រាជធានីភ្នំពេញ ៖ រដ្ឋមន្ត្រីក្រសួងអប់រំយុវជន និងកីឡា បានបញ្ជាក់យ៉ាងដូច្នេះថា ក្នុងករណីដែលរកឃើញកំហុសណាមួយរបស់ប្រធានមេប្រយោគ ក្នុងការកែវវិញ្ញាសាប្រឡងសញ្ញាបត្រទុតិយភូមិ(បាក់ឌុប) នោះនឹងមានការដាក់ទោសទណ្ឌ ខណៈមិនអនុញ្ញាតឲ្យលោកគ្រូអ្នកគ្រូលោកគ្រូដែលជាអ្នកកែរយកទូរស័ព្ទចូលពេលកំពុងធ្វើការកែវិញ្ញាសានោះរហូតដល់ម៉ោងចេញ។
នាថ្ងៃទី១១ ខែតុលា ឆ្នាំ២០២៤ នៅមណ្ឌលកំណែវិទ្យាល័យព្រះស៊ីសុវត្ថិ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំ ស្ដីពីការណែនាំបច្ចេកទេសដល់ប្រធាន អនុប្រធានមណ្ឌលកំណែសម្រាប់ការប្រឡង សញ្ញាបត្រមធ្យមសិក្សាទុតិយភូមិ សម័យប្រឡង៖ ០៨ តុលា ២០២៤ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំ តំណាងអង្គភាពប្រឆាំងអំពើពុករលួយ និងមន្ត្រីពាក់ព័ន្ធក្រោមឱវាទ ប្រធាន អនុប្រធានមណ្ឌលកំណែ គណៈកម្មការអប្បមាទមណ្ឌលកំណែ បុគ្គលិកអប់រំនាយកដ្ឋានកិច្ចការប្រឡង សរុបចំនួនប្រមាណ ១៦៨ រូប។
ឯកឧត្តមរដ្ឋមន្ត្រីបានលើកឡើងថាកិច្ចការបេក្ខជននីមួយៗ នឹងត្រូវកែដោយអ្នកកែពីរនាក់ដាច់ ខាត ដោយគោរពតាមអត្រាកំណែដែលគណៈមេប្រយោគបានសម្រេច ស្របតាមយន្តការ និងនីតិវិធីកំណែដាក់ចេញដោយក្រសួង។ ចំណែកឯ កិច្ចការបេក្ខជនពិការភ្នែក ត្រូវធ្វើកំណែពិសេសដោយគ្រូបង្រៀនសិស្សពិការភ្នែក ទៅតាមអត្រាកំណែដោយឡែក។
ក្នុងគោលដៅធានាឱ្យបាននូវសុក្រឹតភាព យុត្តិធម៌ តម្លាភាព ប្រសិទ្ធភាព និងទទួលបានលទ្ធផលឆ្លើយតបនឹងគោលការណ៍ “អ្នកចេះគឺជាប់” ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្ដល់អនុសាសន៍ដល់ក្រុមការងារ ឱ្យបន្ថែមការយកចិត្តទុកដាក់ប្រុងប្រយ័ត្នលើរបៀបរៀបរយនៃការៀបចំសន្លឹកកិច្ចការប្រឡងរបស់បេក្ខជន ដោយត្រូវរៀបតាមលំដាប់លំដោយ រួចកិបឱ្យជាប់ ចុះអក្សរសម្ងាត់ និងលេខរៀងបន្តឱ្យបានត្រឹមតែ មុនកាត់ក្បាលសន្លឹកកិច្ចការយកទៅកែ ពង្រឹងយន្តការផ្ទៀតផ្ទាត់លទ្ធផលកំណែ និងមានការដាក់ទោសទណ្ឌប្រសិនបើរកឃើញកំហុសក្នុងការអនុវត្តការងារ។
