រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញនូវការភ្ញាក់ផ្អើល និងស្ញប់ស្ញែងក្រៃលែង ចំពោះតាយាយពីរនាក់ប្តីប្រពន្ធ ដែលបានជិះម៉ូតូឌុបគ្នាពីខេត្ដបាត់ដំបង…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញនូវការភ្ញាក់ផ្អើល និងស្ញប់ស្ញែងក្រៃលែង ចំពោះតាយាយពីរនាក់ប្តីប្រពន្ធ ដែលបានជិះម៉ូតូឌុបគ្នាពីខេត្ដបាត់ដំបង ដែលមានចម្ងាយជាង៣០០គីឡូម៉ែត្រ មកមើលព្រឹត្តិការណ៍បើកការដ្ឋានសាងសង់ព្រែកជីកហ្វូណនតេជោ នាថ្ងៃទី០៥ ខែសីហា ឆ្នាំ២០២៤ នៅភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្ដាល ។
ក្នុងពិធីចែកសញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ នៅថ្ងៃទី០៦ ខែសីហា ឆ្នាំ២០២៤ សម្តេចធិបតី ហ៊ុន ម៉ាណែត បានបញ្ជាក់ថា «ម្សិលមិញករណីពិសេសមួយ ប្រពន្ធខ្ញុំផ្ញើសារមកអំពីលោកតាម្នាក់ឌុបប្រពន្ធពីបាត់ដំបង គាត់ថាចេញម៉ោង៥ តែបើកូនគាត់ប្រាប់ គាត់ងើបតាំងពីម៉ោង៣ ជិះម៉ូតូពីបាត់ដំបងមកមើលព្រឹត្តិការណ៍បើកការដ្ឋានសាងសង់ព្រែកជីកហ្វូណនតេជោ» ។
សម្តេចធិបតី ហ៊ុន ម៉ាណែត បានគូសបញ្ជាក់ថា សកម្មភាពនេះ បញ្ជាក់អំពីស្មារតីនៃការរួមគ្នា ក្នុងការស្រឡាញ់ប្រទេសជាតិ ហើយការចូលរួមព្រឹត្តិការណ៍សាទរការបើកការដ្ឋានព្រែកជីកហ្វូណននេះ បានបង្ហាញឲ្យឃើញច្បាស់ នូវកម្លាំងឯកភាពជាធ្លុងមួយក្នុងសង្គមខ្មែរ ។
តាមរយៈឃ្លីបវីដេអូមួយ កាលពីថ្ងៃទី០៥ ខែសីហា ឆ្នាំ២០២៤ បានបង្ហាញតាយាយពីរនាក់ប្ដីប្រពន្ធ បានជិះម៉ូតូមកពីខេត្តបាត់ដំបងស្កាត់មកមើលព្រឹត្តិការណ៍ប្រវត្តិសាស្ដ្រ នៃការបើកការដ្ឋានសាងសង់ព្រែកជីកហ្វូណនតេជោ នៅស្រុកកៀនស្វាយ ខេត្តកណ្ដាល ។
តាមរយៈការសាកសួររបស់អ្នកប្រើប្រាស់បណ្ដាញសង្គមម្នាក់ ពួកគាត់បានជិះម៉ូតូមួយគ្រឿងចេញពីខេត្តបាត់ដំបង នៅវេលាម៉ោង៥ទៀបភ្លឺ ថ្ងៃទី០៤ ខែសីហា ហើយមកដល់ស្រុកកៀនស្វាយ ខេត្តកណ្ដាល ទីតាំងបើកការដ្ឋានព្រែកជីកហ្វូណនតេជោនៅវេលាម៉ោងប្រមាណ១ថ្ងៃត្រង់ ហើយបានសម្រាកនៅក្បែរទីតាំងប្រារព្វពិធីមួយយប់ ដើម្បីបានឃើញព្រឹត្តិការណ៍ប្រវត្តិសាស្ដ្រមួយ
នេះ ។
ជាមួយគ្នានេះ សម្ដេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ក៏បានឧបត្ថម្ភថវិកាចំនួន៥លានរៀលដល់តាយាយ ដោយបានចាត់ឲ្យឯកឧត្តម សុខ លូ អភិបាលខេត្តបាត់ដំបង នាំយកថវិកាប្រគល់ជូនពួកគាត់ នៅរង្វង់មូលលោកតាដំបងគ្រញូង ក្នុងក្រុងបាត់ដំបង ។
លោកតា និងលោកយាយ ដែលទទួលបានថវិកាឧបត្ថម្ភពីប្រមុខនៃរាជរដ្ឋាភិបាលកម្ពុជា ឈ្មោះ សាត ឈឿន អាយុ៦៦ឆ្នាំ ជាអតីតមេភូមិស្វាយបីដើម (ក្នុងឆ្នាំ២០១៥ដល់២០១៨) និងលោក យាយឈ្មោះ ប៊ុន សាមី អាយុ៦២ឆ្នាំ បច្ចុប្បន្ននៅភូមិស្វាយបីដើម ឃុំកន្ទឺ១ ស្រុកបាណន់ ខេត្តបាត់ដំបង ៕
ចែករំលែកព័តមាននេះ