ទីក្រុងវ៉ាស៊ីនតោន៖ នៅក្នុងកិច្ចប្រជុំអាស៊ានជាមួយប្រទេសជាដៃគូលើកនេះ ប្រមុខការទូតអាមេរិក លោកប្លីងខិន នឹងលើកយកបញ្ហាសិទ្ធិមនុស្សនៅមីយ៉ាន់ម៉ា, បញ្ហាសមុទ្រចិនខាងត្បូង និងបញ្ហាអ៊ុយក្រែនទៅពិភាក្សាគ្នា។ នេះបើយោងតាមមន្ត្រីការទូតអាមេរិកម្នាក់ទទួលបន្ទុកខាងកិច្ចការអាស៊ីបូព៌ាបានបង្ហើបឱ្យដឹង។ គាត់ប្រាប់ថាលោកបៃដិននៅតែយកចិត្តទុកដាក់ចំពោះតំបន់អាស៊ានជានិច្ច។ គ្រាន់តែថានៅក្នុងកិច្ចប្រជុំលើកនេះលោកមិនទៅចូលរួមទេ។
ក្រសួងការបរទេសអាមេរិកថ្លែងថាលោកប្លីងខិននឹងចាកចេញដំណើរទៅទីក្រុងវៀងចន្ទន៍ ប្រទេសឡាវ ហើយនឹងបន្តស្នាក់នៅទីនោះរហូតដល់ថ្ងៃសុក្រដើម្បីចូលរួមកិច្ចប្រជុំអាស៊ីបូព៌ា និងកិច្ចប្រជុំដទៃទៀត។ តាមពិត លោកត្រូវអមដំណើរលោកបៃដិនទៅប្រទេសអាល្លឺម៉ង់ និងអង់ហ្គោឡា។ ប៉ុន្តែដោយសារលោកបៃដិនពន្យារពេលធ្វើដំណើរ លោកប្លីងខិនក៏ឆ្លៀតទៅប្រទេសឡាវតែម្ដង។ ចំណែកលោកបៃដិនចង់យកពេលវេលានេះដើម្បីដោះស្រាយបញ្ហាខ្យល់ព្យុះឈ្មោះមីលតុន (Milton)។
មន្ត្រីការទូតខាងលើនេះប្រាប់ថាគម្រោងរបស់លោកប្លីងខិនទៅទីក្រុងវៀងចន្ទន៍លើកនេះដើម្បីជួបសមភាគីចិន។ ប៉ុន្តែគេមិនទាន់ដឹងលម្អិតពេកទេ។ គេគ្រាន់តែដឹងថាអាមេរិកកំពុងបារម្ភជាខ្លាំងនៅពេលប្រទេសចិនបន្តជួយឧបត្ថម្ភ-គាំទ្រប្រទេសរុស្ស៊ីដើម្បីធ្វើសង្គ្រាមនៅអ៊ុយក្រែន។ ពាក់ព័ន្ធនឹងបញ្ហានៅមីយ៉ាន់ម៉ា អាមេរិកកំពុងបារម្ភខ្លាំងថាការបោះឆ្នោតនៅមីយ៉ាន់ម៉ាអាចនឹងមានបញ្ហា។
អាមេរិកយល់ថាមីយ៉ាន់ម៉ាគួរកុំទាន់បោះឆ្នោត ហើយគួររង់ចាំរហូតដល់ប្រទេសជាតិមានសន្តិភាព និងការផ្សះផ្សារជាតិដ៏ពិតប្រាកដជាមុនសិនទើបរៀបចំការបោះឆ្នោតក៏មិនទាន់ហួសពេលដែរ។ អ្នកការទូតរូបនេះយល់ថាគ្មានការរីកចម្រើនទាល់តែសោះក្នុងការបញ្ចុះបញ្ចូលឱ្យរបបសឹករបស់លោកមីនអុងឡាំងកាត់បន្ថយអំពើហិង្សា និងដោះស្រាយបញ្ហាជាច្រើនទៀត៕
ចែករំលែកព័តមាននេះ