ទីក្រុងវ៉ាស៊ីនតោន៖ បេក្ខជនប្រធានាធិបតីអាមេរិករបស់គណបក្សសាធារណរដ្ឋ លោកត្រាំ សូមផ្ដាំមួយម៉ាត់ជាលើកចុងក្រោយទៅកាន់ពលរដ្ឋអាមេរិកាំងដែលជាម្ចាស់ឆ្នោតឱ្យបានជ្រាប «ថាបើលោកចាញ់ឆ្នោតនៅចុងឆ្នាំ២០២៤ លោកឈប់ឈរឈ្មោះជាបេក្ខជនប្រធានាធិបតីនៅឆ្នាំ២០២៨ទៀតហើយ»។ នេះជាអ្វីដែលលោកផ្ដាំទុកនៅក្នុងបទសម្ភាសផ្ដាច់មុខ។
តបទៅនឹងសំណួរថាតើលោកនឹងឈរឈ្មោះទៀតទេបើចាញ់ឆ្នោតលើកនេះ? លោកត្រាំដែលមានវ័យ៧៨ឆ្នាំទៅហើយនោះឆ្លើយតបទៅវិញថា «អត់ទេ ខ្ញុំមិនឈរឈ្មោះទៀតទេ»។ ទោះជាយ៉ាងណាក្ដី លោកសង្ឃឹមថានឹងទទួលបានជ័យជម្នះនៅក្នុងការបោះឆ្នោតថ្ងៃទី៥ ខែវិច្ឆិកា។ នៅក្នុងចំណោមបេក្ខជនប្រធានាធិបតីអាមេរិកទាំង២រូបគឺលោកត្រាំ និងលោកស្រីហារីស ម្នាក់ៗទទួលបានសំឡេងគាំទ្រប្រហាក់ប្រហែលគ្នា មានន័យថាមិនលើសលស់គ្នាប៉ុន្មានទេ។ នេះបើតាមការស្ទង់មតិ។
តាមពិត លោកត្រាំធ្លាប់ទទួលបានសំឡេងគាំទ្រនាំមុខនៅពេលលោកបៃដិនឈរឈ្មោះជាបេក្ខជនប្រធានាធិបតីរបស់គណបក្សប្រជាធិបតេយ្យ។ ប៉ុន្តែក្រោយពេលលោកបៃដិនដកខ្លួនថយ ហើយដាក់លោកស្រីហារីសជាបេក្ខជនវិញម្ដង គណបក្សប្រជាធិបតេយ្យហាក់ដូចជាឡើងសំឡេងគាំទ្រខ្លាំង។ លោកត្រាំធ្លាប់មិនទទួលស្គាល់លទ្ធផលឆ្នោតឆ្នាំ២០២០។ លោកថែមទាំងនិយាយឱ្យអ្នកគាំទ្រតស៊ូការពារសន្លឹកឆ្នោត ហើយនាំទៅដល់ការសម្រុកចូលវិមានរដ្ឋសភា និងស្លាប់មនុស្ស១ចំនួន។
សម្រាប់ការបោះឆ្នោតនៅអាណត្តិថ្មីនេះ គេមិនដឹងថាតើលោកត្រាំនឹងមានវិធានការបែបណាទៀតបើលោកចាញ់ឆ្នោត។ ប៉ុន្តែលោកធ្លាប់និយាយជារឿយៗកាលពីប៉ុន្មានខែចុងក្រោយនេះថាបើលោកចាញ់ឆ្នោត លោកមិនប្រាកដជាទទួលស្គាល់លទ្ធផលឆ្នោតដោយស្រួលៗនោះទេ។ ផ្ទុយពីលោកបៃដិនដែលមានបញ្ហាចោទផ្នែកសុខភាពទាំងសតិបញ្ញា និងកាយសម្បទាព្រោះលោកឧស្សាហ៍និយាយភ្លេចមុខភ្លេចក្រោយ និងឧស្សាហ៍ដើរក្រឡាច់ជើងដួលនៅក្នុងទីសាធារណៈជាញឹកញាប់។
លោកត្រាំហាក់ដូចជាមានសុខភាពមាំមួនជាង ទោះបីលោកទាំង២មានអាយុខុសត្រូវគ្នាត្រឹមតែបីឆ្នាំប៉ុណ្ណោះ។ រីឯលោកស្រីហារីសក៏មានវ័យរឹតតែក្មេងជាងលោកត្រាំទៅទៀត។ ដូច្នេះ បញ្ហាសុខភាពមិនមែនជាក្ដីកង្វល់របស់ពលរដ្ឋម្ចាស់ឆ្នោតទេ។ ការស្ទង់មតិថ្មីៗនេះបង្ហាញថាពលរដ្ឋអាមេរិកាំងត្រឹមតែ៧%ប៉ុណ្ណោះដែលគិតថាបញ្ហាអាយុរបស់លោកស្រីហារីសអាចនឹងប៉ះពាល់ប្រសិទ្ធភាពនៅក្នុងការបំពេញការងារ។ ប៉ុន្តែពលរដ្ឋរហូតដល់៨០%យល់ថាអាយុរបស់លោកស្រីគ្មានបញ្ហា៕
ចែករំលែកព័តមាននេះ