប្រាស់ប្រព័ន្ធអេអាយ ។
ឯកឧត្តម បានគូសបញ្ជាក់បន្ថែមថា យើងកំពុងតែធ្វើការសិក្សាអំពីស្ថានភាពបច្ចុប្បន្នរបស់អេអាយ នៅក្នុងប្រទេសទាំងអស់ នៅក្នុងសកលលោក ដែលបានប្រើប្រាស់នៅក្នុងក្របខណ្ឌ ឬវិធាននេះដូចៗគ្នា ឬស្តង់ដាតែម្តង។ អ៊ីចឹង នៅពេលដែលយើងធ្វើការសិក្សាអំពីស្ថានភាពបច្ចុប្បន្នហើយ យើងនឹងដឹងថា នៅទីណា ពេលនោះយើងនឹងត្រូវធ្វើបែបម៉េចទៀត ដើម្បីធ្វើការអភិវឌ្ឍន៍ អេអាយ ថែមទៀត ។
ជាមួយគ្នានេះ ឯកឧត្តមអគ្គនាយកបានបញ្ជាក់ដែរថា ប្រព័ន្ធ អេអាយ បានបែងចែកជា៣កម្រិត ។ ទីមួយ. ហៅថាកម្រិតទាប (វាគិតស្ថិតនៅក្នុងកម្រិតទាប) ទី២. កម្រិតដូចមនុស្ស (សមត្ថភាពរបស់វាដូចជាមនុស្ស)។ វាអាចសិក្សានៅបរិស្ថានជុំវិញ និងបង្កើតអ្វី ដែលថ្មីៗ ដែលកម្រិតនេះ វាស្ថិតនៅក្នុងមានភាពហានិភ័យច្រើន។ ទីបី. វាមានសមត្ថភាពលើសពីមនុស្សយើង។ ប៉ុន្តែក្នុងបរិបទបច្ចុប្បន្ននេះ ប្រព័ន្ធអេអាយ ស្ថិតនៅក្នុងកម្រិតទាប តែជិតដល់ស្ថិតក្នុងកម្រិតជិតដូចមនុស្សហើយ ។
ទាក់ទិនទៅនឹងការវិវឌ្ឍន៍ នៃអេអាយនេះ ឯកឧត្តមបណ្ឌិត សំសិទ្ធ សេរី បានលើកឡើងដែរថា សម្រាប់ប្រព័ន្ធ អេអាយ អាចនឹងស្ថិតក្នុងកម្រិតមនុស្ស នៅក្នុងឆ្នាំ២០២៣ ឬ ២០២៥ខាងមុខ។ ដូច្នេះបច្ចុប្បន្ននេះ ស្ថិតនៅក្នុងកម្រិតទាប ដែលមិនទាន់ស្ថិតនៅមានភាពហានិភ័យនៅឡើយនោះទេ។ ព្រោះថា អេអាយ កម្រិតនេះ ស្ថិតនៅក្នុងការបណ្ដុះបណ្ដាលនៅឡើយ ពោលគឺមនុស្សគឺជាអ្នកបញ្ចូលទិន្នន័យ ឬអាចនិយាយថា ជាអ្នករៀបចំវា ។
ឯកឧត្តម បានធ្វើការពន្យល់ថា សម្រាប់មូលហេតុ ដែលក្រសួងប្រៃសណីយ៍ ទូរគមនាគមន៍ រៀបចំសិក្ខាសាលានេះឡើង ដែលជាផ្នែកមួយក្នុងការសម្របសម្រួលជាមួយក្នុងទាក់ទងជាមួយស្ថាប័នផ្សេងៗ ស្ថិតនៅក្នុងកម្រិតតំបន់(អាស៊ាន)។ ក្រសួងបានទទួលការអនុញ្ញាតពីរាជរដ្ឋាភិបាល ក្នុងការធ្វើការងារទាក់ទង នឹងក្របខណ្ឌឌីជីថល អាស៊ាន ដែលជាកិច្ចប្រជុំកំពូល ស្ថិតនៅក្នុងក្របខណ្ឌអាស៊ាន ដែលនៅក្នុងនោះប្រទេសទាំង១០ ដែលជាសមាជិកអាស៊ាន បានធ្វើការប្រជុំមួយឆ្នាំម្ដង ជាមួយនឹងការអាប់ដេតលើវិស័យឌីជីថល នៅក្នុងប្រទេសរបស់ខ្លួន។ ការពីឆ្នាំមុន កិច្ចប្រជុំកំពូលអាស៊ាន ឌីជីថល នេះដែរ ក៏បានអនុម័តលើមគ្គទេសអេអាយ និងក្រមសីលធម៌អាអាយ រួចមកហើយ ។ ដោយឡែកសម្រាប់កិច្ចប្រជុំនៅថ្ងៃនេះ គឺក្នុងគោលបំណងចង់បង្ហាញសាធារណៈជន បានដឹងថា តើវិធានគោលសំខាន់ៗណាខ្លះ ដែលមានរំលេចនៅក្នុងអភិបាលកិច្ច នៅក្នុងក្រមសីលធម៌អេអាយ ។
គួរបញ្ជាក់ថា បញ្ញាសិប្បនិម្មិត -Artificial Intelligence (AI) គឺសំដៅលើជ្រុងមួយ នៃវិទ្យាសាស្ត្រកុំព្យូទ័រ ដោយផ្តោតទៅលើការបង្កើតសុសវែរ កម្មវិធី ឬឧបករណ៍ ឬធ្វើការជំនួសមនុស្សបាន ៕
ចែករំលែកព័តមាននេះ