រាជធានីភ្នំពេញ ៖ តើជាភាពកម្សោយរបស់គណៈអភិបាលខណ្ឌពោធិ៍សែនជ័យ ពីមួយជំនាន់ទៅមួយជំនាន់ ឬក៏មានមូលហេតុអ្វីផ្សេងនៅពីក្រោយខ្នង ? ទើបធ្វើឲ្យទំនាស់ក្ដីក្ដាំគ្នា រវាងគណៈអភិបាលខណ្ឌមួយនេះ ជាមួយនិងអ្នកសង់សំណង់លើដីចំណីផ្លូវ បង្កផលប៉ះពាល់ការពង្រីកផ្លូវជាតិលេខ៣…
រាជធានីភ្នំពេញ ៖ តើជាភាពកម្សោយរបស់គណៈអភិបាលខណ្ឌពោធិ៍សែនជ័យ ពីមួយជំនាន់ទៅមួយជំនាន់ ឬក៏មានមូលហេតុអ្វីផ្សេងនៅពីក្រោយខ្នង ? ទើបធ្វើឲ្យទំនាស់ក្ដីក្ដាំគ្នា រវាងគណៈអភិបាលខណ្ឌមួយនេះ ជាមួយនិងអ្នកសង់សំណង់លើដីចំណីផ្លូវ បង្កផលប៉ះពាល់ការពង្រីកផ្លូវជាតិលេខ៣ បន្តអូសបន្លាយពេលដ៏រ៉ាំរ៉ៃរហូតមកដល់ពេលនេះ ?
បើគិតរហូតមកដល់ឆ្នាំ២០២៤នេះ មានរយៈពេល១៣ឆ្នាំទៅហើយ ដែលគណៈអភិបាលខណ្ឌពោធិ៍សែនជ័យ ក្នុងនាមខ្លួនជាអាជ្ញាធរផងនិងជាដើមបណ្ដឹងដែលបានឈ្នះក្ដីនៅសាលាដំបូងរាជធានីភ្នំពេញ ព្រមទាំងការគាំទ្រពីក្រសួងយុត្តិធម៌ និងរដ្ឋបាលរាជធានីភ្នំពេញផងនោះ ត្រូវបានគេមើលឃើញថា មានភាពទន់ខ្សោយ ។ ដោយមិនអាចអនុវត្តសាលក្រមរបស់សាលដំបូងរាជធានីភ្នំពេញ ដើម្បីរុះរើសំណង់របងថ្មមួយកន្លែងដែលសង់រំលោភលើដីចំណីផ្លូវជាតិលេខ៣បាន ហើយបើគិតពីការកាន់តំណែងរបស់អភិបាលរាជធានីភ្នំពេញវិញចំនួន៣រូប និងអភិបាលខណ្ឌនោះ ក៏ចំនួន៣រូបហើយដែរ ប៉ុន្តែរឿងនៅតែអូសបន្តបន្លាយមិនអាចបញ្ចប់ និងរំដោះដីចំណីផ្លូវបានដដែល ។
យោងតាមឯកសារជាច្រើនបានបញ្ជាក់ថា រឿងទំនាស់មួយនេះ បានកើតឡើងតាំងពីឆ្នាំ២០១១មកម្ល៉េះ គឺរយៈពេល១៣ឆ្នាំមកកន្លងហើយ រវាងគណៈអភិបាលខណ្ឌពោធិ៍សែនជ័យ ទល់និងបុគ្គលឈ្មោះ ហ៊ុល មុំ ភេទស្រី អាយុ៦៣ឆ្នាំ មានទីលំនៅ ផ្លូវជាតិលេខ៣ ភូមិព្រៃព្រីងខាងត្បូង១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ដែលអាជ្ញាធរខណ្ឌនោះអះអាងថា ឈ្មោះហ៊ុល មុំ បានកាន់កាប់ដីចំណីផ្លូវដោយខុសច្បាប់ប៉ះពាល់ដល់គម្រោងរបស់រាជរដ្ឋាភិបាល ក្នុងការពង្រីកផ្លូវជាតិលេខ៣នៅពេលនោះ ហើយឈ្មោះ ហ៊ុល មុំ បានកាន់កាប់ដីចំណីផ្លូវជាតិលេខ៣នេះច្រើនឆ្នាំមកហើយ និងបានសង់របងថ្មរឹងមាំកម្ពស់១,៨ម៉ែត្រ និងបណ្ដោយ១២ម៉ត្រ ព្រមទាំងកន្លែងលក់ដូរនៅលើដីចំណីផ្លូវជាតិលេខ៣នេះផងដែរ ។
បន្ទាប់ពីបានឃើញថា មានការប៉ះពាល់ដល់គម្រោងពង្រីកផ្លូវជាតិលេខ៣របស់រាជរដ្ឋាភិបាលបែបនេះរាជរដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ និងសាលារាជធានីភ្នំពេញ និងសាលាខណ្ឌពោធិ៍សែនជ័យ ក៏បានប្រើយន្តការដោះស្រាយផលប៉ះពាល់នានាជូនប្រជាពលរដ្ឋ ហើយឈ្មោះហ៊ុល មុំ ក៏ទទួលបានសំណងគោលនយោបាយចំនួន៥៦០,៨(ប្រាំរយហុកសិបដុល្លារ ក្បៀសប្រាំបីសេន) ដែលមានប័ណ្ណប្រគល់ប្រាក់ លេខ០០០២៥៤ ចុះថ្ងៃទី០៥ ខែមករា ឆ្នាំ២០១១ ជាថ្នូរនិងការុះរើរបងថ្មនេះចេញ ។
នៅពេលនោះ គាត់បានយល់ព្រមទទួលយកសំណង និងយល់ព្រមថា និងរុះរើសំណង់របស់ខ្លួនដោយស្ម័គ្រចិត្ត ប៉ុន្តែក្រោយពីទទួលប្រាក់សំណងរួចគាត់ បែរជាពុំបានគោរពតាមការសន្យារបស់ខ្លួននោះទេ ។ ដោយឡែក អាជ្ញាធរខណ្ឌពោធិ៍សែនជ័យបានចុះទៅធ្វើការរុះរើច្រើនដង ប៉ុន្តែមិនដែលបានសម្រេចនោះឡើយ ដោយខាងឈ្មោះហ៊ុល មុំ និងក្រុមគ្រួសាររបស់គាត់បានកាន់ដុំឥដ្ឋ និងដុំថ្មធ្វើការរារាំងពាំងមិនឲ្យគ្រឿងចក្រ និងកម្លាំងអាជ្ញាធរមានសមត្ថកិច្ចធ្វើការកើតឡើយ ទើបឈានដល់មានរឿងចម្រូងចម្រាស់ប្ដឹងផ្ដល់គ្នាកើតឡើងរហូតមក ។
ឯកសារដដែលបានឲ្យដឹងទៀតថា ខាងលើគឺជាដើមចមនៃរឿងទំនាសើដែលបានកើតឡើង រីឯការប្ដឹងផ្ដល់គ្នានោះ ខាងគណៈអភិបាលខណ្ឌពោធិ៍សែនជ័យ តំណាងដោយ លោក ប៉ាង លីដា ជាអភិបាលរងខណ្ឌពោធិ៍សែនជ័យ និងលោកមេធាវី ផេង ស៊ីដេត ជាមេធាវីតំណាងដោយអាណត្តិម្ចាស់បំណុល ។ ចំណែកឈ្មោះ ហ៊ុល មុំ មានលោកមេធាវី ពេជ្រ ផល្លាសម្បត្តិ អត្តលេខ១០៤១ និងលោកមេធាវី ឡាយ ចាន់ឡេង ជាមេធាវីតំណាងដោយអាណត្តិកូនបំណុល ហើយក្រោយមកអាជ្ញាសាលានៃសាលាដំបូងរាជធានីភ្នំពេញ បានចេញលិខិតជូនដំណឹងអំពីការអនុវត្តន៍ដោយស្ម័គ្រចិត្ត និងបង្កើតគណៈកម្មការចម្រុះចុះរុះរើ ក៏នៅតែមិនបានសម្រេច ។
