ខេត្តកំពង់ចាម ៖ តំបន់រមណីយដ្ឋានបែបប្រវត្តិសាស្ត្រភ្នំហាន់ជ័យ ស្ថិតនៅឃុំហាន់ជ័យ ស្រុកកំពង់សៀម នៅថ្ងៃវេនដាក់បិណ្ឌទី២ គេសង្កេតឃើញមានមនុស្សម្នាក្មេង ចាស់ ប្រុស ស្រី…
ខេត្តកំពង់ចាម ៖ តំបន់រមណីយដ្ឋានបែបប្រវត្តិសាស្ត្រភ្នំហាន់ជ័យ ស្ថិតនៅឃុំហាន់ជ័យ ស្រុកកំពង់សៀម នៅថ្ងៃវេនដាក់បិណ្ឌទី២ គេសង្កេតឃើញមានមនុស្សម្នាក្មេង ចាស់ ប្រុស ស្រី មកលេងនិងយកចង្ហាន់ មកប្រគេនព្រះសង្ឃពីគ្រប់ទឹកទី ។ ក្នុងនោះ មានអ្នកនៅស្រុកក្រូចឆ្មា ស្ទឹងត្រង់ ភ្នំពេញ រួមទាំងបណ្ដាខេត្តផ្សេងទៀតស្ថិតក្នុងសំលៀកបំពាក់សមរម្យទៀតផង ។
លោកតាធូ អ៊ន់ អាយុ៧៨ឆ្នាំ គណៈកម្មការវត្តភ្នំហាន់ជ័យមានប្រសាសន៍ឱ្យដឹងថា តាំងពីពេលដែលគាត់នៅកុមារភាពបានឃើញវត្តភ្នំហាន់ជ័យ មានទីតាំងស្ថិតនៅប្របតាមដងទន្លេមេគង្គពីសង្គមចាស់ គឺមានដើមឈើធំៗដុះច្រើនតាមដងផ្លូវ និងបរិវេណទីធ្លាវត្តមានម្លប់ត្រជាក់ត្រជុំ។ ហើយមានប្រាសាទបុរាណសាងសង់អំពីឥដ្ឋ ហើយស្ថិតនៅលើភ្នំធ្វើឲ្យមានខ្យល់ជំនោរបោកបក់មកល្ហើយបំបាត់នូវទុក្ខព្រួយកង្វល់បានមួយកំរិតផងដែរ ។
គណៈកម្មការវត្តរូបនេះមានប្រសាសន៍បន្តថា នៅក្នុងឱកាសវេនដាក់បិណ្ឌទី២ វត្តមានរបស់ឯកឧត្តម អ៊ុន ចាន់ដា អភិបាលខេត្តអភិបាលរងខេត្ត ព្រមទាំងអាជ្ញាធរពាក់ព័ន្ធ កាលពីព្រឹកថ្ងៃទី១៩ កញ្ញា ឆ្នាំ២០២៤ បាននាំយកចង្ហាន់ និងបច្ច័យប្រគេនដល់ព្រះគ្រូប៊ត់ តាំងឆេង ជាព្រះមេគណខេត្ត និងជាព្រះចៅអធិការវត្តភ្នំហាន់ជ័យ ជាមួយនោះបានចែកថវិកា និងក្រណាត់.សជូនដល់ចាស់ៗដែលបានអញ្ជើញចូលរួមក្នុងកម្មវិធីដាក់បិណ្ឌនេះ ។
តាមការសង្កេត ដោយផ្ទាល់ឃើញថា ប្រជាពលរដ្ឋកម្ពុជាភាគច្រើនកាន់ព្រះពុទ្ធសាសនានៅគ្រប់ទិសទីបាននាំគ្នាយកចង្ហាន់មកប្រគេនព្រះសង្ឃតាមទំនៀមទម្លាប់ពីបុរាណរហូតមកដល់សព្វថ្ងៃ ។ លោកតាគណៈកម្មការវត្តបានលើកឡើងថា ព្រះអង្គធំនៅលើវត្តភ្នំហាន់ជ័យនេះ គឺមានបារមីពូកែ ដោយអ្នកខ្លះដែលរៀបមង្គលការរួចមិនមានកូន បាននាំគ្នាមកបែរបន់សុំកូន ហើយក៏បានកូនដូចការប៉ងប្រាថ្នា ចំណែកអ្នកខ្លះទៀត បានប៉ងអ្វីផ្សេងគឺបានដូចចិត្ត ដោយហេតុដូច្នេះហើយទើបម្នាក់ៗ មានជំនឿ និងនាំគ្នាមកលេងវត្តភ្នំហាន់ជ័យ ដែលជារមណីយដ្ឋានប្រវត្តិសាស្ត្រ ។ សម្រាប់ទិដ្ឋភាពថ្ងៃដាក់បិណ្ឌពីរនេះ គឺមានពុទ្ធបរិស័ទយកចង្ហាន់មកប្រគេនព្រះសង្ឃច្រើនកុះករ។
លោកតាធូ អ៊ន់ គណៈកម្មការវត្តភ្នំហាន់ជ័យបញ្ជាក់ថា ចាប់តាំងពីពេលដែលកកើតទីអារាមភ្នំហាន់ជ័យនេះ គឺព្រះចៅអធិការវត្តមានចំនួន៧ជំនាន់មកហើយ រួមទាំងព្រះចៅអធិការវត្តសព្វថ្ងៃដែលជាព្រះមេគណខេត្ត។
ដោយសារតែកន្លែងនេះល្បីមានប្រាសាទបុរាណ គឺមានភ្ញៀវបរទេសបាននាំគ្នាជិះកប៉ាល់ទេសចរណ៍ធ្វើដំណើរពីរាជធានីភ្នំពេញ តាមដងទន្លេឡើងមកឈប់អែបច្រាំង រួចក៏មានរថយន្តក្រុងដឹកបន្តឡើងមកលើភ្នំ ដើម្បីគយគន់មើលទេសភាពព្រមទាំងថតរូបពីការរីកចម្រើនក្នុងវត្តភ្នំហាន់ជ័យ ដើម្បីយកទៅផ្សព្វផ្សាយតាមបណ្ដាញសង្គម ក្នុងការទាក់ទាញភ្ញៀវបរទេសផ្សេងទៀតឱ្យមកលេងនៅរមណីយដ្ឋានភ្នំហាន់ជ័យ ។
ចែករំលែកព័តមាននេះ