រាជធានីភ្នំពេញ ៖ ថ្លែងនៅចំពោះមុខថ្នាក់ដឹកនាំរបស់អាស៊ាន សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានគូសបញ្ជាក់ថា អាស៊ានត្រូវតែមានបុរេសកម្ម…
រាជធានីភ្នំពេញ ៖ ថ្លែងនៅចំពោះមុខថ្នាក់ដឹកនាំរបស់អាស៊ាន សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានគូសបញ្ជាក់ថា អាស៊ានត្រូវតែមានបុរេសកម្ម ចំពោះការប្រឈមមុខនឹងភាពស្មុគស្មាញ និងភាពមិនច្បាស់លាស់ ដែលកាន់តែខ្លាំងឡើង និងធ្វើការប្រមើលមើលគិតទុកជាមុន ដោយមានលក្ខណៈជាយុទ្ធសាស្ត្រ ។
យោងតាមលទ្ធផល នៃកិច្ចប្រជុំកំពូលអាស៊ានលើកទី៤៤ និង៤៥ របស់ក្រសួងការបរទេស នាថ្ងៃទី១០ ខែតុលា ឆ្នាំ២០២៤នេះ បានឱ្យដឹងថា សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញចូលរួមកិច្ចប្រជុំកំពូលអាស៊ាន លើកទី៤៤ និងលើកទី៤៥ និងកិច្ចប្រជុំកំពូលពាក់ព័ន្ធ ក្រោមមូលបទ “អាស៊ាន ៖ ការពង្រឹងការតភ្ជាប់ និងភាពធន់” ដែលដឹកនាំដោយ លោកបណ្ឌិត សនសៃ ស៊ីផាន់ដន នាយករដ្ឋមន្ត្រី នៃសាធារណរដ្ឋប្រជាធិបតេយ្យប្រជាមានិតឡាវ នៅទីក្រុងវៀងចន្ទន៍ នៅថ្ងៃទី៩ ខែតុលា ឆ្នាំ២០២៤ ។
ក្នុងនោះសម្តេចធិបតី បានសង្កត់ធ្ងន់ថា “ចំពោះការប្រឈមមុខនឹងភាពស្មុគស្មាញ និងភាពមិនច្បាស់លាស់ ដែលកាន់តែខ្លាំងឡើង ដោយបញ្ហាសន្តិសុខប្រពៃណី និងមិនប្រពៃណី ការឆ្លើយតបរួមរបស់អាស៊ាន ត្រូវតែមានភាពបុរេសកម្ម ការប្រមើលមើលគិតទុកជាមុន និងមានលក្ខណៈជាយុទ្ធសាស្ត្រ ដើម្បីត្រៀមខ្លួនប្រកបដោយភាពធន់ទៅនឹងអនាគត” ។
សម្តេចធិបតី នាយករដ្ឋមន្ត្រី នៃកម្ពុជា បានក៏ថ្លែងនៅក្នុងអង្គប្រជុំកំពូលអាស៊ានថា អាស៊ានគួរតែរក្សាការប្តេជ្ញាចិត្ត ចំពោះប្រព័ន្ធពាណិជ្ជកម្ម ពហុភាគី ដែលមានលក្ខណៈសេរី បើកចំហ បរិយាប័ន្ន យុត្តិធម៌ និងតម្លាភាព ។
សម្តេចធិបតី បានសង្កត់ធ្ងន់ថា “អាស៊ានគួរតែរក្សាការប្តេជ្ញាចិត្ត ចំពោះប្រព័ន្ធពាណិជ្ជកម្ម ពហុភាគី ដែលមានលក្ខណៈសេរី បើកចំហ បរិយាប័ន្ន យុត្តិធម៌ និងតម្លាភាព ទន្ទឹមនឹងនោះក៏បាន អំពាវនាវឱ្យអាស៊ានពង្រីកកិច្ចសហប្រតិបត្តិការពាណិជ្ជកម្ម ក្នុងចំណោមប្រទេសសមាជិក និងជាមួយដៃគូអាស៊ាន” ។
ជាមួយគ្នានេះ ដើម្បីរក្សាអាស៊ាន ជាកម្លាំងចលករសម្រាប់វិបុលភាពពិភពលោក សម្តេចធិបតី បានគូសបញ្ជាក់ថា “អាស៊ានគួរតែប្រើប្រាស់សក្តានុពលដ៏ធំ នៃវិស័យដែលកំពុងរីកចម្រើន ដូចជា សេដ្ឋកិច្ចឌីជីថល អន្តរកាលបៃតង សេដ្ឋកិច្ចពណ៌ខៀវ និងខ្សែច្រវាក់ផ្គត់ផ្គង់ប្រកបដោយភាពធន់ ដើម្បីបន្តទទួលបាននូវកំណើនខ្ពស់ប្រកបដោយនិរន្តរភាព” ៕
ចែករំលែកព័តមាននេះ