រាជធានីភ្នំពេញ ៖ ក្នុងពិធីប្រគល់វិញ្ញាបនបត្រ និងបណ្ណសរសើរជូនដល់សិស្សានុសិស្ស ក្នុងឆ្នាំសិក្សា២០២៣-២០២៤ នៃសាលាអន្តរជាតិស៊ីលីត នៅរាជបណ្ឌិតសភាកម្ពុជា នារសៀលថ្ងៃទី២៤ ខែកញ្ញា ឆ្នាំ២០២៤…
រាជធានីភ្នំពេញ ៖ ក្នុងពិធីប្រគល់វិញ្ញាបនបត្រ និងបណ្ណសរសើរជូនដល់សិស្សានុសិស្ស ក្នុងឆ្នាំសិក្សា២០២៣-២០២៤ នៃសាលាអន្តរជាតិស៊ីលីត នៅរាជបណ្ឌិតសភាកម្ពុជា នារសៀលថ្ងៃទី២៤ ខែកញ្ញា ឆ្នាំ២០២៤ ក្នុងនាមជាតំណាងលោក ឃួង ស្រេង អភិបាលរាជធានីភ្នំពេញ លោក កើត ឆែ អភិបាលរងរាជធានីភ្នំពេញ បានលើកឡើងថា ក្រុមក្មេងទំនើង ដែលបង្កការអុកឡុក ធ្វើឱ្យបាត់បង់សណ្តាប់ធ្នាប់ក្នុងសង្គម នៅពេលឃាត់ខ្លួន សួរនាំស្ទើរតែទាំងអស់ ដែលជាក្មេងគ្មានចំណេះដឹង និងរៀនសូត្របានតិចតួច ។
លោកបន្តថា ការបណ្តុះបណ្តាចំណេះទូទៅនៅតាមគ្រឹះស្ថានរដ្ឋ និងឯកជនហើយ ក្មួយៗសិស្សានុសិស្ស ត្រូវទទួលការបណ្តុះបណ្តាលបន្ថែម លើផ្នែកបច្ចេកវិទ្យា ដូចជាការរៀនប្រើប្រាស់កុំព្យូទ័រជាដើម ដើម្បីដើរឱ្យទាន់ការវិវត្ត នៃវិស័យបច្ចេកវិទ្យាឌីជីថល ដែលជារបត់មួយថ្មី ក្នុងបរិបទ ឧស្សាហកម្ម ៤.០ ។
លោក កើត ឆែ បានមានប្រសាសន៍ថា រាជរដ្ឋាភិបាលកម្ពុជា អាណត្តិទី៧ ក្រោមការដឹកនាំប្រកបដោយភាពស្វាហាប់ សមត្ថភាព ថាមពល និងគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានយកចិត្តទុកដាក់ណាស់ក្នុងការកសាងមូលធនមនុស្ស សម្រាប់ការអភិវឌ្ឍសេដ្ឋកិច្ច-សង្គមជាតិ ដើម្បីសម្រេចបាន នូវគោលដៅ កម្ពុជា ជាប្រទេសមានចំណូលខ្ពស់ នៅឆ្នាំ២០៥០ ។
លោក កើត ឆែ អភិបាលរហបន្តថា ការអប់រំកម្រិតចំណេះទូទៅ នៅតាមគ្រឹះស្ថានរដ្ឋ និងឯកជន ត្រូវអនុវត្ត នូវស្តង់ដាររួមតែមួយ ពោលគឺការយកចិត្តទុកដាក់លើចំណេះដឹង សីលធម៌ គុណធម៌ ឥរិយាបថ ចេះគោរព ចាស់ទុំ ព្រឹទ្ធាចារ្យ ជាដើម។ បន្ថែមលើនេះ សិស្សានុសិស្ស ក៏នឹងត្រូវទទួល នូវការបណ្តុះបណ្តាលបន្ថែម លើផ្នែកបច្ចេកវិទ្យា ដូចជាការរៀនប្រើប្រាស់កុំព្យូទ័រ ដើម្បីដើរឱ្យទាន់ការវិវត្ត នៃវិស័យបច្ចេកវិទ្យាឌីជីថល ដែលជារបត់មួយថ្មី ក្នុងបរិបទឧស្សាហកម្ម ៤.០។
លោកបានបន្តទៀតថា «សន្តិភាព» ពិតជាមានតម្លៃ ដែលមិនអាចកាត់ថ្លៃបាន ដូច្នេះត្រូវចូលរួមថែរក្សា «សន្តិភាព»ទាំងអស់គ្នា ដើម្បីការអភិវឌ្ឍ និងភាពសុខសាន្ត របស់បងប្អូនប្រជាពលរដ្ឋខ្មែរយើង ។
ក្នុងឱកាសនោះ លោកក៏បានផ្តាំផ្ញើដល់លោកគ្រូ-អ្នកគ្រូ មាតាបិតា អាណាព្យាបាល សិស្សទាំងអស់ ត្រូវបន្តខិតខំសិក្សារៀនសូត្រ នៅឆ្នាំសិក្សាបន្ទាប់ ឱ្យបានទ្វេដង និងត្រូវមានវិន័យទាំងក្នុងការសិក្សា និងការរស់នៅស័ក្តិសមជា «កូនល្អ សិស្សល្អ និងមិត្តល្អ»។ ក្រៅពីការក្រេបជញ្ជក់យកចំណេះដឹង ពីលោកគ្រូ-អ្នកគ្រូ ត្រូវរៀនសូត្រអំពីអ្វីដែលហៅថា «មេរៀនបំនិន ជីវិត» ដែលផ្តោតលើ សីលធម៌រស់នៅ, ការអោនលំទោន គោរពចាស់ទុំ, ការចែករំលែក និងចេះជួយយកអាសារគ្នា ជាដើម។ ត្រូវចូលរួមគោរពច្បាប់ចរាចរផ្លូវគោក ចៀសវាងឱ្យបានដាច់ខាត នូវការសេពគ្រឿងស្រវឹង, គ្រឿងញៀន, បារី និងបារីអេឡិចត្រូនិច(វេប) ចៀសវាងការហូប ភេសជ្ជៈផ្អែមខ្លាំង ដែលប្រឈមនឹងជំងឺ ទឹកនោមផ្អែម។ ត្រូវថែទាំសុខភាពផ្ទាល់ខ្លួន។ ត្រូវរំលឹកដឹងគុណដល់ឪពុកម្តាយ ដែលជាអ្នកមានគុណ ដោយឪពុកម្តាយ មិនត្រឹមតែជាអ្នកផ្តល់កំណើត ឱ្យក្មួយៗ តែនៅបានចិញ្ចឹមបីបាច់ ក្មួយៗ ឱ្យមានសុខភាពល្អ ផ្តល់នូវចំណេះដឹង និងជាអ្នករៀបចំ ក្មួយៗ ឱ្យមានគូរស្រករថែមទៀត ដើម្បីកសាងគ្រួសារមួយ ដែលមានសុភមង្គល និងចំរុងចម្រើន ។
លោកអភិបាលរងបញ្ជាក់ថា ជម្រៅទឹកសមុទ្រ កំពស់ភ្នំ ចំងាយពីផែនដីទៅព្រះច័ន្ធជាដើម គឺសុទ្ធតែវាស់បាន តែសម្រាប់ជម្រៅទឹកចិត្តឳពុកម្តាយ មានសម្រាប់កូន គឺវាស់មិនបានទេ ដូច្នេះទេសូមក្មួយៗ ត្រូវដឹងគុណដល់ឪពុកម្តាយរបស់យើង ៕
ចែករំលែកព័តមាននេះ