រាជធានីភ្នំពេញ ៖ អគ្គិភ័យនៅស្ទឹងមានជ័យទី០៣ ឆាបឆេះផ្ទះលក់ដូរ០១ខ្នងទាំងស្រុង នឹង រាលដាលដល់ផ្ទះសងខាង ចំនួន០២ខ្នង ខូចខាតបន្តិចបន្តួច នឹងបណ្តាលអោយឆេះរថយន្តមួយគ្រឿង ម៉ូតូមួយគ្រឿង…
រាជធានីភ្នំពេញ ៖ អគ្គិភ័យនៅស្ទឹងមានជ័យទី០៣ ឆាបឆេះផ្ទះលក់ដូរ០១ខ្នងទាំងស្រុង នឹង រាលដាលដល់ផ្ទះសងខាង ចំនួន០២ខ្នង ខូចខាតបន្តិចបន្តួច នឹងបណ្តាលអោយឆេះរថយន្តមួយគ្រឿង ម៉ូតូមួយគ្រឿង ពេលនេះសមត្ថកិច្ចបានរុករកឃើញស្ត្រីម្នាក់ស្លាប់នៅខាងក្រោយរថយន្ត ដោយសារតែបាក់ពិដានសង្កត់ពីលើ ។
គ្រោះអគ្គិភ័យនេះ បង្កអោយមានការភ្ញាក់ផ្អើលនៅវេលាម៉ោង ០៩ នឹង ២០នាទីព្រឹកថ្ងៃទី ២២ ខែសីហា ឆ្នាំ២០២៤ នៅតាមបណ្តោយផ្លូវវេងស្រេង ស្ថិតក្នុងសង្កាត់ស្ទឹងមានជ័យទី០៣ ខណ្ឌមានជ័យ រាជធានីភ្នំពេញ ។
សពស្ត្រីរងគ្រោះមានឈ្មោះ សាយ សារឿន អាយុ ៥៣ឆ្នាំ មុខរបរលក់ដូរ ត្រូវជាប្រពន្ធរបស់ម្ចាស់ផ្ទះ ។
គួរបញ្ជាក់ផងដែរថា កាលពីវេលាម៉ោង ០៩ នឹង ៣០នាទីព្រឹក ពលរដ្ឋបានឃើញមានផ្សែងហ៊ុយចេញពីផ្ទះលក់ភេសជ្ជៈបោះដុំ យីហោ ម៉ាក់ ស្រីពេជ្រ ស្របពេលនោះដែរ ក៏មានឮសម្លេងផ្ទុះជាច្រើនដង ចេញពីផ្ទះខាងលើនោះផងដែរ ។ ភ្លាមៗ ក៏លេចមានអណ្តាតភ្លើងឆាបឆេះយ៉ាងសន្ធោសន្ធៅកាន់តែខ្លាំងឡើងៗ ធ្វើអោយប្រជាពលរដ្ឋពិបាកជួយក្នុងការពន្លត់ ក៏សម្រេចរាយការណ៍ជូនសមត្ថកិច្ចមូលដ្ឋាន ដើម្បីបន្តទាក់ទងទៅសមត្ថកិច្ចជំនាញអគ្គិភ័យមកជួយអន្តរាគមន៍បាញ់ពន្លត់ ។
អគ្គិភ័យខាងលើនេះដែរបានឆាបឆេះផ្ទះចំនួន០១ខ្នងទាំងស្រុង ថែមទាំងឆាបឆេះ រថយន្តឡិចសុីស ២០០T មួយគ្រឿង ,ម៉ូតូមិនស្គាល់ម៉ាក ០១គ្រឿង រួមនឹងសម្ភារៈលក់ដូរមួយចំនួនផងដែរ នឹងបណ្តាលអោយមនុស្សម្នាក់ ស្លាប់បាត់បង់ជីវិត ។
ចំពោះករណីឆាបឆេះនេះ រថយន្តពន្លត់អគ្គិភ័យបានមកដល់ទីតាំងចំនួន១៥គ្រឿង ប្រើប្រាស់ទឹកអស់ចំនួន ៤៥ឡាន ដោយក្នុងនោះមានរថយន្តពន្លត់របស់កងរាជអាវុធហត្ថ , រថយន្តរបស់ស្នងការរាជធានី , រថយន្តសួន ឧស្សហកម្មកាណាឌីយ៉ា , រថយន្តជំនួយស្រាបៀរកម្ពុជា, រថយន្តពន្លត់ របស់កងទ័ពពិសេស ៩១១ បានមកដល់ទីតាំងខាងលើ បាញ់ពន្លត់រហូតរលត់ជាស្ថាពរ ។ ចំពោះមូលហេតុ ក្រោយសមត្ថកិច្ចជំនាញស្រាវជ្រាវយ៉ាងយកចិត្តទុកដាក់ សមត្ថកិច្ចបានសន្និដ្ឋានថា គឺបណ្តាលមកពីឆ្លងចរន្តអគ្គិសនី ៕
ចែករំលែកព័តមាននេះ