ប្រទេស​ចិន ៖ ក្រុមបាល់ទាត់​ជម្រើស​ជាតិចិន បន្ត​ចាញ់​២​ប្រកួត​ដំបូង​នៅ​ក្នុង​ពូ​ល C វគ្គ​ជម្រុះ​ជុំ​ទី​៣ ពានរង្វាន់​បាល់ទាត់​ពិភពលោក FIFA World Cup ឆ្នាំ ២០២៦ ប្រចាំ​ទ្វីបអាស៊ី កាលពី​ថ្ងៃ​ទី​១០ ខែកញ្ញា ឆ្នាំ​២០២៤​។ ការ​បរាជ័យ​នេះ កំពុង​តែ​បន្ថែម​សាំង​ទៅ​លើ​ភ្លើងកំហឹង​របស់​អ្នកគាំទ្រ​ចិន​។ គួររំលឹកថា កំ​ហឹ​.​ង​អ្នកគាំទ្រ​ចិន​ក​ញ្ជ្រោ​.​ល​ខ្លាំង តាំងពី​ក្រុម​ជម្រើសជាតិ​ខ្លួន​ចាញ់​ជប៉ុន ៧-០ យ៉ាង​អា​ម៉ា​.​ស់

ការ​ប្រកួត​ដែល​ធ្វើ​ឡើង​នៅ​កីឡដ្ឋាន Dalian Suoyuwan Football ម្ចាស់ផ្ទះ​ចិន​បាន​ចាញ់​អា​រ៉ា​ប៊ី​សា​អូឌីត ដែល​មាន​គ្នា​ត្រឹម​១០​នាក់ ក្រោយ​កីឡាករ​ក្រុម​ភ្ញៀវ Mohamed Kanno ទទួល​បាន​កាត​ក្រហម​តាំងពី​នាទី ១៩​។ ចិន​បើក​ការ​នាំមុខ​មុន​នៅ​នាទី ១៤ ដែល​ជា​គ្រាប់​បាល់​ចូល​ទី​ខ្លួនឯង​របស់​កីឡាករ​ក្រុម​ភ្ញៀវ​។ ប៉ុន្តែ​ទោះ​យ៉ាងណា​ក៏​ដោយ អា​រ៉ា​ប៊ី​សា​អូឌីត​បាន​វាយបក​យកឈ្នះ​២​គ្រាប់ នៅ​នាទី​៣៩​ក្នុង​វគ្គ​ទី​១ និង​នាទី​៩០ នៅ​ចុង​ម៉ោង​ក្នុង​វគ្គ​ទី​២​។

តាម​រយៈ​លទ្ធផល​នេះ ចិន​បន្ត​ចាញ់​២​ប្រកួត​ដំបូង​ក្នុង​ពូ​ល C បន្ត​ឈរ​បាត​តារាង​គ្មាន​ពិន្ទុ​រាប់​។ ជប៉ុន​កាន់កាប់​កំពូល​តារាង​មាន​៦​ពិន្ទុ តាម​ពីក្រោយ​ដោយ​អា​រ៉ា​ប៊ី​សា​អូឌីត​មាន​៤​ពិន្ទុ បា​រ៉ែ​ន​មាន​៣​ពិន្ទុ ឥណ្ឌូ​ណេ​ស៊ី​មាន​២​ពិន្ទុ និង​អូស្ត្រាលី​មាន​១​ពិន្ទុ គិត​ត្រឹម​បញ្ចប់​ការ​ប្រកួត​ទី​២​។