ចំណែកសាលាដំបូងរាជធានីភ្នំពេញ ក៏បានចេញសាលក្រុមឲ្យអនុវត្តការរុះរើ និងចេញដីកាសម្រេចរក្សាការពារ ដោយសម្រេចឲ្យឈ្មោះ ហ៊ុល មុំ រុះរើរបងថ្មមានកំពស់ ១,៨ម៉ែត្រ បណ្តោយ ១២ម៉ែត្រចេញជាបន្តបន្ទាប់ ។ រហូតដល់មានលិខិតអន្តរាគមន៍ពីក្រសួងយុត្តិធម៌ ដើម្បីឲ្យអាជ្ញាធម៌ដែនដីចុះអនុវត្តយកដីចំណីផ្លូវទុកជាសម្បត្តិរដ្ឋវិញថែមទៀតផង ក៏នៅតែមិនអាចយកដីចំណីផ្លូវពីឈ្មោះហ៊ុល មុំ វិញ បាននៅឡើយ ដែលនេះបានបញ្ជាក់ពីភាពកម្សោយរបស់អាជ្ញាធរ ដែលចង់បញ្ចប់រឿងក៏បញ្ចប់មិនបាន និងចង់យកដីចំណីផ្លូវពីកណ្ដាប់ដៃឈ្មោះហ៊ុល មុំ ទុកជាសម្បត្តិរដ្ឋវិញក៏យកអត់បាន ។
ដោយឡែក ខ្លឹមសារ១ចំណុចនៅក្នុងដីកាសម្រេចរក្សាការពារចុះថ្ងៃទី២៣ ខែមិថុនា ឆ្នាំ២០២១ ចេញដោយលោក អ៊ុម វណ្ណៈ ចៅក្រមសាលាដំបូងរាជធានីភ្នំពេញបានបញ្ជាក់ថា តាមកំណត់ហេតុសាកសួរភាគីកូនបំណុល ឈ្មោះ ហ៊ុល មុំ ដោយមានលោកមេធាវី ពេជ្រ ផល្លាសម្បត្តិ និងលោកមេធាវី ឡាយ ចាន់ឡេង ជាតំណាងបានថ្លែងការណ៍ថា ខ្លួនបានកាន់កាប់អចលនវត្ថុទំហំ១២ម៉ែត្រ គុណនិង១២ម៉ែត្រ មានទីតាំងស្ថិតនៅភូមិព្រៃព្រីងខាងត្បូង១ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ តាំងពីឆ្នាំ១៩៧៩ តាមរយៈលិខិតបញ្ជាក់កម្មសិទ្ធិត្រឹមសាលាខណ្ឌពុំមានប្លង់រឹងទេ ។ កន្លងមក ខ្លួនបានទទួលសំណងពីគម្រោងពង្រីកផ្លូវជាតិលេខ៣ ចំនួន៥៦០ (ប្រាំរយហុកសិប)ដុល្លារ ពីសាលារាជធានីភ្នំពេញពិតប្រាកដមែន ហើយខ្លួនរុះរើសំយាបផ្ទះមានបណ្តោយ១២ម៉ែត្រ និងទទឹងម៉ែត្រប្រហែល ៤ម៉ែត្ររួចហើយ ចំណែករបងថ្មដែលបានរុះរើបានកំពស់១,៨ម៉ែត្រនិងប្រវែង២ម៉ែត្រ។
