ខេត្តត្បូងឃ្មុំ ៖ មុខសញ្ញាសកម្មខាងគប់កញ្ចក់រថយន្តពេលរាត្រីតាមដងផ្លូវជាតិលេខ៧ ស្ថិតក្នុងភូមិសាស្ត្រស្រុកត្បូងឃ្មុំ តែងតែគប់ជាហូរហែទៅលើរថយន្តប្រជាពលរដ្ឋ សូម្បីតែរថយន្តរបស់កម្លាំងសមត្ថកិច្ចក៏មិនលើកលែង។ ត្រូវបានឧត្តមសេនីយ៍ទោចិន នី ស្នងការនគរបាលខេត្ត បានឱ្យកម្លាំងជំនាញបើកប្រតិបត្តិការស៊ើបអង្កេត…
ខេត្តត្បូងឃ្មុំ ៖ មុខសញ្ញាសកម្មខាងគប់កញ្ចក់រថយន្តពេលរាត្រីតាមដងផ្លូវជាតិលេខ៧ ស្ថិតក្នុងភូមិសាស្ត្រស្រុកត្បូងឃ្មុំ តែងតែគប់ជាហូរហែទៅលើរថយន្តប្រជាពលរដ្ឋ សូម្បីតែរថយន្តរបស់កម្លាំងសមត្ថកិច្ចក៏មិនលើកលែង។ ត្រូវបានឧត្តមសេនីយ៍ទោចិន នី ស្នងការនគរបាលខេត្ត បានឱ្យកម្លាំងជំនាញបើកប្រតិបត្តិការស៊ើបអង្កេត ដោយយកចិត្តទុកដាក់ ក្នុងរយៈពេល៤ថ្ងៃទីបំផុតជនពាល ត្រូវបានកម្លាំងនគរបាលស្គាល់តែសញ្ញាណឈានដល់ការឃាត់ខ្លួនបានម្នាក់ក្នុងចំណោមគ្នាពីរនាក់។
លោកវរសេនីយ៍ឯកសាំ ហេង អធិការនគរបាលស្រុកត្បូងឃ្មុំ បានឲ្យដឹងនាព្រឹកថ្ងៃទី២៤កញ្ញា ២០២៤ ថា ក្រោយពីទទួលពាក្យបណ្ដឹងពីប្រជាពលរដ្ឋដែលជាម្ចាស់រថយន្ត ជាមួយនោះក៏មានរថយន្តរបស់ឧកញ៉ាម្នាក់ ក៏ត្រូវបានក្រុមក្មេងអន្ធពាលចំនួនពីរនាក់បានគប់កញ្ចក់រថយន្តផងដែរ។
ហើយថ្មីៗកន្លងទៅ ពេលដែលលោកអធិការនគរបាលស្រុកតំបែរនិងអធិការនគរបាលស្រុកពញាក្រែក បានត្រឡប់មកពីប្រជុំនៅរាជធានីភ្នំពេញ ដើម្បីឆ្ពោះមកកាន់អង្គភាពវិញត្រូវបានជនទាំងនេះគុបលើរថយន្តបណ្ដាលឲ្យបែកកញ្ចក់។
អធិការនគរបាលស្រុកត្បូងឃ្មុំបានបន្តឲ្យដឹងទៀតថា កាលពីយប់ថ្ងៃទី២០ ខែកញ្ញា ឆ្នាំ២០២៤ វេលាម៉ោងប្រមាណ ១០និង៥០នាទីយប់ ចំណុចលើផ្លូវជាតិលេខ៧ ត្រង់ច្រកចូលផ្លូវបេតុង ភូមិវាលកណ្ដៀង ឃុំជប់ ស្រុកត្បូងឃ្មុំ ខេត្តត្បូងឃ្មុំ មានជនល្មើសចំនួន ០២នាក់ជិះម៉ូតូ០១គ្រឿងមិនច្បាស់ម៉ាកឈប់ចាំគប់លើរថយន្តចំនួន ០២គ្រឿងជាបន្តបន្ទាប់ ០១គ្រឿងម៉ាកFORD RENGER ពណ៌ស ស៊េរីឆ្នាំ២០២០ ពាក់ស្លាកលេខ នគរបាល 2.3693 របស់អង្គភាពអធិការដ្ឋាននគរបាលស្រុកពញាក្រែក នៃស្នងការដ្ឋាននគរបាលខេត្តត្បូងឃ្មុំបើកបរដោយឈ្មោះ ថាញ់ សុខវ៉ាត ភេទប្រុស អាយុ៣៩ឆ្នាំ ជនជាតិខ្មែរ(អធិការនគរបាលស្រុកពញាក្រែក) មានទីលំនៅភូមិសង្គមមានជ័យចាស់ ឃុំមេមត់ ស្រុកមេមត់ ខេត្តត្បូងឃ្មុំ ខណៈពេលធ្វើដំណើរបំពេញភារកិច្ចបណ្ដាលឲ្យបែកកញ្ចក់មុខអស់មួយផ្ទាំង និង០១គ្រឿងម៉ាក HYUNDAI ពណ៌ស ពាក់ស្លាកលេខ ភ្នំពេញ 3E-6525 បើកបរដោយឈ្មោះ ស្រ៊ន ខេង ភេទប្រុស អាយុ២៤ឆ្នាំ ជាតិខ្មែរ មានទីលំនៅភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ បណ្កាលឲ្យបែកកញ្ចក់មុខ ០១ផ្ទាំង ធ្វើសកម្មភាពរួចជនល្មើសទាំងពីរនាក់បានជិះម៉ូតូគេចខ្លួនឡើងតាមផ្លូវបេតុងទៅទិសខាងត្បូងបាត់ទៅ។
បន្ទាប់ពីទទួលបណ្ដឹងពីជនរងគ្រោះ រហូតដល់ថ្ងៃទី២៣ ខែកញ្ញា ឆ្នាំ២០២៤ ដោយបានការឯកភាពពីលោក ឧត្តមសេនីយ៍ស្នងការ និងការសម្របសម្រួលពីលោក ឡាយ ឃាង ព្រះរាជអាជ្ញារង នៃអយ្យការអមសាលាដំបូងខេត្តត្បូងឃ្មុំ អនុញ្ញាតឲ្យកម្លាំងជំនាញ សហការជាមួយកម្លាំងប៉ុស្តិ៍នគរបាលរដ្ឋបាលជប់ និងប៉ុស្តិ៍នគរបាលរដ្ឋបាលមង់រៀវ បើកការស៊ើបអង្កេតស្រាវជ្រាវជាបន្តបន្ទាប់រហូតកំណត់បានមុខសញ្ញា និងឃាត់ខ្លួនបានជនសង្ស័យម្នាក់ឈ្មោះ អន ផានិត ភេទប្រុស អាយុ២១ឆ្នាំ ជាតិខ្មែរ មានទីលំនៅភូមិត្រពាំងក្រពើ ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ បញ្ជូនមកអធិការដ្ឋាននគរបាលស្រុកត្បូងឃ្មុំ ចងក្រងសំណុំរឿងតាមនីតិវិធី។ ឆ្លងតាមការស្តាប់ចំលើយជនសង្ស័យឈ្មោះ អន ផានិត បានសារភាពថាខ្លួនរួមនឹងបក្ខពួកម្នាក់ទៀត ពិតជាបានធ្វើសកម្មភាពគប់រថយន្តដូចបានរៀបរាប់ខាងលើពិតប្រាកដមែន។
លោកវរសេនីយ៍ឯកសាំ ហេង អធិការនគរបាលស្រុកត្បូងឃ្មុំបញ្ជាក់ថា តាមរយៈតាមរយ:កាមេរ៉ាសុវត្ថិភាពបានបង្ហាញពីអត្តសញ្ញាណក្រុមជនសង្ស័យទើបឈានដល់ការចាប់ខ្លួនបានម្នាក់។សូមបញ្ជាក់ថាជនរូបនេះកន្លងមកជាមុខសញ្ញាប្រើប្រាស់គ្រឿងញៀន តែមួយរយៈចុងក្រោយនេះរយៈពេល២ទៅ៣ខែមិនបានប្រើប្រាស់គ្រឿងញៀនទៀតទេ។
សមត្ថកិច្ចមូលដ្ឋានអំពាវនាវដល់អ្នកដំណើរដែលជាម្ចាស់រថយន្តបើសិនជាមានករណីគប់កញ្ចក់រថយន្តណាមួយ សូមប្រញាប់រាយការណ៍បន្ទាន់មកសមត្ថកិច្ចដែលស្ថិតនៅក្នុងក្បែរកន្លែងកើតហេតុ ដើម្បីមានវិធានការអន្តរាគមន៍ជួយទាន់ពេលវេលា ៕
ចែករំលែកព័តមាននេះ