ទីក្រុងម៉ូស្គូ៖ រុស្ស៊ីថ្លែងថាបើអ៊ុយក្រែននៅតែចង់ចូលជាសមាជិកអង្គការណាតូទៀតមានន័យថាសន្តិភាពមិនអាចកើតមាននៅលើទឹកដីនេះបានឡើយ។ ការថ្លែងដូច្នេះធ្វើឡើងតាមរយៈអ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា សាការ៉ូវ៉ា (Maria Zakharova) ដែលបារម្ភថាអ៊ុយក្រែនលែងក្លាយជាដែនដីអព្យាក្រឹត្យតទៅទៀតហើយបើសិនចូលអង្គការណាតូ។
លោកពូទីនធ្លាប់បានលើកឡើងជាច្រើនដងមកហើយថាការចរចាសន្តិភាពអាចធ្វើទៅបានលុះត្រាតែទីក្រុងកៀវយល់ព្រមកាត់ទឹកដីរបស់ខ្លួនមួយផ្នែកទៅឱ្យរុស្ស៊ីដើម្បីធ្វើជាតំបន់ទ្រនាប់ ហើយអ៊ុយក្រែនមិនត្រូវចូលជាសមាជិកអង្គការណាតូជាដាច់ខាត។ ដោយសារតែចង់ចូលណាតូហ្នឹងហើយបានជាលោកពូទីនបញ្ជាឱ្យវាយប្រហារកាលពីចុងខែកុម្ភៈ ឆ្នាំ២០២២។
ប៉ុន្តែអគ្គលេខាធិការអង្គការណាតូ លោកម៉ាករ៉ាត់ ទើបតែប្រកាសពីទីក្រុងប្រ៊ុចសែលថាការត្រៀមខ្លួនចូលជាសមាជិកណាតូរបស់អ៊ុយក្រែនចេះតែវិវត្តទៅមុខហើយ ហើយមិនអាចប្រែក្រឡាស់ថយក្រោយវិញឡើយ។ លោកស្រីម៉ារីយ៉ាថ្លែងដោយយោងទៅលើប្រភពស៊ើបការណ៍សម្ងាត់ពីភ្នាក់ងារចារកម្មរុស្ស៊ីថាក្រុមបស្ចិមប្រទេសកំពុងពិគ្រោះគ្នាទៅលើជម្រើសមួយ។
លោកម៉ាករ៉ាត់ (Mark Rutte) អគ្គលេខាធិការថ្មីរបស់អង្គការណាតូបើអ៊ុយក្រែនសុខចិត្តកាត់ដី១ចំណែកទៅឱ្យរុស្ស៊ី (ទាំងបង្ខំចិត្ត) ដើម្បីធ្វើយ៉ាងណាឱ្យរុស្ស៊ីបើកផ្លូវឱ្យអ៊ុយក្រែនចូលណាតូតើអាចទៅរួចទេ? លោកស្រីសូមបញ្ជាក់ថាទោះបីអ៊ុយក្រែនចង់បានសន្តិភាពដែលប្រកបដោយភាពយុត្តិធម៌ក៏មិនអាចទៅរួចដែរបើអ៊ុយក្រែនមិនអាចផ្ដល់នូវការធានាដ៏ប្រាកដប្រជាថាខ្លួនត្រូវតែប្រកាន់ជំហរអព្យាក្រឹត្យ និងមិនចូលបក្សសម្ព័ន្ធ។
នៅក្នុងព្រឹត្តិការណ៍ដាច់ដោយឡែកមួយទៀត ពាក់ព័ន្ធនឹងអ៊ុយចូលជាសមាជិកអង្គការណាតូនេះដែរ ប្រទេសហុងគ្រីដែលជាសមាជិកសហភាពអឺរ៉ុប និងក៏ជាសម្ព័ន្ធមិត្តរបស់លោកពូទីនផងដែរនោះ បានចេញសេចក្ដីព្រមានអមដោយការព្រួយបារម្ភថាបើអ៊ុយក្រែនចូលជាសមាជិកណាតូមែន ពេលនោះសង្គ្រាមលោកលើកទីបីអាចនឹងផ្ទុះឡើងជាមិនខានឡើយ។ ដោយសារមូលហេតុនេះហើយទើបបានជាហុងគ្រីសូមប្រកាសទុកជាមុនថាខ្លួនជំទាស់នឹងការពង្រីកសមាជិកភាពរបស់ណាតូ។
ហុងគ្រីយល់ថាសង្គ្រាមពិភពលោកអាចនឹងផ្ទុះឡើងព្រោះលក្ខខណ្ឌរបស់អង្គការណាតូបានចែងច្បាស់ណាស់។ បើសមាជិករបស់ខ្លួនទទួលរងការវាយប្រហារពីប្រទេសដទៃ អង្គការណាតូត្រូវតែចេញមុខជួយ។ ហុងគ្រីយល់ថាបើមនុស្សយើងគិតទៅដល់ចំណុចនេះឱ្យបានល្អិតល្អន់ កុំគិតសើៗលំៗ ពេលនោះពួកគេនឹងមិនហ៊ានប្រថុយនឹងរឿងនេះជាដាច់ខាត។
ហុងគ្រីសូមប្រកាសជំហរច្បាស់ៗថាករណីដែលអ៊ុយក្រែនចូលជាសមាជិកអង្គការណាតូមិនអាចទៅរួចទេ។ ហុងគ្រីអះអាងថាក្រុមរដ្ឋមន្ត្រីការបរទេសនៃរដ្ឋជាសមាជិកសហភាពអឺរ៉ុបក៏មានជំហរដូចគ្នានេះដែរនៅក្នុងកិច្ចចរចាគ្នាជាសម្ងាត់។ អ៊ុយក្រែនកំពុងប្រឈមនឹងឧបសគ្គជាច្រើននៅលើមាគ៌ាឆ្ពោះទៅរកសមាជិកភាពណាតូ។ ជាពិសេស នៅក្នុងស្ថានភាពដែលប្រទេសនេះកំពុងជាប់ដៃធ្វើសង្គ្រាមទល់នឹងមហាអំណាចយោធាពិភពលោកថែមទៅទៀតនោះ បញ្ហាកាន់តែស្មុគស្មាញ។
ឧទាហរណ៍ រដ្ឋជាសមាជិកណាតូមិនអញ្ជើញអ៊ុយក្រែនឱ្យចូលរួមមកិច្ចប្រជុំកំពូលនៅវ៉ាស៊ីនតោនកាលពីខែកក្កដាទេ។ រីឯសេចក្ដីថ្លែងការណ៍រួមរបស់ណាតូនិយាយដោយញញើតញញើមត្រង់ចំណុចដែលថាអ៊ុយក្រែននឹងបន្តដំណើរទៅមុខដើម្បីចូលជាសមាជិកណាតូដោយមិនអាចប្រែក្រឡាស់បានឡើយ។ ប៉ុន្តែណាតូមិនបានសន្យាដោយប្រាកដប្រជាថាត្រូវតែទទួលយកទេ។ ចំណុច១ទៀត វ៉ាស៊ីនតោនចង់ឃើញអ៊ុយក្រែនបញ្ចប់សង្គ្រាមជាមុនសិនមុននឹងគិតគូអំពីការចូលណាតូ៕
ចែករំលែកព័តមាននេះ