ខេត្តកណ្តាល ៖ ម៉ោង៩:0៩នាទីព្រឹកថ្ងៃច័ន្ទទី០៥ ខែសីហា ឆ្នាំ២០២៤ សម្រែកនៃបេះដូងពលរដ្ឋខ្មែរគ្រប់ៗរូបនឹង លោតនៅក្នុងសង្វាក់តែមួយព្រមៗគ្នា ដោយសារតែនេះគឺជាពេលវេលាដ៏ញាប់ញ័រនិងរំភើបដោយសារតែ គម្រោងកសាងព្រែកជីកហ្វូណនតេជោ តម្លៃ…
ខេត្តកណ្តាល ៖ ម៉ោង៩:0៩នាទីព្រឹកថ្ងៃច័ន្ទទី០៥ ខែសីហា ឆ្នាំ២០២៤ សម្រែកនៃបេះដូងពលរដ្ឋខ្មែរគ្រប់ៗរូបនឹង លោតនៅក្នុងសង្វាក់តែមួយព្រមៗគ្នា ដោយសារតែនេះគឺជាពេលវេលាដ៏ញាប់ញ័រនិងរំភើបដោយសារតែ គម្រោងកសាងព្រែកជីកហ្វូណនតេជោ តម្លៃ ១.៧០០ លានដុល្លារត្រូវបានប្រកាសបើកជាផ្លូវការ ។
នៅក្នុងនាទីនេះ ម៉ោងនេះ ថ្ងៃនេះ ខែនេះ ឆ្នាំនេះ គឺជាថ្ងៃប្រវត្តិសាស្ត្រនៃមហាសាមគ្គីគ្រួសារខ្មែរ ដែលសម្លេងនៃសាមគ្គីភាពជាធ្លុងមួយរបស់ពលរដ្ឋខ្មែរគ្រប់ស្រទាប់វណ្ណៈទូទាំងប្រទេសវេញត្របាញ់ចូលគ្នាជាធ្លុងតែមួយផ្តោតលើគម្រោងនេះ ជាមួយនឹងសម្លេងចេញពីស្គរជ័យ ត្រដោកនិងឧបករណ៍បំពងសម្លេង តាមប្រពៃណីចេញពីគ្រប់វត្តអារ៉ាម ស្ថាប័នជាតិ និង ក្រុមហ៊ុនសហគ្រាសទូទាំងប្រទេស ។
ពេលវេលានេះ អាចត្រូវបានចាត់ទុកថា ជាពេលវេលាកំណត់ត្រាមាសនៃប្រវត្តិសាស្ត្ររបស់ខ្មែរសម័យ ទំនើបក្រោយពេលដែលបុព្វបុរសខ្មែរបានរួបរួមសាមគ្គីគ្នាកសាងអាណាចក្រនិងប្រាសាទអង្គរបន្សល់ទុកជាកេរ្តិ៍ដំណែលរហូតមកដល់ពេលបច្ចុប្បន្ននេះ ។
តម្លៃនៃការកសាងព្រែកជីកនេះមិនជាថ្លៃណាស់ណាទេ ដោយមានតម្លៃត្រឹមតែ១.៧០០លានដុល្លារប៉ុណ្ណោះ ពោលគឺប្រហាក់ប្រហែលនឹងគម្រោងឯទៀត ប៉ុន្តែតម្លៃពិសេសដែលមិនអាចកាត់ថ្លៃបាននោះ គឺគម្រោងនេះ ជានិមិត្តរូបនៃកម្លាំង និងការរួបរួមរបស់មហាគ្រួសារនៃពលរដ្ឋខ្មែរ ។ គម្រោងនេះបង្ហាញពីសមត្ថភាពរបស់ពលរដ្ឋក្នុងការសហការគ្នាជាធ្លុងមួយ ឆ្ពោះទៅរកគោលដៅរួមនៃការអភិវឌ្ឍន៍ និងវិបុលភាពជាតិ។
សម្តេចធិបតី ហ៊ុន ម៉ាណែតនាយករដ្ឋមន្ត្រីកម្ពុជាបាននិយាយក្នុងការបើកការដ្ឋានសាងសង់ព្រែកជីក ហ្វូណន តេជោ ថា ប្រជាជនទាំងអស់និងគណបក្សទាំងអស់បានគាំទ្រគម្រោងនេះ។ នេះជាគម្រោងជាតិនិយោមដ៏ធំមួយដែលនឹងជំរុញឯករាជ្យភាព អធិបតីភាព និង ការរីកចម្រើនសម្រាប់កម្ពុជា។
