កាលពីថ្ងៃអាទិត្យទី២២ ខែកញ្ញា ឆ្នាំ២០២៤ គឺជាវេនទី៥ ហើយនៃពិធីកាន់បិណ្ឌ ដែលជាផ្នែកមួយនៃពិធីបុណ្យភ្ជុំបិណ្ឌ គឺជាពិធីបុណ្យសាសនា និងវប្បធម៌ដ៏សំខាន់បំផុតមួយកម្ពុជា ដូច្នេះតិចយើងភ្លេចហើយរំលង ខណៈដែលរវល់រឿងរកលុយផ្គត់ផ្គង់គ្រួសារ…
កាលពីថ្ងៃអាទិត្យទី២២ ខែកញ្ញា ឆ្នាំ២០២៤ គឺជាវេនទី៥ ហើយនៃពិធីកាន់បិណ្ឌ ដែលជាផ្នែកមួយនៃពិធីបុណ្យភ្ជុំបិណ្ឌ គឺជាពិធីបុណ្យសាសនា និងវប្បធម៌ដ៏សំខាន់បំផុតមួយកម្ពុជា ដូច្នេះតិចយើងភ្លេចហើយរំលង ខណៈដែលរវល់រឿងរកលុយផ្គត់ផ្គង់គ្រួសារ ។
នៅក្នុងរយៈពេល១៤ថ្ងៃ នៃពិធីកាន់បិណ្ឌ ចាប់ពីថ្ងៃទី១៨ ខែកញ្ញា ដល់ថ្ងៃទី០១ ខែតុលា និងថ្ងៃឆ្លងធំ នៅថ្ងៃទី២ ខែតុលា គឺជាពេលវេលាដែលប្រជាពលរដ្ឋខ្មែរជួបជុំគ្នា ដើម្បីឧទ្ទិសកុសលផលបុណ្យដល់បុព្វការីជន តាមការធ្វើចង្ហាន់ទៅវត្ត ប្រគេនព្រះសង្ឃធ្វើកិច្ចបង្សកូលឧទ្ទិសកុសលដល់ញាតិការ៧សណ្តាន ។ ពិធីបុណ្យនេះមានសារៈសំខាន់ខាងវប្បធម៌ និងស្មារតីយ៉ាងជ្រាលជ្រៅសម្រាប់ប្រជាជនកម្ពុជាទូទាំងប្រទេស ។ តែទោះជាយ៉ាងណាក៏ដោយ ជាមួយនឹងការធ្លាក់ចុះនៃប្រាក់ចំណូលប្រចាំថ្ងៃ និងបញ្ហាសេដ្ឋកិច្ចដែលគ្រួសារជាច្រើនប្រឈមមុខប្រជាជនអាចមិនសូវមានលុយ ដើម្បីចំណាយនៅក្នុងពិធីនេះ ។
តុល្យភាពនៃការគោរពប្រពៃណីជាមួយនឹងតម្រូវការសន្សំសំចៃ នៃធនធានហិរញ្ញវត្ថុ គឺជាបញ្ហាប្រឈមសម្រាប់ពលរដ្ឋជាច្រើន ជាពិសេសក្នុងអំឡុងពេលនៃការប្រារព្ធពិធីដែលមានរយៈពេលសរុបចំនួន១៥ ថ្ងៃនេះ ។
តាមធម្មទេសនារបស់សម្តេចសង្ឃធំៗ នៅក្នុងស្ថាប័នពុទ្ធសាសនានៅកម្ពុជាយើងមកដល់ពេលនេះអត្ថន័យនៃពិធីបុណ្យកាន់បិណ្ឌ និងភ្ជុំបិណ្ឌ គឺដើម្បីឧទ្ទិសកុសលដល់បុព្វការីជន ហើយវត្តមានរបស់យើង នៅតាមវត្តអារាមក៏សំខាន់ណាស់ ក្រៅពីការផ្គត់ផ្គង់ឪពុកម្តាយដែលជាព្រះរស់នៅផ្ទះរបស់យើងស្រាប់ ។ នៅក្នុងករណីយើងមានធនធាន យើងមានសម្បត្តិគ្រប់គ្រាន់ ការយកវត្ថុ និងចង្ហាន់ល្អៗជ្រះថ្លាប្រគេនព្រះសង្ឃ គឺជាទឹកចិត្តដ៏ប្រពៃ ប៉ុន្តែនៅក្នុងករណីយើងអត់កុំត្រដរខំរករបស់ល្អនឹងគេទៅប្រគេនព្រះសង្ឃអី ។ យើងអាចធ្វើបានតាមលទ្ធភាព ។
