រាជធានីភ្នំពេញ ៖ នារសៀល ថ្ងៃទី០៤ ខែតុលា ឆ្នាំ២០២៤ រដ្ឋបាលរាជធានីភ្នំពេញ បានបើកកិច្ចប្រជុំ ដើម្បីពង្រឹងវិធានការការពារ និងរក្សាសន្តិសុខ…
រាជធានីភ្នំពេញ ៖ នារសៀល ថ្ងៃទី០៤ ខែតុលា ឆ្នាំ២០២៤ រដ្ឋបាលរាជធានីភ្នំពេញ បានបើកកិច្ចប្រជុំ ដើម្បីពង្រឹងវិធានការការពារ និងរក្សាសន្តិសុខ សណ្តាប់ធ្នាប់ នៃការប្រឡងមធ្យមសិក្សាទុតិយភូមិ«បាក់ឌុប » នៅតាមមណ្ឌលប្រឡង ក្នុងរាជធានីភ្នំពេញ ។
កិច្ចប្រជុំនោះ ក្រោយអធិបតីភាពលោក កើត ឆែ អភិបាលរាជធានីភ្នំពេញ ស្តីទី តំណាងលោក ឃួង ស្រេង អភិបាលរាជធានីភ្នំពេញ និងលោក ជា ជាតិ អនុរដ្ឋលេខាធិការ ក្រសួងអប់រំ យុវជន និងកីឡា លោក ឃាង សេង អនុប្រធានអង្គភាពប្រឆាំងអំពើពុករលួយ និងអភិបាល និងអភិបាលរងខណ្ឌ ទាំងអស់ ព្រមទាំងមន្ត្រី រួមជាមួយសមត្ថកិច្ចក្រោមឱវាទរដ្ឋបាលរាជធានីភ្នំពេញ ។
ក្នុងឱកាសលោក កើត ឆែ អភិបាលរាជធានីភ្នំពេញស្តីទី បានលើកឡើងថា ការប្រឡងនេះ គឺជាពានរង្វាន់សម្រាប់រាជរដ្ឋាភិបាល អាណត្តិទី៧ ដែល ដឹកនាំដោយសម្តេចមហាបវរធិបតី ហ៊ុន ម៉ាណែត រក្សាពានរង្វាន់ ដែលប្រជាពលរដ្ឋសាទរ ក្នុងការកែទម្រង់វិស័យអប់រំនេះឱ្យបាន ។
លោក កើត ឆែ អះអាងថា សម្ដេចធិបតី ហ៊ុន ម៉ាណែត យកចិត្តទុកដាក់ពង្រឹងការអប់រំ តាំងពីបឋមសិក្សាឱ្យខ្លាំង ជាគោលនយោបាយរាជរដ្ឋភិបាល អណត្តិទី៧ ដោយសម្ដេចធិបតី បានចំណាយពេលវេលាដ៏មានតម្លៃបំផុត ធ្វើដំណើរតាមរថយន្តចុះតាមបណ្ដាខេត្តនានា ដើម្បីដឹងសុខទុក្ខ និងពីតម្រូវការរបស់ប្រជាពលរដ្ឋ បើប្រទេសយើងមានមនុស្សពូកែច្រើននាក់ ធ្វើឱ្យប្រទេសមានការរីកចម្រើន យើងហ្នឹង ដើរដល់គោលដៅ ។
លោក បន្តទៀតថា មន្ត្រីពាក់ព័ន្ធ ត្រូវមានមុខនៅតាមមណ្ឌលប្រលង នៅថ្ងៃទី៨ ខែតុលានេះ សូមឱ្យនគរបាលចរាចរណ៍ផ្លូវគោក ដកដៃចេញពីវិធានការត្រួតពិនិត្យ ការផាកពិន័យ ទៅជាការជួយសម្រួល និងដោះស្រាយចរាចរណ៌ ដោយប្រើប្រាស់កម្លាំងអន្តរាគមន៍របស់អាជ្ញាធរ ដើម្បីជួយ សម្របសម្រួលនៅពេលកកស្ទះតាមដងផ្លូវ ដើម្បីឲ្យបេក្ខជនទៅប្រឡងឲ្យបានទាន់ពេលវេលា ។
លោកបញ្ជាក់ទៀតថា ដោយឡែករថយន្តក្រុង នៅរក្សាខ្សែរត់ និងពេលវេលាដដែល ។ លោក កើត ឆែ បានបញ្ជាក់ច្បាស់ថា ចំពោះការផ្ញើកង់ម៉ូតូ នៅតាមមណ្ឌលប្រឡង មិនឱ្យបង់ប្រាក់ទេ ព្រោះរដ្ឋបាលរាជធានីភ្នំពេញ បានចេញប្រាក់ជំនួសហើយ ។
លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ បានឱ្យដឹងថា នៅរាជធានីភ្នំពេញ មានមណ្ឌលសំណេរ ចំនួន ៣២មណ្ឌល ស្មើនឹង១,០៣៧បន្ទប់ មានបេក្ខជនចំនួន ២៥,៧៣៩នាក់ និងមណ្ឌលកំណែ ចំនួន១០មណ្ឌល ។
លោកប្រធានមន្ទីរ បន្តថា ក្នុងចំណោមបេក្ខជនប្រឡងឆ្នាំនេះ មានបេក្ខជនស្វ័យរិន ចំនួន៥,៨៣៧នាក់ និងជនពិការភាព(គ.ថ្លង់) ១៣នាក់ ។ សម្រាប់រាជធានីភ្នំពេញ បានជ្រើសយកវិទ្យាល័យ ព្រះស៊ីសុវត្ថិ រក្សាសុវត្ថិភាព វិញ្ញាសា និងធ្វើកំណែវិញ្ញាសា ។
សូមបញ្ជាក់ថា មណ្ឌលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ២០២៤ ទូទាំងប្រទេស ត្រូវបានកំណត់ថ្នាក់ ៖ វិទ្យាសាស្ត្រ មាន ៧៣មណ្ឌល មាន ១,៦១៦បន្ទប់ និងថ្នាក់ វិទ្យាសាស្ត្រសង្គម មាន ១៥៧មណ្ឌល មាន ៤,០២០បន្ទប់ សរុបចំនួន ២៣០មណ្ឌល ត្រូវជា ៥,៦៣៦ បន្ទប់ ។ ចំណែកកម្លាំងអង្គភាពប្រឆាំងអំពើពុករលួយ មានចំនួន ៥៨៧នាក់ បម្រុង ៦៤នាក់ អ្នកស្ម័គ្រចិត្ត ១០០នាក់ ៕
ចែករំលែកព័តមាននេះ