ព្រែកជីកហ្វូណនតេជោ ជាគម្រោង មួយដែលរាជរដ្ឋាភិបាលបានដាក់ចេញនិងចាត់ទុកថាជា គម្រោងដ៏មានអត្ថប្រយោជន៍មួយដែលជួយកាត់បន្ថយរយៈពេលចម្ងាយតម្លៃនៃការដឹកជញ្ជូនបង្កើតតំបន់ពាណិជ្ជកម្ម អភិឌ្ឍកំពង់ផែរណបថ្មីៗអភិវឌ្ឍកសិកម្ម ធារាសាស្ត្រ ចិញ្ចឹមសត្វ ។ គម្រោងមួយនេះជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា បង្កើតការងារបន្ថែមជូនប្រជាជនជំរុញការអភិវឌ្ឍទីក្រុងសំណង់នគររូបនីយកម្ម ជំរុញកំណើនទេសចរណ៍ និងជំរុញកំណើនអចលនទ្រព្យ។
រាជរដ្ឋាភិបាលបានដាក់ចេញផែនការអភិវឌ្ឍជាតិមួយហើយបានប្តេជ្ញាចិត្តធ្វើអោយប្រសើរ ឡើងនូវប្រព័ន្ធដឹកជញ្ជូនរបស់កម្ពុជាទាំងផ្លូវគោក ផ្លូវអាកាស ផ្លូវទឹកសាប និងផ្លូវសមុទ្រ ។ ក្នុងផែនការនោះមានផ្លូវ១០២ខ្សែ គម្រោងផ្លូវដែក គម្រោងព្រែកជីក គម្រោងដឹក ជញ្ជូនផ្លូវ សមុទ្រ និងគម្រោងអាកាសចរណ៍ ហើយក្នុងគម្រោងទាំងនេះគម្រោងព្រែកជីកហ្វូណនតេជោ មានសារៈសំខាន់ជាងគេ ។
ព្រែកជីកហ្វូណនតេជោនេះមានទទឹងខាងលើ១០០ម៉ែត្រ ទទឹងខាងក្រោម៨០ម៉ែត្រ និងជម្រៅ៥,៤ម៉ែត្រ ដែលអាចអោយកប៉ាល់ផ្ទុកកុងទីន័រទម្ងន់៣០០០តោនធ្វើនាវាចរណ៍បាន ។គម្រោងព្រែកជីកប្រវែង១៨០គីឡូម៉ែត្រនេះឆ្លងកាត់ខេត្តចំនួន៤ គឺខេត្តកណ្តាល តាកែវ កំពត និងខេត្តកែប ។ ព្រែកជីកហ្វូណនតេជោនេះនឹងភ្ជាប់កំពង់ផែភ្នំពេញ ទៅកំពង់ផែ សមុទ្រខេត្តកែប ដែលបង្កើតជាចរន្តការដឹកជញ្ជូនថ្មីមួយក្នុងប្រវត្តិសាស្ត្រកម្ពុជាសម័យទំនើប ។
ការកសាងព្រែកជីកដ៏ធំបែបនេះមិនមែនជារឿងងាយស្រួលនោះទេ ដោយគម្រោងនេះត្រូវកសាងផ្លូវសន្ទះនាវាចរចំនួន៣ ស្ពានឆ្លង១១ស្ពាន ប្រើរយៈពេល៤ឆ្នាំអោយរួចរាល់ ។ នៅពេលព្រែកជីករួចរាល់ជាស្ថាពរ ព្រែកជីកនេះនឹងធ្វើអោយកម្ពុជាអាចឯករាជ្យពីការគ្រប់គ្រងការដឹកជញ្ជូនផ្លូវទឹកពីវៀតណាមបាន ព្រោះកម្ពុជាអាចដឹកជញ្ជូនទំនិញនានាទៅសមុទ្រដោយខ្លួនឯងបាន ។
យោងលើរបាយការណ៍ព្រែកជីកហ្វូណនតេជោ ស្ថាបនារួចរាល់ និងដំណើរការពេញ លេញ ព្រែកជីកនេះភ្ជាប់ការដឹកជញ្ជូនទៅកាន់សមុទ្រទៅកំពត បើកអោយការដឹកជញ្ជូនផ្លូវ ទឹកទន្លេមេគង្គ និងផ្លូវសមុទ្រកម្ពុជា ។ ព្រែកជីកនេះជួយកាត់បន្ថយការដឹកជញ្ជូនផ្លូវទឹក ប្រមាណ១៦ភាគរយ និងបន្ថយរយៈពេលដឹកជញ្ជូនទំនិញផង ។
