ទីក្រុងហ្សាកាតា៖ ប្រទេសឥណ្ឌូណេស៊ីនឹងដាក់ចេញកម្មវិធីបង្កើតផ្ទះបាយរាប់ពាន់កន្លែងដើម្បីចែកអាហារដោយឥតគិតថ្លៃជូនប្រជាជនរបស់ខ្លួនចាប់ពីដើមឆ្នាំ២០២៥តទៅ។ នេះជាផ្នែកមួយនៃកម្មវិធីនយោបាយរបស់រដ្ឋាភិបាលអាណត្តិថ្មីក្រោមការដឹកនាំរបស់លោកប្រាបូវ៉ូ ស៊ូប៊ីយ៉ាន់តូ (Prabowo Subianto)។ កម្មវិធីនេះគ្រោងចំណាយថវិការាប់ពាន់លានដុល្លារ។
លោកប្រាបូវ៉ូនឹងស្បថចូលកាន់តំណែងជាប្រធានាធិបតីឥណ្ឌូណេស៊ីនៅថ្ងៃទី២០ ខែតុលា។ នៅក្នុងដំណាក់កាលទី១នៃកម្មវិធីរបស់លោក លោកនឹងចម្អិនអាហារចែកជូនសិស្សសាលាម្ភៃលាននាក់ចាប់ពីដើមខែមករាតទៅ។ គម្រោងនេះនឹងប្រើប្រាស់ថវិកា៤,៥៤ពាន់លានដុល្លារ។ នៅពេលអនុវត្តពេញលេញ មនុស្ស៨៣លាននាក់នឹងទទួលបានប្រយោជន៍ពីកម្មវិធីនេះដើម្បីបិទបញ្ចប់ការខ្វះខាតអាហារូបត្ថម្ភនៅឥណ្ឌូណេស៊ី។ រដ្ឋនឹងត្រូវចំណាយថវិកា២៨ពាន់លានដុល្លារក្នុងមួយឆ្នាំៗ។
ប្រធានកម្មវិធីជាតិអាហារូបត្ថម្ភថ្លែងថាផ្ទះបាយយ៉ាងតិច៥ពាន់កន្លែងនឹងត្រូវដាក់ឱ្យដំណើរការជាបណ្ដើរៗរហូតដល់ឆ្នាំ២០២៧នឹងកើនឡើងដល់៣ម៉ឺនកន្លែង។ ក្រុមការងារខាងចម្អិនអាហារមិនមែនត្រឹមតែធ្វើការនៅក្នុងផ្ទះបាយប៉ុណ្ណោះទេ ប៉ុន្តែក៏មានតួនាទីជាអ្នកជំរុញការទិញកសិផលនៅក្នុងស្រុកផងដែរ។ កម្មវិធីនេះនឹងបង្កើតឱកាសការងារ១លានកន្លែង។
ដើម្បីឆ្លើយតបនឹងកម្មវិធីផ្ដល់អាហារដោយឥតគិតថ្លៃនេះ នៅឆ្នាំក្រោយគេនឹងចំណាយអង្ករជាង៣១ម៉ឺនតោន, សាច់មាន់ជាងកន្លះលានតោន ឬបើគ្មានសាច់មាន់គ្រប់ទេអាចប្រើប្រាស់ពងមាន់-ពងទាជាង៤ពាន់លានគ្រាប់, ទឹកដោះគោជាង៩រយលានលីត្រ និងបន្លែស្រស់ៗជាងកន្លះលានតោន។ នេះបើយោងតាមការគណនាតួលេខផ្ដល់អាហារ៦ថ្ងៃក្នុង១សប្ដាហ៍។
ប្រធានកម្មវិធីអាហារូបត្ថម្ភខាងលើនេះប្រាប់ថាផ្ទះបាយនៅក្នុងមណ្ឌលនីមួយៗត្រូវរ៉ាប់រងផ្ដល់អាហារជូនកុមារតូចៗចំនួនបីពាន់នាក់។ ដូច្នេះ ត្រូវប្រើប្រាស់អង្ករ២រយគីឡូ, សាច់មាន់៣៥០គីឡូ ឬបើគ្មានសាច់មាន់ទេត្រូវប្រើពងមាន់-ពងទា៣ពាន់គ្រាប់ និងបន្លែ៣៥០គីឡូ។ ចំណែកភេសជ្ជៈត្រូវប្រើប្រាស់ទឹកដោះគោស្រស់៦រយលីត្រ។ ទីភ្នាក់ងារអាហារូបត្ថម្ភចង់ផ្ដល់អាទិភាពទៅលើការប្រើប្រាស់គ្រឿងផ្សំនៅតាមមូលដ្ឋាន ហើយអាចនឹងកែសម្រួលគ្រឿងផ្សំ ឬមុខអាហារទៅតាមលទ្ធភាពជាក់ស្ដែង៕
ចែករំលែកព័តមាននេះ