ទីក្រុងយេរូសាឡឹម៖ ថ្មីៗនេះ រដ្ឋាភិបាលទីក្រុងវ៉ាស៊ីនតោនប្រកាសថាខ្លួនត្រៀមបញ្ជូនប្រព័ន្ធមីស៊ីលការពារដែនអាកាសដ៏ទំនើបម៉ាកសាត (THAAD) ទៅប្រទេសអ៊ីស្រាអែលដើម្បីពង្រឹងប្រព័ន្ធការពារដែនអាកាសដែលមានស្រាប់។ ចំណាត់ការនេះធ្វើឡើងនៅពេលមានអ៊ីរ៉ង់ និងអ៊ីស្រាអែលកំពុងសង្គ្រឺតធ្មេញដាក់គ្នា ហើយអាចនឹងវាយប្រហារគ្នាទៅវិញទៅមក។ ជាពិសេស គេដឹងថាឆាប់ៗនេះអ៊ីស្រាអែលនឹងពន្លះអ៊ីរ៉ង់១ប្រាវដើម្បីសងសឹកចំពោះវគ្គមុនដែលអ៊ីរ៉ង់បាញ់មីស៊ីល១៨០គ្រាប់។
សេចក្ដីប្រកាសរបស់ក្រសួងការពារជាតិអាមេរិក (មន្ទីរបញ្ចកោណ) ដូចខាងលើនេះក៏ធ្វើឡើងបន្ទាប់ពីអ៊ីរ៉ង់ទើបតែចេញសេចក្ដីព្រមានធ្ងន់ៗ និងដោយប្រាកដប្រជាថាអាមេរិកគួរកុំរក្សាទុកកងទ័ពនៅលើទឹកដីអ៊ីស្រាអែលបើមិនចង់មានរឿងជាមួយគ្នា។ គេដឹងថាក្រៅពីគម្រោងបញ្ជូនមីស៊ីលការពារដែនអាកាសនេះ អាមេរិកក៏ត្រៀមបញ្ជូនទាហានមួយចំនួនផងដែរ។
អ្នកនាំពាក្យមន្ទីរបញ្ចកោណ ឧត្ដមសេនីយ៍ប៉ាទ្រីក រ៉ាយដឺ(Patrick S. Ryder) ថ្លែងថាប្រមុខការពារជាតិអាមេរិក លោកឡយអូស្ទីន(Lloyd Austin) បានអនុម័តរួចហើយដើម្បីបញ្ជូនមីស៊ីលម៉ាកសាតនេះទៅអ៊ីស្រាអែលស្របតាមបទបញ្ជារបស់លោកបៃដិន។ ការវាយប្រហាររបស់អ៊ីរ៉ង់មិនអាចមើលស្រាលបានឡើយបន្ទាប់ពីប្រទេសនេះបាញ់មីស៊ីល២ដងចូលអ៊ីស្រាអែល។
អ៊ីរ៉ង់បាញ់លើកទី១កាលពីខែមេសាដើម្បីសងសឹកអ៊ីស្រាអែលដែលបាញ់មីស៊ីលដាក់ស្ថានកុងស៊ុលអ៊ីរ៉ង់នៅប្រទេសស៊ីរី។ ក្រោយមក អ៊ីរ៉ង់បាញ់មីស៊ីលលើកទី២កាលពីដើមខែតុលាដើម្បីសងសឹកអ៊ីស្រាអែលដែលបាញ់សម្លាប់មេដឹកនាំក្រុមហាម៉ាស់នៅលើទឹកដីអ៊ីរ៉ង់។ លោកបៃដិនបញ្ជាក់ថាលោកពិតជាបានបញ្ជាឱ្យបញ្ជូនមីស៊ីលការពារដែនអាកាសទៅអ៊ីស្រាអែលមែនដើម្បីការពារសម្ព័ន្ធមិត្តរបស់ខ្លួន។ តាមពិតទៅ អាមេរិកក៏បារម្ភអំពីផលប្រយោជន៍របស់ខ្លួននៅមជ្ឈិមបូព៌ាផងដែរ។
ឥឡូវនេះ គេកំពុងបារម្ភថាភ្លើងសង្គ្រាមនៅមជ្ឈិមបូព៌ាមិនអាចថយចុះទេ។ ប៉ុន្តែអាចនឹងផ្ទុះឡើងកាន់តែខ្លាំងទោះបីសហគមន៍អន្តរជាតិខិតខំធ្វើនយោបាយការទូតយ៉ាងដុតដៃដុតជើងដើម្បីបន្ធូរបន្ថយភាពតានតឹងយ៉ាងណាក្ដី។ ប្រភពខ្លះអះអាងថាអ៊ីស្រាអែលមិនត្រឹមតែមានគម្រោងវាយប្រហារទីតាំងប្រេងប៉ុណ្ណោះទេ ប៉ុន្តែចង់វាយទីតាំងនុយក្លេអ៊ែរថែមទៀត។
ដូច្នេះ រដ្ឋាភិបាលអ៊ីរ៉ង់តាមរយៈប្រមុខការទូតរបស់ខ្លួនបានប្រកាសជាចំហថាប្រទេសរបស់លោកមិនចង់មានបញ្ហាប្រទាំងប្រទើសគ្នាទេ។ ប៉ុន្តែអ៊ីរ៉ង់ក៏មិនអាចនៅស្ងៀមបានដែរបើគេរុញខ្នងឱ្យទល់ជញ្ជាំង។ រដ្ឋមន្ត្រីរូបនេះថ្លែងថារដ្ឋាភិបាលអ៊ីរ៉ង់ត្រៀមខ្លួនធ្វើសង្គ្រាមទ្រង់ទ្រាយធំ។ គ្រាន់តែថាសង្គ្រាមបើផ្ទុះឡើងកាន់តែខ្លាំងទូទាំងតំបន់មជ្ឈិមបូព៌ាអាចនឹងបង្កបញ្ហាខ្លាំងសម្រាប់ការដឹកជញ្ជូនទំនិញ ការនាំចេញប្រេងទៅកាន់ទីផ្សារអន្តរជាតិ ហើយធ្វើឱ្យមានវិបត្តិថាមពលទូទាំងពិភពលោក៕
ចែករំលែកព័តមាននេះ