បន្ទាប់មកទៀត អាជ្ញាធរបានចុះមកវាយរបងថ្មខ្លួនបន្ថែមទៀត ប៉ុន្តែក្រុមគ្រួសាររបស់ខ្លួនបានហាមឃាត់មិនឲ្យវាយរបងនោះបន្តទេ ព្រោះបើវាយបន្ថែមទៀតប៉ះពាល់ដល់ទ្រព្យសម្បត្តិរបស់ខ្លួន និងសុវត្តិភាពក្រុមគ្រួសារ ។ កន្លងមកខ្លួនបានទទួល សំណងគោលនយោបាយពិតប្រាកដមែន ប៉ុន្តែអាជ្ញាធរពុំមានបញ្ជាក់ពីប្រវែងរបងប៉ះពាល់ទេ ហេតុដូច្នេះ ខ្លួនសុំច្រានចោលពាក្យសុំចេញដីកាសម្រេចចាត់ចែងជាបណ្តោះអាសន្ន ចុះថ្ងៃទី១៥ ខែមករា ឆ្នាំ២០២១ របស់លោកមេធាវី ផេង ស៊ីដេត ។
តាមការពិនិត្យស្ថានភាពបច្ចុប្បន្នខ្លួនឃើញថា មានប្រជាពលរដ្ឋជាច្រើនដែលទទួល បានសំណងគោលនយោបាយពីសាលារាជធានីភ្នំពេញ ដែលសុទ្ធតែធ្វើសំណង់រឹងមាំរំលោភលើគោលការណ៍ របស់សាលារាជធានីភ្នំពេញ ចាប់ពីភូមិក្រាំងដូនតីដល់រង្វង់មូលចោមចៅ ស្ថិតនៅក្នុងខណ្ឌពោធិ៍សែនជ័យ ដូចគ្នា ពុំបានរុះរើតាមការដោះស្រាយគោលនយោបាយរបស់សាលារាជធានីភ្នំពេញ
ទេ ។
យោងតាមឯកសាររបស់អាជ្ញាធរខណ្ឌពោធិ៍សែនជ័យ បច្ចុប្បន្ន ឈ្មោះហ៊ុល មុំ នេះ មិនត្រឹមតែវាយរបងចោលទេ ថែមទាំងធ្វើកន្លែងលក់ដូរលើដីចំណីផ្លូវថែមទៀតផង ហើយគាត់ពុំមែនគ្មានផ្ទះនៅនោះទេ គឺគាត់មានផ្ទះដល់ទៅ២ល្វែងនៅម្ដុំនោះដែរ ដោយផ្ទះមួយបានជួលឲ្យគេដាក់គ្រឿងសំណង់ និងផ្ទះមួយទៀតគាត់រស់នៅដោយខ្លួនឯង ។
ទោះបីជាបែបណា ការអូសបន្លាយពេលនៃការបោសសម្អាតការរំលោភបំពានកាន់កាប់ចំណីផ្លូវសាធារណៈដៃរ៉ាំរៃនេះ គូសបញ្ជាក់ឲ្យឃើញថា ជាភាពកម្សោយរបស់អាជ្ញាធរមានសមត្ថកិច្ចគ្រប់លំដាប់ថ្នាក់ ជាពិសេស អាជ្ញាធរខណ្ឌពោធិ៍សែនជ័យតែម្ដង ។ មិនតែប៉ុណ្ណោះ និងធ្វើឲ្យមានការកាន់កាប់រំលោភបំពានយកដីចំណីផ្លូវខាងលើ ពីសំណាក់បុគ្គលផ្សេងទៀតក្រៅពីឈ្មោះហ៊ុល មុំ មានកើនឡើងនិងបង្កឲ្យមានភាពស្មុគស្មាញកាន់តែខ្លាំងទៅថ្ងៃអនាគតថែមទៀត ៕
ចែករំលែកព័តមាននេះ