ព្រែកជីកនេះនឹងជួយលើកស្ទួយកសិកម្ម ធារាសាស្ត្រនៅតាមដងព្រែកជីកសម្រួលដល់ជីវភាពប្រជាពលរដ្ឋប្រមាណ១,៦លាននាក់ ដែលអាចទាញយកប្រយោជន៍ផ្ទាល់ ឬមិនផ្ទាល់ពីគម្រោង។ អ្នកជំនាញផ្នែកអចលនទ្រព្យបានលើកឡើងថា គម្រោងព្រែកជីកហ្វូណនតេជោនេះនឹងជួយលើការអភិវឌ្ឍវិស័យអចលនទ្រព្យនៅតាមតំបន់ទាំងនោះ ហើយថែមទាំងបង្កើត គម្រោងអចលនទ្រព្យថ្មីៗ សម្រាប់ប្រជាជន និងអ្នកវិនិយោគ ។ អ្នកជំនាញផ្នែកទេសចណ៍វិញ បាននិយាយថា គម្រោងព្រែកជីកនេះក៏នឹងធ្វើអោយវិស័យទេសចរណ៍កាន់តែប្រសើរឡើងតាមរយៈការដឹកជញ្ជូនទេសចរណ៍ទាំងជាតិ និងអន្តរជាតិចូលមកតាមផ្លូវទឹករហូតដល់រាជធានីភ្នំពេញ ដែលជាបេះដូងនៃប្រទេសកម្ពុជា។
លទ្ធផលការសិក្សា ផលប៉ះពាល់ និងទិដ្ឋភាពច្បាប់ឃើញថា មិនបានធ្វើអោយល្មើសលើកិច្ចព្រមព្រៀងមេគង្គឆ្នាំ១៩៩៥នោះទេ ។ យោងតាមមាត្រា៥ នៃកិច្ចព្រមព្រៀង បានចែងពីការប្រើប្រាស់ទឹកដោយសមហេតុផល ដោយកម្ពុជាមានកាតព្វកិច្ច ធ្វើការជូនដំណឹងទៅគណៈកម្មការរួមអោយបានជ្រាបជាមុន ពេលអនុវត្តការងារសាងសង់ និងមិនជាប់កាតព្វកិច្ចធ្វើការពិគ្រោះយោបល់ជាមុន ឬត្រូវមានកិច្ចព្រមព្រៀងជាក់លាក់ពីប្រទេសសមាជិកគណៈកម្មការទន្លេមេគង្គនោះទេ ។
គម្រោងព្រែកជីកហ្វូណនតេជោ មិនស្ថិតនៅក្នុងគម្រោងខ្សែក្រវ៉ាត់ និងផ្លូវរបស់ចិននោះទេ ។ វាគឺជាគម្រោងទទួលការសាងសងក្រោមរូបភាពវិនិយោគបែប BOT ក្នុងគោលបំណងដោះស្រាយបញ្ហាការដឹកជញ្ជូនតាមផ្លូវទឹក ។
ទោះបីជាគម្រោងព្រែកជីកនេះទើបតែបានសិក្សា និងបាន បើកការដ្ឋានសាងសង់ក្តីក៏មិនមែនមានន័យថា គម្រោងព្រែកជីកនេះថ្មីដែរដោយសារវាសិ្ថតនៅលើដានព្រែកជីកចាស់ របស់ខ្មែរតាំងពីសម័យមុនអង្គរមកម្ល៉េះ គឺសម័យហ្វូណនក្នុងប្រវត្តិសាស្ត្ររបស់កម្ពុជា មាន ព្រែកជីកចំនួន៣ គឺព្រែកជីកអូកែវ ព្រែកជីកវេនតេ និងព្រែកជីកហ្វូណន តែឆ្លងកាត់សង្គ្រាម ក្នុងប្រវត្តិសាស្ត្រព្រែកជីកចំនួន២ គឺអូកែវ និងវេនតេ ស្ថិតនៅក្នុងទឹកដីវៀតណាម ។