ការ​បរាជ័យ​របស់​ចិន កាលពី​ថ្ងៃ​ទី​១០ ខែកញ្ញា កំពុង​បន្ថែម​សាំង​លើ​ភ្លើងកំហឹង​អ្នកគាំទ្រ​របស់​ខ្លួន ដែល​បាន​កញ្ជ្រោល​ខ្លាំង ចាប់តាំងពី​ការ​បរាជ័យ​យ៉ាង​អាម៉ាស់ កាលពី​ប្រកួត​បើក​ឆាក​ពូ​ល C ដោយ​ចាញ់​ម្ចាស់ផ្ទះ​ជប៉ុន​លទ្ធផល ៧​ទល់​នឹង​០ កាលពី​ថ្ងៃ​ទី​៥ ខែកញ្ញា កន្លង​ទៅ​។ ការ​ចាញ់​ជប៉ុន​យ៉ាងធ្ងន់ធ្ងរ​នេះ បញ្ឆេះ​ភ្លើងកំហឹង​អ្នកគាំទ្រ​ចិន​ឱ្យ​ប្រើប្រាស់​ពាក្យ «​អាម៉ាស់​» ដើម្បី​ពណ៌នា​អំពី​ការ​បរាជ័យ​នេះ​។ មិនតែប៉ុណ្ណោះ​ទេ សមាជិក​ក្រុម​ជម្រើស​ជាតិចិន​រង​ការ​ប្រមាថមើលងាយ​នៅ​ឯ​ព្រ​លាន​យន្តហោះ​ពី​អ្នកគាំទ្រ និង​ការ​រិះគន់​ដូច​ទឹកបាក់​ទំនប់​លើ​អ៊ីនធឺណិត​ពី​អ្នកគាំទ្រ និង​ប្រព័ន្ធ​ផ្សព្វផ្សាយ​ក្នុងស្រុក​ផង​ដែរ​។

ការ​បរាជ័យ​ក្រោម​ថ្វី​ជើង​ម្ចាស់ផ្ទះ​ជប៉ុន នៅ​ទីក្រុង​សៃ​តា​ម៉ា បាន​ក្លាយជា​ប្រធានបទ​ដ៏​ក្តៅ​បំផុត​លើ​បណ្តាញ​សង្គម Weibo ដែល​ជា​បណ្តាញ​សង្គម​ដ៏​ធំ​បំផុត​របស់​ប្រទេស​ចិន​។ រហូត​ដល់​អ្នកគាំទ្រ​បាន​ស្នើ​ឱ្យ​រំលាយ​ក្រុមបាល់ទាត់​ជម្រើស​ជាតិចិន​បច្ចុប្បន្ន​នេះ ព្រោះថា​គ្មាន​ន័យ​ទាល់តែ​សោះ ក្នុង​ការ​ចំណាយ​ប្រាក់​យ៉ាងច្រើន​លើ​ក្រុម​ដែល​គ្មាន​ប្រយោជន៍​បែប​នេះ​។ ដូច្នេះ​ការ​ចាញ់​អា​រ៉ា​ប៊ី​សា​អូឌីត នឹង​កា្ល​យ​ជា​សម្ពាធ​ដ៏​ខ្លាំង​បន្ថែម​ទៀត សម្រាប់​ក្រុម​ជម្រើស​ជាតិចិន ពិសេស​លោកគ្រូ​បង្វឹក Branko Ivankovic ជនជាតិ​ក្រូ​អាត ដែល​បាន​ចូល​មក​កាន់​តំណែង​នេះ តាំងពី​ខែកុម្ភៈ ឆ្នាំ​២០២៤ កន្លង​ទៅ​។

ការ​ប្រកួត​បន្ទាប់ ដែល​ជា​ការ​ប្រកួត​ទី​៣ នៅ​ក្នុង​ពូ​ល C ចិន​នឹង​ត្រូវ​តទល់​ជាមួយ​ម្ចាស់ផ្ទះ​អូស្ត្រាលី នៅ​ថ្ងៃ​ទី​១០ ខែតុលា ឆ្នាំ​២០២៤ ដើម្បី​រើ​បម្រាស​ខ្លួន​ចេញពី​បាត​តារាង​៕ (​ដកស្រង់ ៖ Channel News Asia និង VnExpress)