បើយើងធ្វើតាមលទ្ធភាពហើយជ្រះថ្លាទឹកចិត្តបរិសុទ្ធ មិនថា របស់ប្រណីតឬរបស់ធម្មតា គឺបានបុណ្យកុសលស្មើៗគ្នា ។
តាមពុទ្ធសាស្ត្រព្រះសង្ឃដែលត្រឹមត្រូវ មិនរំពឹងលើវត្ថុប្រណីត ឬរបស់ថ្លៃៗអ្វីឡើយ សំខាន់ គឺទឹកចិត្តជ្រះថ្លារបស់ពុទ្ធបរិស័ទដែលជាយើងទាំងអស់គ្នា ។ ក្រោយពេលដែលយើងរៀបចំធ្វើម្ហូបសម្លរឆ្អិនហើយ គួរចាប់មួយចំណែករៀបចំជូនព្រះរស់ជាឪពុកម្តាយយើងពិសា មួយចំណែកទុកប្រគេនព្រះសង្ឃ មួយចំណែ កសម្រាប់គ្រួសារ ។ ចង្ហាន់ដែលត្រូវប្រគេនព្រះសង្ឃ ដែលមានបាយ សម្លរ ផ្លែឈើ និងបង្អែម គឺគ្រាន់តែ រៀបចំត្រឹមត្រូវដាក់ស្រាក់ទៅវត្តហើយបង្សកូលប្រគេនព្រះសង្ឃ រាប់បាត គឺរួចស្រេចរួចកិច្ច ។
ក្រៅពីធ្វើជាលក្ខណៈបុគ្គលតាមគ្រួសារ ការចងក្រងជាសហគមន៍ ឬជាក្រុមក៏ជារឿងប្រពៃ ហើយវាក៏ជាស្មារតីសាមគ្គីមួយដ៏ល្អផងដែរ ។ ពីព្រោះយើងអាចប្រមូលថវិកាគ្នាម្នាក់បន្តិចបន្តួច ហើយរួមគ្នាធ្វើម្ហូប ហើយនាំគ្នាទៅវត្តជុំគ្នារៀបចំតាមកិច្ចសាសនា ។ សកម្មភាពបែបនេះ គឺជាសកម្មភាពមួយដែលអាចសន្សំ សំចៃខ្ពស់ និងលើកកម្ពស់សាមគ្គីភាព ។
សរុបទៅពិធីបុណ្យកាន់បិណ្ឌ និងភ្ជុំបិណ្ឌ គឺជាប្រពៃណីនិងទំនៀមទម្លាប់ដ៏សំខាន់មួយនៅក្នុងវប្បធម៌ និងពុទ្ធិសាសនារបស់ខ្មែរ ហើយការចូលរួម គឺបានបង្កប់អត្ថន័យ និងសេចក្តីស្ងប់យ៉ាងជ្រៅនៅក្នុងជីវិតរបស់ប្រជាជនកម្ពុជាដូចនេះយើងគួរចូលរួម ។ ទោះជានៅពេលនេះ គ្រួសាខ្លះកំពុងតែស្ថិតនៅក្នុងស្ថានភាពនៃសម្ពាធសេដ្ឋកិច្ច និងការថយចុះនៃប្រាក់ចំណូលប្រចាំថ្ងៃក៏ពិតមែន តែយើងនៅតែមានវិធីចូលរួម ពិធីដ៏សំខាន់មួយនេះបានដោយរីករាយ និងជ្រះថ្លា ។ សូមកុំយកចិត្តទៅគិតរឿងវត្ថុប្រណីត ឬរបស់ថ្លៃទៅធ្វើបុណ្យថ្ងៃនេះហើយធ្វើបាប ខ្លួននឹងគ្រួសារនៅថ្ងៃស្អែក សំខាន់យើងជ្រះថ្លា និងនិងធ្វើបុណ្យកុសលតាមលទ្ធភាពដែលយើងមានជាអំពើកុសលដ៏ប្រពៃដែលយើងបានខិតខំបំពេញ ៕
ចែករំលែកព័តមាននេះ