រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអបអរសាទរ ដល់ក្រុមកីឡាអេឡិចត្រូនិកអ្នកចម្បាំងអង្គរ សម្រាប់ការឈ្នះមេដាយមាស…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអបអរសាទរ ដល់ក្រុមកីឡាអេឡិចត្រូនិកអ្នកចម្បាំងអង្គរ សម្រាប់ការឈ្នះមេដាយមាស ពីការប្រកួតកីឡាអេឡិចត្រូនិកចិន-អាស៊ាន (China-ASEAN Esports Competition) ឆ្នាំ២០២៤ នៅសាធារណរដ្ឋប្រជាមានិតចិន ។
ក្រុមកីឡាអេឡិចត្រូនិកអ្នកចម្បាំងអង្គរ(CFU Gaming) បានក្លាយជាម្ចាស់ជើងឯក ក្នុងព្រឹត្តិការណ៍ប្រកួតកីឡាអេឡិចត្រូនិកចិន-អាស៊ាន (China-ASEAN Esports Competition) ឆ្នាំ២០២៤ លើវិញ្ញាសា Mobile Legends Bang Bang បន្ទាប់ពីយកឈ្នះក្រុមម៉ាឡេស៊ី ដោយលទ្ធផល ២-០ ក្នុងវគ្គផ្តាច់ព្រ័ត្រ នៅរសៀលថ្ងៃសៅរ៍ ទី២៨ ខែកញ្ញា ឆ្នាំ២០២៤ នៅប្រទេសចិន ។
លោក ជាន ចាន់រ៉ា អគ្គលេខាធិការរង សហព័ន្ធកីឡាអេឡិចត្រូនិកម្ពុជាបានឱ្យដឹងថា ព្រឹត្តិការណ៍កីឡាអេឡិចត្រូនិកចិន-អាស៊ាននេះរៀបចំឡើងដោយសហព័ន្ធកីឡាអេឡិចត្រូនិកអាស៊ី ហើយតាមរយៈជ័យជម្នះនេះយើងពិតជារីករាយ និងអបអរសាទរ ដែលក្រុមអ្នកចម្បាំងអង្គររបស់កម្ពុជាយើងបានឈ្នះជើងឯកនៅក្នុងព្រឹត្តិការណ៍អន្តរជាតិនេះ ។
លោកអគ្គលេខាធិការង បានគូសបញ្ជាក់ថា មុនឈ្នះជើងឯកនេះ ក្រុមកម្ពុជាបានឆ្លងកាត់ជាច្រើនប្រកួត រួមមាន ៖ វគ្គសន្សំពិន្ទុក្នុងពូល ក្រុមកម្ពុជា ឈ្នះ ហ្វីលីពីន ១-០, កម្ពុជា ឈ្នះ ចិន ១-០ ហើយឡើងដល់វគ្គពាក់កណ្តាលផ្តាច់ព្រ័ត្រ ក្រុមកម្ពុជា ឈ្នះ មីយ៉ាន់ម៉ា ២-១ ហើយនៅវគ្គផ្តាច់ព្រ័ត្រគឺកម្ពុជាឈ្នះម៉ាឡេស៊ី ២-០ ហើយគ្រងម្ចាស់ជើងឯកតែម្តង ៕
ចែករំលែកព័តមាននេះ