បាត់ខ្លួនក្មេងប្រុសស្រី២នាក់ ករណីលិចទូកកណ្តាលទន្លេ ពេលជិះឆ្លងមកពីលេងបងប្អូនវិញ
ខេត្តកំពង់ឆ្នាំង ៖ ហេតុការណ៍ លិចទូកឈើ ១គ្រឿង កាលពីវេលាម៉ោង០៦ និង២០នាទីយប់ថ្ងៃទី៤ ខែតុលា ឆ្នាំ២០២៤ នៅចំណុចភូមិសំរិទ្ធជ័យ…
ខេត្តកំពង់ឆ្នាំង ៖ ហេតុការណ៍ លិចទូកឈើ ១គ្រឿង កាលពីវេលាម៉ោង០៦ និង២០នាទីយប់ថ្ងៃទី៤ ខែតុលា ឆ្នាំ២០២៤ នៅចំណុចភូមិសំរិទ្ធជ័យ ឃុំកំពង់ត្រឡាច ស្រុកកំពង់ត្រឡាច ខណៈដែលក្មេងរងគ្រោះទាំង២នាក់ ជិះទូកឆ្លងទន្លេ ជាមួយឪពុក ត្រឡប់មកពីលេងក្រុមគ្រួសារវិញ ជួបភ្លៀងនិងខ្យល់ខ្លាំង បណ្តាលឱ្យក្រឡាប់ទូក ។
លោក នន ស៊ីណាត អធិការនគរបាលស្រុកកំពង់ត្រឡាច បានបញ្ជាក់នៅព្រឹកថ្ងៃទី៥ ខែតុលា នេះថា ក្រោយពេលកើតហេតុ លោក ស៊ុន សុវណ្ណារិទ្ឋិ អភិបាលខេត្តកំពង់ឆ្នាំង បានចុះដល់កន្លែងកើតហេតុ ដើម្បីដឹកនាំកម្លាំងសមត្ថិកិច្ចចម្រុះ ចុះអន្តរាគមន៍ជួយសង្គ្រោះភ្លាមៗ ជាមួយអាជ្ញាធរមូលដ្ឋាន ប្រជាការពារ និងប្រជាពលរដ្ឋ ដើម្បីស្វែងរកក្មេងប្រុសស្រី២នាក់ ដែលបានបាត់ខ្លួន រហូតដល់ម៉ោង១១យប់ ។
អធិការនគរបាលស្រុកកំពង់ត្រឡាច បានបន្តថា នៅមុនពេលកើតហេតុ បុរសឈ្មោះ ហាប់ មូសា ភេទប្រុស អាយុ៤០ឆ្នាំ ជនជាតិខ្មែរឥស្លាម រស់នៅភូមិសំរិទ្ធជ័យ ឃុំកំពង់ត្រឡាច ស្រុកកំពង់ត្រឡាច បានជិះទូក បំពាក់ម៉ាស៊ីន ១គ្រឿង មានគ្នា៤នាក់ ក្នុងនោះមានកូនបង្កើត២នាក់ និងក្មួយប្រុសម្នាក់ ត្រឡប់ពីមកលេងបងប្អូននៅត្រើយម្ខាងទន្លេវិញ ។ តែជាអកុសល នៅពេលទូកបានឆ្លងជិតពាក់កណ្តាលទន្លេ ស្រាប់តែមានភ្លៀង និងខ្យល់ខ្លាំង បានបោកបក់មកចំទូក បណ្តាលក្រឡាប់លិចតែម្តង ។ ក្នុងស្ថានភាពនេះ មនុស្ស២នាក់ ជួយសង្គ្រោះបាន គឺឪពុក និងកូនតូច អាយុ៥ឆ្នាំ ចំណែកក្មេងប្រុសស្រី២នាក់ទៀត កំពុងបាត់ខ្លួននៅឡើយ ។
លោក នន ស៊ីណាត បានបញ្ជាក់ថា ជនរងគ្រោះទាំង៤នាក់ រួមមាន ៖
១. ឈ្មោះ ហាប់ ម៉ូសា អាយុ៤៦ឆ្នាំ ត្រូវជាឪពុក និងជាម្ចាស់ទូក (សង្គ្រោះបាន)
២. ឈ្មោះ ម៉ូសា អាប់ទល់ឡោះ ភេទប្រុស អាយុ៥ឆ្នាំ ត្រូវជាកូន (សង្គ្រោះបាន)
៣. ឈ្មោះ ម៉ូសា ណូតហាយ៉ាទី ភេទស្រី អាយុ១៤ឆ្នាំ ត្រូវជាកូន (បាត់ខ្លួន)
និង៤. ឈ្មោះ សុគ្រី យ៉ាម៉ាល់ ភេទប្រុស អាយុ១៤ឆ្នាំ នៅសង្កាត់ច្រាំងចំរេះ២ ខ័ណឫស្សីកែវ ត្រូវជាក្មួយ (បាត់ខ្លួន) ។
ប្រភពដដែល បានបន្ថែមថា ការស្វែងរកជនរងគ្រោះ រហូតដល់ម៉ោងជាង១១យប់ នៅមិនទាន់រកឃើញនៅឡើយទេ ក្រោមកិច្ចដឹកផ្ទាល់ពីលោកអភិបាលខេត្តកំពង់ឆ្នាំង ដែលមានសមត្ថកិច្ចចម្រុះ និងប្រជាពលរដ្ឋជាច្រើននាក់ ហើយនៅព្រឹកថ្ងៃទី៥ ខែតុលានេះ នឹងបន្តស្វែងរកក្មេងរងគ្រោះ ដែលបានបាត់ខ្លួនទាំង២នាក់បន្តទៀត ៕
ចែករំលែកព័តមាននេះ