ព្រមទាំងបានគូសបញ្ជាក់ថា មិនអនុញ្ញាតឱ្យបញ្ចប់ការកែមុនពេលកំណត់ និងមិនអនុញ្ញាតឱ្យប្រើប្រាស់ទូរស័ព្ទក្នុង និងក្រៅបន្ទប់មណ្ឌលកំណែរហូតដល់ម៉ោងចេញទៅផ្ទះ ដើម្បីបង្ការការថតបង្ហោះ និងការប្រើប្រាស់ទូរស័ព្ទរំខានដល់ដំណើរការកំណែ។
ជាថ្មីម្ដងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរ គុណយ៉ាងជ្រាលជ្រៅដល់ភាគីពាក់ព័ន្ធទាំងអស់ ជាពិសេសក្រុមការងារអង្គភាពប្រឆាំងអំពើពុករលួយដែលបានផ្តល់នូវកិច្ចសហការប្រកបដោយការទទួលខុសត្រូវខ្ពស់តាំងពីចាប់ផ្តើមការប្រឡងរហូតមកដល់ពេលនេះ និងសូមជំរុញលើកទឹកចិត្តឱ្យក្រុមការងារបច្ចេកទេសបន្តខិតខំប្រឹងប្រែងសហការចែករំលែកបទពិសោធគ្នា ដើម្បីជំរុញឱ្យដំណើរការកំណែប្រព្រឹត្តិទៅប្រកបដោយភាពរលូន និងជោគជ័យ ដោយបានរំលេចថា ឆ្នាំនេះក្រសួងនឹងផ្ដល់ពានរង្វាន់មណ្ឌលកំណែគំរូ សម្រាប់លេខ១ លេខ២ និង លេខ៣។
សូមជម្រាបថាដំណើរការកំណែសន្លឹកកិច្ចការប្រឡងនេះ ក្រសួងអប់រំបានកំណត់យក វិទ្យាល័យចំនួន១០ នៅរាជធានីភ្នំពេញធ្វើជាមណ្ឌលកំណែដោយ មួយមណ្ឌលកំណែកែមួយមុខវិជ្ជា ក្នុងនោះរួមមាន ៖ ១). មណ្ឌលកំណែ ៖ វិទ្យាល័យព្រះស៊ីសុវត្ថិ (មុខវិជ្ជា អក្សរសាស្ត្រខ្មែរ)
២).មណ្ឌលកំណែ ៖ វិទ្យាល័យបាក់ទូក (មុខវិជ្ជា គណិតវិទ្យា)
៤). មណ្ឌលកំណែ ៖ វិទ្យាល័យ ហ៊ុន សែន ប៊ុនរ៉ានី វត្តភ្នំ (មុខវិជ្ជា ប្រវត្តិវិទ្យា)
៤). មណ្ឌលកំណែ ៖ វិទ្យាល័យ ជា ស៊ីម សន្ធរម៉ុក (មុខវិជ្ជា ភាសាបរទេស)
៥). មណ្ឌលកំណែ ៖ វិទ្យាល័យ ព្រះយុគន្ធរ (មុខវិជ្ជា ភូមិវិទ្យា)
៦). មណ្ឌលកំណែ ៖ បឋមសិក្សា សន្ធរម៉ុក (មុខវិជ្ជា សីលធម៌ ពលរដ្ឋវិជ្ជា)
៧). មណ្ឌលកំណែ ៖ វិទ្យាល័យ ទួលទំពូង (មុខវិជ្ជា ផែនដី និងបរិស្ថានវិទ្យា)
៨). មណ្ឌលកំណែ ៖ អនុវិទ្យាល័យ ចតុមុខ (មុខវិជ្ជា រូបវិទ្យា)
៩). មណ្ឌលកំណែ ៖ វិទ្យាល័យ ជា ស៊ីម បឹងកេងកង (មុខវិជ្ជា គីមីវិទ្យា)
១០). មណ្ឌលកំណែ ៖ វិទ្យាល័យ បឹងត្របែក (មុខវិជ្ជា ជីវវិទ្យា)៕
ចែករំលែកព័តមាននេះ