គណៈកម្មាធិការជាតិគ្រប់គ្រងគ្រោះមហន្តរាយ ចុះពិនិត្យស្ថានភាពទឹកជំនន់ ក្នុងភូមិសាស្ត្រឃុំជីក្រែង ខេត្តសៀមរាប
ខេត្តសៀមរាប ៖ នៅរសៀលថ្ងៃទី២៧ ខែកញ្ញា ឆ្នាំ២០២៤ លោក អ៊ឹង គឹមលាង អភិបាលរង នៃគណៈអភិបាលខេត្តសៀមរាប…
ខេត្តសៀមរាប ៖ នៅរសៀលថ្ងៃទី២៧ ខែកញ្ញា ឆ្នាំ២០២៤ លោក អ៊ឹង គឹមលាង អភិបាលរង នៃគណៈអភិបាលខេត្តសៀមរាប និងជាប្រធានលេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្តសៀមរាប តំណាងលោក ប្រាក់ សោភ័ណ អភិបាល នៃគណៈអភិបាលខេត្ត បានចូលរួមអមដំណើរឯកឧត្តម គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានចុះពិនិត្យស្ថានភាពផលប៉ះពាល់បង្កឡើងពីទឹកជំនន់តាមបណ្តោយស្ទឹងជីក្រែង ស្ថិតក្នុងភូមិសាស្ត្រឃុំជីក្រែង ខេត្តសៀមរាប ។
ឯកឧត្តម គន់ គីម ក៏បានណែនាំឱ្យមានការយកចិត្តទុកដាក់លើសុវត្ថិភាពជនងាយរងគ្រោះ មនុស្សចាស់ ជនពិការភាព កុមារជាដើម ព្រមទាំងណែនាំចំពោះការកសាងហេដ្ឋារចនាសម្ព័ន្ធផ្លូវបេតុង ក្នុងឃុំ ត្រូវសិក្សាពីកម្ពស់ទឹកជំនន់តាមបណ្តាឆ្នាំ ហើយកសាងឱ្យបានខ្ពស់ ដើម្បីផ្តល់ជាប្រយោជន៍ការធ្វើដំណើរ ហើយក៏អាចធ្វើជាទីទួលសុវត្ថិភាព នៅពេលមានទឹកជន់ផងដែរ ។
ជាមួយគ្នានេះដែរ គណៈកម្មាធិការគ្រប់គ្រងគ្រោះមហន្តរាយស្រុកជីក្រែង និងឃុំពាក់ព័ន្ធ សហការជាមួយគណៈកម្មាធិការប្រតិបត្តិសាខាកាកបាទក្រហមកម្ពុជា ខេត្ត និងអនុសាខា បានជម្លៀសបងប្អូនប្រជាពលរដ្ឋ និងសត្វពាហនៈ ទៅទីទួលសុវត្ថិភាព និងបានបន្តចុះអន្តរាគមន៍ផ្តល់ជំនួយសង្គ្រោះសម្រាប់ប្រជាពលរដ្ឋដែលមានតម្រូវការស្បៀង ទឹកស្អាត អនាម័យ ជម្រក និងសន្តិសុខជាប្រចាំ ៕
ចែករំលែកព័តមាននេះ