ខេត្តស្វាយរៀង ៖ សមត្ថកិច្ចនគបាល នៃស្នងការដ្ឋាននគបាលខេត្តស្វាយរៀង បានចុះបង្ក្រាបជនសង្ស័យជាជនជាតិវៀតណាម ចំនួន០៧នាក់ (ស្រីម្នាក់) និងដកហូតវត្ថុតាងគ្រឿងញៀន ជាង០១គីឡូក្រាម នៅក្រុងបាវិត…
ខេត្តស្វាយរៀង ៖ សមត្ថកិច្ចនគបាល នៃស្នងការដ្ឋាននគបាលខេត្តស្វាយរៀង បានចុះបង្ក្រាបជនសង្ស័យជាជនជាតិវៀតណាម ចំនួន០៧នាក់ (ស្រីម្នាក់) និងដកហូតវត្ថុតាងគ្រឿងញៀន ជាង០១គីឡូក្រាម នៅក្រុងបាវិត ។
បើតាមសមត្ថកិច្ច បានប្រាប់ឲ្យដឹងថា ការចុះបង្ក្រាបនេះ ដោយអនុវត្តតាមបទបញ្ជាដ៏ម៉ឺងម៉ាត់របស់លោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង និងដឹកនាំបញ្ជាផ្ទាល់ពីលោកឧត្តមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន ដោយមានការសម្របសម្រួលផ្ទាល់ពីលោក ឡម ពេងស៊ាន ព្រះរាជអាជ្ញារង នៃអយ្យការ អមសាលាដំបូងខេត្តស្វាយរៀង កាលពីថ្ងៃទី២៥ ខែសីហា ឆ្នាំ២០២៤ កម្លាំងជំនាញការិយាល័យប្រឆាំងគ្រឿងញៀនខេត្ត ដឹកនាំដោយលោកវរសេនីយ៍ឯក កាន កេន នាយការិយាល័យ សហការជាមួយកម្លាំងអធិការដ្ឋាននគរបាលក្រុងបាវិត បានបើកប្រតិបត្តិការបង្ក្រាបករណីជួញដូរ រក្សាទុក និងប្រើប្រាស់ដោយខុសច្បាប់ នូវសារធាតុញៀន នៅចំណុចបន្ទប់ជួល និងផ្ទះសំណាក់ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។
ជាលទ្ធផល ឃាត់ខ្លួនជនសង្ស័យជនជាតិវៀតណាម ចំនួន០៧នាក់ ស្រី០១នាក់ និងចាប់យកសម្ភារៈ រួមមាន ៖
-ថ្នាំញៀន ប្រភេទមេតំហ្វេតាមីន ទម្ងន់ ៥៨២,៥១ក្រាម
-ថ្នាំញៀន ប្រភេទកេតាមីន ទម្ងន់ ២៩៤,៤៤ក្រាម
-ថ្នាំញៀន ប្រភេទអ៊ិចស្តាសី ទម្ងន់ ៣៤៥,០៧ក្រាម
សរុបសារធាតុញៀន គ្រប់ប្រភេទ ទម្ងន់ ១២២២,០២ក្រាម (០១គីឡូ២២២,០២ក្រាម) ។
-អាយផេត ០១គ្រឿង
-ជញ្ជីងថ្លឹងថ្នាំញៀន ០៥គ្រឿង
-ទូរសព្ទដៃ ១៤គ្រឿង
-ម៉ូតូ០៥គ្រឿង
-លិខិតឆ្លងដែន ០៦ក្បាល ។
ព្រមទាំងឧបករណ៍សម្ភារៈវេចខ្ចប់ និងប្រើប្រាស់គ្រឿងញៀនមួយចំនួនទៀត ។
បច្ចុប្បន្ន ជនសង្ស័យទាំង០៧នាក់ រួមជាមួយវត្ថុតាង ត្រូវបានបញ្ជូនទៅកាន់សាលាដំបូងខេត្ត ដើម្បីចាត់ការបន្តតាមច្បាប់។ មកដល់ថ្ងៃទី២៨ ខែសីហា ២០២៤នេះ លោកចៅក្រមបានចេញដីការឃុំខ្លួនបណ្តោះអាសន្ន នៅពន្ធនាគារខេត្តស្វាយរៀង រួចហើយ ៕
ចែករំលែកព័តមាននេះ