ឆាយន្នីសតៃប៉ិ ៖ ក្រុមបាល់ទាត់ជម្រើសជាតិកម្ពុជាអាយុក្រោម២០ឆ្នាំ ត្រូវតទល់ជាមួយក្រុមជម្រើសជាតិបារ៉ែនអាយុក្រោម២០ឆ្នាំ វេលាម៉ោង០៦:០០នាទីល្ងាច ថ្ងៃទី២៥ ខែកញ្ញា ឆ្នាំ២០២៤ នៅឯកីឡដ្ឋាន Fu…
ឆាយន្នីសតៃប៉ិ ៖ ក្រុមបាល់ទាត់ជម្រើសជាតិកម្ពុជាអាយុក្រោម២០ឆ្នាំ ត្រូវតទល់ជាមួយក្រុមជម្រើសជាតិបារ៉ែនអាយុក្រោម២០ឆ្នាំ វេលាម៉ោង០៦:០០នាទីល្ងាច ថ្ងៃទី២៥ ខែកញ្ញា ឆ្នាំ២០២៤ នៅឯកីឡដ្ឋាន Fu Jen University ដែលជាជំនួបទី៣ វគ្គសន្សំពិន្ទុក្នុងពូល B សម្រាប់ការប្រកួតវគ្គជម្រុះពានរង្វាន់ជើងឯកទ្វីបអាស៊ី AFC U20 Asian Cup 2025 ដែលឆាយន្នីសតៃប៉ិធ្វើជាម្ចាស់ផ្ទះ។
មុនឈានមកដល់ជំនួបទី៣ ក្រុមគោព្រៃជំទង់កម្ពុជា ឆ្លងកាត់២ប្រកួតកន្លងមក បានយកឈ្នះនេប៉ាល់ក្នុងលទ្ធផល ៤-១ កាលពីថ្ងៃទី២១ ខែកញ្ញា មុនចាញ់ក្រុមការពារតំណែងជើងឯកអ៊ូសបេគីស្ថានក្នុងលទ្ធផល ៧-០ កាលពីថ្ងៃទី២៣ ខែកញ្ញា។ ឆ្លងកាត់២ប្រកួតកន្លមក នៅក្នុងពូល B អ៊ូសបេគីស្ថានកាន់កាប់កំពូលតារាងបណ្តោះអាសន្ន កម្ពុជាឈរនៅលេខ ២ បារ៉ែនឈរនៅលេខ ៣ និងនេប៉ាល់ឈរនៅលេខ៤ ដោយមាន៣ពិន្ទុដូចគ្នា ខុសគ្នាត្រង់គ្រាប់ចំណេញ ខណៈដែលម្ចាស់ផ្ទះឆាយន្នីសតៃប៉ិ ស្ថិតនៅបាតតារាងគ្មានពិន្ទុរាប់។
គួរបញ្ជាក់ថា ក្រុមគោព្រៃជំទង់កម្ពុជា ស្ថិតក្រោមការដឹកនាំរបស់លោក Koji Gyotoku គ្រូបង្វឹកជនជាតិជប៉ុន នឹងត្រូវឆ្លងកាត់ការប្រកួតចំនួន៤ប្រកួត ដើម្បីដណ្តើមកៅអីឡើងទៅកាន់ការប្រកួតជុំផ្តាច់ព្រ័ត្រពានរង្វាន់ AFC U-20 Asian Cup ឆ្នាំ ២០២៥ ដែលប្រទេសចិនធ្វើជាម្ចាស់ផ្ទះ ដែលនឹងចាប់ផ្តើមនៅថ្ងៃទី៦ ដល់ថ្ងៃទី២៣ ខែកុម្ភៈ ឆ្នាំ២០២៥៕ (រូបភាព ៖ សហព័ន្ធកីឡាបាល់ទាត់កម្ពុជា)
ចែករំលែកព័តមាននេះ