កំពូលមហាសេដ្ឋីវៀតណាម ស្នើពង្រីកការអប់រំភាសាអង់គ្លេសដល់ប្រជាជនគ្រប់រូប
ប្រទេសវៀតណាម ៖ លោក ផាម ញ៉ាត វឿង (Pham Nhat Vuong) មហាសេដ្ឋីមានបំផុតរបស់ប្រទេសវៀតណាម…
ប្រទេសវៀតណាម ៖ លោក ផាម ញ៉ាត វឿង (Pham Nhat Vuong) មហាសេដ្ឋីមានបំផុតរបស់ប្រទេសវៀតណាម ដែលជាប្រធានក្រុមហ៊ុន Vingroup បានស្នើពង្រីកការអប់រំភាសាអង់គ្លេសនៅទូទាំងប្រទេស មិនត្រឹមតែនៅក្នុងសាលារៀនប៉ុណ្ណោះទេ ប៉ុន្តែសម្រាប់ប្រជាជនប្រទេសវៀតណាមទាំងមូលតែម្តង។ នេះបើតាមប្រភពពីសារព័ត៌មាន VnExpress ចេញផ្សាយកាលពីថ្ងៃទី២២ ខែកញ្ញា ឆ្នាំ២០២៤។
ថ្លែងក្នុងសន្និសីទរដ្ឋាភិបាល-ធុរកិច្ច កាលពីថ្ងៃសៅរ៍មុន លោក ផាម ញ៉ាត វឿង បានធ្វើការតស៊ូមតិ សម្រាប់ការទទួលបានកាន់តែច្រើនក្នុងការរៀនភាសាអង់គ្លេស ដោយមានគោលបំណងលើកកម្ពស់សង្គមពលរដ្ឋសកល។ លោកបានស្នើថា អាជីវកម្មទាំងអស់ រួមទាំងក្រុមហ៊ុន Vingroup របស់លោកផងនោះ អាចជួយដល់គ្រូបង្រៀន ដែលធ្វើការនៅតាមតំបន់ដាច់ស្រយាល។ លោកបានថ្លែងថា «ការលើកកម្ពស់ការអប់រំភាសាអង់គ្លេសពីតំបន់ដាច់ស្រយាលរហូតដល់ទីក្រុង នឹងបង្កើតឱកាសប្រាក់ចំណូលកាន់តែប្រសើរឡើងសម្រាប់កុមារ រួមចំណែកដល់ការអភិវឌ្ឍន៍នៃតំបន់ទាំងនេះ នាពេលអនាគត»។
សំណើរបស់កំពូលមហាសេដ្ឋីវៀតណាម ដែលមានទ្រព្យសម្បត្តិសរុបត្រូវបានប៉ាន់ស្មានពីគេហទំព័រ Bloomberg ចំនួន ៥.៣ពាន់លានដុល្លារអាមេរិក វ័យ៥៦ឆ្នាំរូបនេះ ស្របនឹងគំនិតផ្តួចផ្តើមរបស់ការិយាល័យនយោបាយ នៅក្នុងការជំរុញជំនាញភាសាបរទេសក្នុងចំណោមសិស្សានុសិស្ស និងធ្វើឱ្យភាសាអង់គ្លេសជាភាសាទី២ នៅក្នុងសាលារៀនបន្តិចម្តងៗ។ មិនត្រឹមតែប៉ុណ្ណោះទេ លោកក៏បានអំពាវនាវឱ្យមានការបង្កើនកូតាបណ្តុះបណ្តាលសម្រាប់និស្សិតនៅក្នុងវិស័យបច្ចេកវិទ្យាដូចជា ព័ត៌មានវិទ្យា និង ទិន្នន័យធំ ឬ Big Data នៅក្នុងគោលបំណងពង្រីកបន្ថែមលើកម្លាំងការងារបច្ចេកវិទ្យារបស់ប្រទេសវៀតណាម។
បច្ចុប្បន្នប្រទេសវៀតណាមមានអាជីវកម្មសកម្មជាង ៩៣០.០០០អាជីវកម្ម ដែលបានរួមចំណែកប្រមាណ ៤៦% នៃផលិតផលក្នុងស្រុកសរុប ឬ GDP របស់ប្រទេសវៀតណាម និង ៣០% នៃប្រាក់ចំណូលជាតិ។ ប៉ុន្តែទោះយ៉ាងណាក៏ដោយ លោក ង្វៀន ជី ឌុង (Nguyen Chi Dung) រដ្ឋមន្ត្រីក្រសួងផែនការ និងវិនិយោគវៀតណាម បានចង្អុលបង្ហាញថា ភាគច្រើនជាសហគ្រាសធុនតូច ឬមធ្យម ដែលមានការចូលរួមនៅមានកម្រិតនៅឡើយក្នុងខ្សែសង្វាក់ផ្គត់ផ្គង់។ ដោយលោកបានសង្កត់ធ្ងន់ថា រដ្ឋាភិបាលគួរតែផ្តល់ការគាំទ្របន្ថែមទៀត សម្រាប់សហគ្រាសធុនតូច និងមធ្យម ដែលអាចឱ្យពួកគេមានលទ្ធភាពចូលរួមគាំទ្រដល់រដ្ឋាភិបាល៕
ចែករំលែកព័តមាននេះ