រាជធានីភ្នំពេញ ៖ ជនសង្ស័យ៣នាក់ បានធ្វើសកម្មភាពជិះម៉ូតូឌុបគ្នា ទៅលួចម៉ូតូស្កូពី១គ្រឿង ពីជនរងគ្រោះបានសម្រេច ប៉ុន្តែភ្លេចយកម៉ូតូរបស់ខ្លួនទៅវិញ កាលពីវេលាម៉ោង២រំលងអធ្រាត្រ ឈានចូលថ្ងៃទី១១ ខែតុលា…
រាជធានីភ្នំពេញ ៖ ជនសង្ស័យ៣នាក់ បានធ្វើសកម្មភាពជិះម៉ូតូឌុបគ្នា ទៅលួចម៉ូតូស្កូពី១គ្រឿង ពីជនរងគ្រោះបានសម្រេច ប៉ុន្តែភ្លេចយកម៉ូតូរបស់ខ្លួនទៅវិញ កាលពីវេលាម៉ោង២រំលងអធ្រាត្រ ឈានចូលថ្ងៃទី១១ ខែតុលា ឆ្នាំ២០២៤ ស្ថិតនៅតាមបណ្តោយផ្លូវលេខ២១៩ សង្កាត់ផ្សារដើមគ ខណ្ឌទួលគោក រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ បុរសរងគ្រោះបានជិះម៉ូតូម៉ាកស្កូបពី ពណ៌ប្រផេះ ពាក់ស្លាកលេខ ភ្នំពេញ 1GL 6867 មកឈប់ក្រោមផ្ទះ រួចយកម្ហូបទៅអោយប្រពន្ធនៅលើផ្ទះ ស្រាប់តែមានជនសង្ស័យ៣នាក់ជិះម៉ូតូធំ១គ្រឿងឌុបគ្នាមកធ្វើសកម្មភាពលួចម៉ូតូរបស់គាត់បានសម្រេច ប៉ុន្តែក៏ស្រាប់តែភ្លេចយកម៉ូតូរបស់ពួកគេទៅជាមួយ ត្រូវបានប្រជាពលរដ្ឋនៅក្បែរកន្លែងកើតហេតុ នាំគ្នាស្រែកឆោឡោ បណ្តាលឲ្យភ័យនាំគ្នារុញម៉ូតូរបស់ជនរងគ្រោះ រត់គេចខ្លួនចោលម៉ូតូរបស់ពួកគេ នៅកន្លែងកើតហេតុតែម្តង ។
សូមបញ្ជាក់ថា ម៉ូតូរបស់ក្រុមជនសង្ស័យ គឺជាម៉ូតូ YAMAHA ប៉ុន្តែស្លាកលេខជាស្លាកលេខរបស់ម៉ូតូហុងដាឌ្រីម ទៅវិញហើយគេប្រទះឃើញកាំបិតបុ័ងតោ១ដើមនៅលើម៉ូតូថែមទៀត ។
ក្រោយពេលកើតហេតុ សមត្ថកិច្ចមូលដ្ឋានយកម៉ូតូ ដែលជនសង្ស័យទុកចោលនោះទៅរក្សាទុកនៅប៉ុស្តិ៍នគរបាលរដ្ឋបាលផ្សារដើមគ ដើម្បីស្រាវជ្រាវជាបន្តដោយសង្ស័យម៉ូតូខាងលើជាម៉ូតូរបស់ជនសង្ស័យធ្វើសកម្មភាពលួចបានមុនពេលមកលួចម៉ូតូស្កូបពី ។ ចំណែកជនរងគ្រោះបានទៅដាក់ពាក្យបណ្តឹងដើម្បីស្វែងរកជនសង្ស័យមកអនុវត្តតាមនីតិវិធីនៅពេលក្រោយ ៕
ចែករំលែកព័តមាននេះ