បច្ចុប្បន្នទំនិញរបស់កម្ពុជាចេញពីកំពង់ផែភ្នំពេញ៦៧% ត្រូវដឹកទៅកាន់កំពង់ផែ ក្រុងព្រះសីហនុ និង៣៣% ត្រូវដឹកតាមប្រទេសវៀតណាម តាមការរំពឹងទុកនៅពេលព្រែកជីក នេះបញ្ចប់ការសាងសង់ និងប្រើប្រាស់ជាផ្លូវការ ការដឹកជញ្ជូនតាមផ្លូវទឹកទៅកំពង់ផែក្រុង ព្រះសីហនុ នឹងកើន៩០% រីឯទៅតាមវៀតណាមនៅសល់ត្រឹមតែ១០%ប៉ុណ្ណោះសម្រាប់ តែទំនិញណាដែលចាំបាច់ទៅតាមផ្លូវនេះ ។
តាមការបញ្ជាក់របស់លោកឧបនាយករដ្ឋមន្ត្រី និងជាអនុប្រធានទី១ក្រុម ប្រឹក្សាអភិវឌ្ឍកម្ពុជា លោកស៊ុន ចាន់ថុល គម្រោងនេះប្រើប្រាស់ថវិការវាងរដ្ឋាភិបាលកម្ពុជាជាមួយក្រុមហ៊ុនឯកជន ។ លោកបណ្ឌិត គី សិរីវឌ្ឍ អ្នកជំនាញផ្នែកសេដ្ឋកិច្ចនៃរាជ្យបណ្ឌិតសភាកម្ពុជា បានលើក ឡើងថា ការប្រើប្រាស់ព្រែកជីកនេះនឹងផ្តល់ដល់ឧត្តមភាពផ្នែកប្រកួតប្រជែងរបស់កម្ពុជា ព្រោះកម្ពុជាចំណេញលើថ្លៃដឹកជញ្ជូនជាង៣០០ដុល្លារក្នុងមួយទូកុងទីន័រ បើធៀបនឹងការដឹកជញ្ជូនតាមវៀតណាម ។ គម្រោងព្រែកជីកនេះ ទទួលបានការអបអរសាទរពីប្រជាពលរដ្ឋកម្ពុជា ក្នុងមួយរយៈពេល ចុងក្រោយនេះលើបណ្តាញសង្គមហ្វេសប៊ុក មានការប្តូរprofile បង្ហាញពីការគាំទ្រ លើគម្រោងនេះ ។
បច្ចុប្បន្នកម្ពុជាមានទន្លេឆ្លងកាត់ប្រវែង១.៧៥០គីឡូម៉ែត្រ តែផ្លូវទឹកដែលអាច បើកបរ កប៉ាល់បានមានត្រឹមតែ៧៨០គីឡូម៉ែត្រតែប៉ុណ្ណោះ ។ ក្នុងចំណោមផ្លូវទឹកដឹកជញ្ជូនបាន ទាំងនេះមានទន្លេមេគង្គ៣០ភាគរយ ហើយវាបានក្លាយជាទន្លេសំខាន់ជាងគេក្នុងការដឹកជញ្ជូនតាមផ្លូវទឹក ។ ទន្លេសាប១៥ភាគរយ ទន្លេបាសាក់៥ភាគរយ តែវាមិនដូចជា ទន្លេមេគង្គនោះទេ ក្នុងនោះមានការហូរភ្ជាប់តិចតួច និងទិសដៅលំហូរទឹកផ្សេងគ្នាដូច្នេះទន្លេមេគង្គជាសរសៃឈាមសេដ្ឋកិច្ចសំខាន់បំផុតសម្រាប់កម្ពុជា ។
សរុបមកវិញគម្រោងនេះគឺ ជាសក្ខីភាពមួយដែលបង្ហាញពីឧត្តមភាពជាតិនៅក្នុងការសម្រេចនូវអ្វីដែលជាផលប្រយោជន៍ជាតិនិងប្រជាជនទូទាំងប្រទេស ដើម្បីធានាបាននូវផលប្រយោជន៍យូរអង្វែងដល់ប្រជាជនកម្ពុជា ជំរុញកំណើនសេដ្ឋកិច្ច និងមោទនភាពវប្បធម៌ និង ការអភិវឌ្ឈន៍។
គម្រោងនេះកំពុងតែដើរតួជាការបំផុសគំនិតនិងចលនាជាតិនិយមនៅក្នុងការពង្រឹងអំណាចនិងឥទ្ធិពលនៃកម្លាំងឯកភាពជាតិនិងការសហការក្នុងការសម្រេចបាននូវព្រឹត្តិការណ៍សំខាន់ៗរបស់ជាតិនាពេលអនាគត ដែលកម្រមានជាតិណាអាចធ្វើបាននៅក្នុងសម័យបច្ចុប្បន្ន ៕
ចែករំលែកព័តមាននេះ